മലയാള സിനിമയുടെ മെഗാസ്റ്റാർ മമ്മൂട്ടിക്ക് ജന്മദിനാശംസകൾ നേർന്നുകൊണ്ട് അദ്ദേഹത്തിന്റെ സന്തതസഹചാരിയും നിർമാതാവുമായ ജോർജ് പങ്കുവെച്ച വൈകാരികമായ സോഷ്യൽ മീഡിയ കുറിപ്പ് ശ്രദ്ധേയമാകുന്നു. മൂന്നര പതിറ്റാണ്ട് നീണ്ട തങ്ങളുടെ ആത്മബന്ധവും ഒപ്പമുള്ള ഓർമ്മകളും ഓർത്തെടുത്താണ് ജോർജ് പ്രിയ താരത്തിന് ആശംസ അറിയിച്ചത്. വെറുമൊരു തൊഴിൽബന്ധമായി തുടങ്ങി, പിന്നീട് സ്വന്തം സഹോദരനെപ്പോലെ ഹൃദയത്തോട് ചേർന്നുനിന്ന ആഴമേറിയ ബന്ധത്തെക്കുറിച്ചാണ് അദ്ദേഹം കുറിപ്പിൽ വ്യക്തമാക്കുന്നത്.
“35 വർഷങ്ങൾ, ഹൃദയത്തിൽ പതിഞ്ഞ ഒരു യാത്ര” എന്ന വരികളോടെ ആരംഭിക്കുന്ന സന്ദേശത്തിൽ, ഒരുമിച്ച് ചിരിച്ച നിമിഷങ്ങളും സന്തോഷങ്ങളും ജീവിതത്തിലെ ഉയർച്ചതാഴ്ചകളും നിറഞ്ഞ ഈ യാത്രയിൽ വാക്കുകൾക്ക് അതീതമായ ഓർമ്മകളാണ് തനിക്ക് ലഭിച്ചതെന്ന് ജോർജ് കുറിക്കുന്നു. മമ്മൂട്ടിയെപ്പോലൊരു മനുഷ്യനെ ജീവിതത്തിൽ ലഭിച്ചത് വലിയൊരു അനുഗ്രഹമാണെന്നും, ഈ സ്നേഹബന്ധം ഇനിയും ഒരുപാട് വർഷങ്ങൾ തുടരാനാകട്ടെ എന്നും അദ്ദേഹം ആശംസിക്കുന്നു.
1991-ൽ ഐ.വി. ശശി സംവിധാനം ചെയ്ത ‘നീലഗിരി’ എന്ന സിനിമയുടെ സെറ്റിൽ നിന്നാണ് മമ്മൂട്ടിയും ജോർജും തമ്മിലുള്ള യാത്ര ആരംഭിക്കുന്നത്. തുടർന്ന് ജോഷിയുടെ ‘കൗരവർ’ എന്ന ചിത്രത്തിലൂടെ സ്വതന്ത്ര മേക്കപ്പ് ആർട്ടിസ്റ്റായ ജോർജ്, പിൽക്കാലത്ത് മമ്മൂട്ടിയുടെ പേഴ്സണൽ മേക്കപ്പ് മാനായും വിശ്വസ്തനായ കൂടെയുള്ള വ്യക്തിയായും മാറി. ‘പാലേരി മാണിക്യം: ഒരു പാതിരാകൊലപാതകത്തിന്റെ കഥ’ എന്ന ചിത്രത്തിലൂടെ മികച്ച മേക്കപ്പ് ആർട്ടിസ്റ്റിനുള്ള സംസ്ഥാന ചലച്ചിത്ര പുരസ്കാരവും അദ്ദേഹം കരസ്ഥമാക്കിയിരുന്നു. മേക്കപ്പ് രംഗത്തിന് പുറമെ ‘ഇമ്മാനുവൽ’, ‘അച്ചാ ദിൻ’, ‘പുഴു’ എന്നീ മമ്മൂട്ടി ചിത്രങ്ങളുടെ നിർമാതാവു കൂടിയാണ് ജോർജ്. വെള്ളിത്തിരയ്ക്ക് മുന്നിലും പിന്നിലും മമ്മൂട്ടിയോടൊപ്പം ജോർജ് നടത്തുന്ന ഈ നീണ്ട യാത്രയും അപൂർവ്വ സൗഹൃദവും സിനിമാ ലോകത്ത് ഏറെ ബഹുമാനത്തോടെയാണ് നോക്കിക്കാണുന്നത്.
ജോർജ് മമ്മൂട്ടിയുടെ വാക്കുകൾ;
“മുപ്പത്തിയഞ്ചു വർഷങ്ങൾ, ഹൃദയത്തിൽ പതിഞ്ഞ ഒരു യാത്ര. എന്റെ പ്രിയപ്പെട്ട മമ്മൂക്കയ്ക്ക് പിറന്നാൾ ആശംസകൾ. 35 വർഷം മുമ്പ് ഒരു ജോലിയിലൂടെ തുടങ്ങിയ യാത്ര ഇന്ന് എന്റെ ജീവിതത്തിലെ ഏറ്റവും വിലപ്പെട്ട ബന്ധങ്ങളിലൊന്നായി മാറിയിരിക്കുന്നു.
മമ്മൂക്കാ, ഈ വർഷങ്ങൾക്കിടയിൽ നിങ്ങൾ എനിക്ക് ഒരു സഹപ്രവർത്തകനോ സുഹൃത്തോ മാത്രമായിരുന്നില്ല. ജീവിതത്തിന്റെ പല ഘട്ടങ്ങളിലും ഒപ്പമുണ്ടായിരുന്ന, സ്വന്തം സഹോദരനെപ്പോലെ ഹൃദയത്തോട് ചേർത്തുവച്ച ഒരാളാണ്.
ഒരുമിച്ച് ചിരിച്ച നിമിഷങ്ങളും, പങ്കുവച്ച സന്തോഷങ്ങളും, ജീവിതത്തിലെ പല ഉയർച്ചകളും താഴ്ചകളും… 35 വർഷങ്ങൾക്കിടയിൽ ഒരുപാട് ഓർമ്മകൾ, അതിൽ പലതും വാക്കുകളിലൂടെ പറയാൻ കഴിയാത്തത്ര വിലപ്പെട്ടതാണ്.
എന്റെ ജീവിതത്തിലേക്ക് നിങ്ങളെ കൊണ്ടുവന്ന ആ ബന്ധത്തിന് ഇന്നും ഒരുപാട് നന്ദിയുണ്ട്. നിങ്ങളെ പോലൊരു മനുഷ്യനെ ജീവിതത്തിൽ ലഭിച്ചത് തന്നെ ഒരു അനുഗ്രഹമായി ഞാൻ കാണുന്നു. ഇനിയും ഒരുപാട് വർഷങ്ങൾ നമ്മൾ ഒരുമിച്ച്, ഒരുപാട് ഓർമകൾ കൂടി ഉണ്ടാക്കണം… ഈ സ്നേഹവും ബന്ധവും.’’