മാസ് ആക്ഷൻ സിനിമകളിലെ അമിത അതിക്രമങ്ങളോടും രക്തച്ചൊരിച്ചിലിനോടും ശക്തമായി വിയോജിച്ച് പ്രമുഖ നടി രാധിക ആപ്തെ. തിയേറ്ററുകളിൽ വലിയ സാമ്പത്തിക വിജയം നേടുന്നുണ്ടെങ്കിലും ഇത്തരം ചിത്രങ്ങളുടെ ഭാഗമാകാൻ തനിക്ക് താല്പര്യമില്ലെന്ന് അവർ തുറന്നടിച്ചു. അക്ക എന്ന പുതിയ വെബ്സീരീസിന്റെ പ്രചാരണത്തിനിടെ വാർത്താ ഏജൻസിയായ PTI-യോടായിരുന്നു താരത്തിന്റെ പ്രതികരണം.
തലയോട്ടി അടിച്ചു തകർക്കുന്നതുപോലെയുള്ള കൊടും ക്രൂരതകളും യുക്തിസഹമല്ലാത്ത മർദ്ദനങ്ങളും തിയേറ്ററുകളിലിരുന്ന് ആളുകൾ പോപ്കോൺ കഴിച്ചുകൊണ്ട് ആസ്വദിക്കുന്നത് അസംബന്ധമാണെന്ന് രാധിക വിമർശിച്ചു. സമൂഹത്തിൽ ഹിംസയ്ക്ക് ജനപ്രീതി ഏറിവരുന്ന സാഹചര്യം അംഗീകരിക്കാൻ തന്റെ മനസ്സ് അനുവദിക്കുന്നില്ലെന്നും അതിനാൽ അത്തരം ആക്ഷൻ ചിത്രങ്ങളിൽ നിന്ന് വിട്ടുനിൽക്കാനാണ് തീരുമാനമെന്നും അവർ വ്യക്തമാക്കി.
അമ്മയായതിനു ശേഷം ജീവിതത്തിലെ മുൻഗണനകളിൽ വലിയ മാറ്റങ്ങൾ വന്നിട്ടുണ്ടെന്നും താരം വെളിപ്പെടുത്തി. നിലവിൽ 12 മണിക്കൂർ ജോലി സമയം മാത്രമാണ് ആവശ്യപ്പെടുന്നത്. വളർന്നുവരുന്ന മകൾക്കൊപ്പം പരമാവധി സമയം ചെലവഴിക്കാനാണ് ആഗ്രഹിക്കുന്നത്. അഭിനയം എന്നത് ജീവിതത്തിന്റെ ഒരു ഭാഗം മാത്രമാണെന്നും മാറ്റങ്ങൾക്കനുസരിച്ച് ഭാവിയിൽ സിനിമകൾ കുറയ്ക്കാനോ പൂർണ്ണമായി നിർത്താനോ സാധിച്ചേക്കാമെന്നും രാധിക കൂട്ടിച്ചേർത്തു.
1980-കളുടെ പശ്ചാത്തലത്തിൽ രണ്ട് അധോലോക നായകരുടെ ശത്രുത പ്രമേയമാക്കുന്ന ‘അക്ക’ എന്ന നെറ്റ്ഫ്ലിക്സ് സീരീസിലാണ് രാധിക അടുത്ത് പ്രത്യക്ഷപ്പെടുന്നത്. കീർത്തി സുരേഷും പ്രധാന വേഷത്തിലെത്തുന്ന ഈ വൈആർഎഫ് നിർമ്മാണ സംരംഭം ഒക്ടോബർ 30-ന് റിലീസ് ചെയ്യും.
രാധികയുടെ വാക്കുകൾ
“ഇപ്പോൾ തരംഗമായിരിക്കുന്നത് അഹിംസയല്ല, ഹിംസയാണ്. ഞാൻ അതിനെ ശക്തമായി എതിർക്കുന്നു. ഞാൻ അതിക്രമം നിറഞ്ഞ സിനിമകൾ കാണാറില്ല. അവ എനിക്ക് അസംബന്ധമായാണ് തോന്നുന്നത്. 50 പുരുഷന്മാരോ സ്ത്രീകളോ ക്രൂരമായി മർദ്ദിക്കപ്പെടുമ്പോൾ, അതെങ്ങനെയാണ് പോപ്കോൺ കഴിച്ചുകൊണ്ട് ആസ്വദിക്കാനാകുക? അതെനിക്ക് മനസ്സിലാകുന്നില്ല. എന്റെ തലച്ചോറിന് അത് അംഗീകരിക്കാൻ കഴിയുന്നില്ല. അതുകൊണ്ട് ഞാൻ അതിന്റെ ഭാഗമാകാതിരിക്കാൻ ആഗ്രഹിക്കുന്നു.
2024-ൽ ഒരു പെൺകുഞ്ഞിന് ജന്മം നൽകിയതോടെ തന്റെ ജീവിത മുൻഗണനകളിൽ വലിയ മാറ്റങ്ങൾ വന്നിട്ടുണ്ടെന്ന് രാധിക വ്യക്തമാക്കി. ഒരു ദിവസം 16 മണിക്കൂർ ജോലി ചെയ്യുന്നതിന് പകരം 12 മണിക്കൂർ ജോലി സമയം ക്രമീകരിക്കാനാണ് താൻ ഇപ്പോൾ ആവശ്യപ്പെടുന്നത്. മകൾ വളരെ ചെറുതായതിനാൽ അവളോടൊപ്പം പരമാവധി സമയം ചെലവഴിക്കാനാണ് താൻ മുൻഗണന നൽകുന്നത്. അഭിനയം എന്നത് ജീവിതത്തിന്റെ ഒരു ഭാഗം മാത്രമാണെന്നും അല്ലാതെ അതുതന്നെയാണ് പൂർണ ജീവിതമെന്ന് താൻ കരുതുന്നില്ലെന്നും രാധിക ഓർമ്മിപ്പിച്ചു. ഭാവിയിൽ അഭിനയം പൂർണമായി നിർത്താനോ അല്ലെങ്കിൽ കൂടുതൽ സിനിമകൾ ചെയ്യാനോ സാധിച്ചേക്കാം. കാരണം ജീവിത സാഹചര്യങ്ങൾ മാറിക്കൊണ്ടിരിക്കും.”