മലയാളത്തിന്റെ പ്രിയനടന്‍ മോഹന്‍ലാലിനെ ഇന്ത്യന്‍ സിനിമയിലെ എക്കാലത്തെയും മികച്ച പ്രതിഭയെന്ന് വിശേഷിപ്പിച്ച് പ്രമുഖ ചലച്ചിത്ര നിര്‍മാതാവ് ബോണി കപൂര്‍. രാജ്യത്തിന് ലഭിച്ച ഏറ്റവും മികച്ച നടന്‍ മോഹന്‍ലാല്‍ ആണെന്നും അദ്ദേഹത്തിന് പകരം വെക്കാന്‍ മറ്റാരും ഇല്ലെന്നും അദ്ദേഹം തുറന്നുപറഞ്ഞു. ഒരു പൊതുപരിപാടിയില്‍ സംസാരിക്കവെയാണ് ഇന്ത്യന്‍ സിനിമാലോകത്തെ വിസ്മയിപ്പിച്ചുകൊണ്ട് ബോണി കപൂര്‍ മോഹന്‍ലാലിനെ പ്രശംസിച്ചത്.
തെലുങ്ക് സിനിമ അതിന്റെ ഗ്ലാമര്‍ വശം കാഴ്ചവെച്ചുവെന്നും തമിഴില്‍ നിന്നും ഭാഗ്യരാജും ഭാരതിരാജയും പോലുള്ള മികച്ച പ്രതിഭകള്‍ ഉണ്ടായെന്നും അദ്ദേഹം ഓര്‍‍മിച്ചു. എന്നാല്‍ രാജ്യത്തിന് ഏറ്റവും മികച്ച നടനെ സമ്മാനിച്ചതിന്റെ ക്രെഡിറ്റ് മലയാള സിനിമയ്ക്കാണ് ഉള്ളതെന്നും അത് മോഹന്‍ലാലാണെന്നും ബോണി കപൂര്‍ വ്യക്തമാക്കി. നിലവില്‍ സിനിമാലോകത്ത് ഏറെ ചര്‍ച്ചയാകുന്നതാണ് ഈ വാക്കുകള്‍.
”നമ്മുടെ രാജ്യത്തെ ഏറ്റവും മികച്ച നടനെ സമ്മാനിച്ചിട്ടുള്ളത് മലയാള സിനിമയാണ്. അത് മോഹന്‍ലാലാണ്. നമുക്ക് ഒരുപാട് നല്ല നടന്മാരുണ്ട്.പക്ഷെ മോഹന്‍ലാലിനേക്കാളും മികച്ച ആരും തന്നെയില്ല”
അതേസമയം, മികച്ച വിജയ ചിത്രങ്ങളുടെ നിരയിലേക്ക് പുതിയൊരു സിനിമ കൂടി മോഹന്‍ലാലിന്റേതായി അണിയറയില്‍ ഒരുങ്ങുന്നുണ്ട്. തരുണ്‍ മൂര്‍ത്തി സംവിധാനം ചെയ്യുന്ന അതിമനോഹരം എന്ന ചിത്രത്തിൽ ശക്തമായ പോലീസ് വേഷത്തിലാണ് താരം എത്തുന്നത്. മീര ജാസ്മിന്‍ നായികയായെത്തുന്ന ഈ ചിത്രത്തിന്റെ ഫസ്റ്റ് ലുക്ക് പോസ്റ്റര്‍ സിനിമ പ്രേമികള്‍ക്കിടയില്‍ വലിയ ചര്‍ച്ചയായിരുന്നു. ഇതിനു പുറമെ ‘ഓപ്പറേഷന്‍ ഗംഗ’ എന്ന ബിഗ് ബജറ്റ് ചിത്രവും മോഹന്‍ലാലിന്റേതായി വരാനിരിക്കുന്ന പ്രധാന പ്രോജക്റ്റുകളിലൊന്നാണ്.