തന്റെ ജന്മദിനത്തിൽ തന്നെ ദൃശ്യം 3 തിയേറ്ററുകളിലെത്തുന്നത് യാദൃശ്ചികമാണെന്ന് തുറന്നു പറഞ്ഞ് നടൻ മോഹൻലാൽ. കൂടാതെ എല്ലാ പിറന്നാളിനും തന്റെ സിനിമ റിലീസ് ചെയ്യുക എന്നത് നടക്കുന്ന കാര്യമല്ലെന്നും, ഇങ്ങനെ സംഭവിച്ചത് ഭാഗ്യമാണെന്നും മോഹൻലാൽ കൂട്ടിച്ചേർത്തു. ദൃശ്യം 3 പ്രൊമോഷന്റെ ഭാഗമായി നടത്തിയ വാർത്താ സമ്മേളനത്തിൽ സംസാരിക്കുകയായിരുന്നു അദ്ദേഹം.
“ഈ സിനിമ നമ്മൾ നേരത്തെ റിലീസ് ചെയ്യാൻ പ്ലാൻ ചെയ്തതായിരുന്നു. എന്നാൽ പശ്ചിമേഷ്യൻ സംഘർഷത്തെത്തുടർന്ന് നമുക്ക് റിലീസ് മാറ്റേണ്ടതായി വന്നു. സാധാരണ സിനിമകൾ റിലീസ് ചെയ്യുന്നത് വ്യാഴാഴ്ചയോ വെള്ളിയാഴ്ചയോ ആണ്. മെയ് 21 ഒരു വ്യാഴാഴ്ചയാണ്. അതൊരു ഭാഗ്യമായിട്ട് കരുതുന്നു. പിന്നെ ഇങ്ങനെ ഒരിക്കലേ ചാൻസ് കിട്ടുകയുള്ളൂ. അത്രയും ആൾക്കാർ പ്രതീക്ഷയോടെ കാത്തിരിക്കുന്ന ഒരു സിനിമ.
ആ സിനിമ നമ്മുടെ പിറന്നാളിന് കൊടുക്കുക എന്ന് പറയുന്നത് എന്നേക്കാൾ കൂടുതൽ ആന്റണിയുടെ അഭിപ്രായമായിരുന്നു. അതൊരിക്കൽ മാത്രം സംഭവിക്കുന്ന കാര്യമാണ്. ഇനി എല്ലാ പിറന്നാളിനും ഓരോ സിനിമ ഇറക്കാൻ പറ്റില്ല. അത് മാത്രമല്ല, ആ ദിവസങ്ങൾ കൂടി വരണം. നമ്മുടെയൊക്കെ ജീവിതത്തിലെ ഏറ്റവും പ്രധാനപ്പെട്ട ഒരു കഥാപാത്രമാണ് ജോർജ് കുട്ടിയും ദൃശ്യവും.” മോഹൻലാൽ പറഞ്ഞു.
“അപ്പോൾ ആ ദിവസം വന്നത് വളരെ പോസിറ്റീവായി ഞങ്ങൾ കാണുന്നു. അതൊരു പിറന്നാൾ സമ്മാനമായി ആൾക്കാർക്ക് കൊടുക്കാനുള്ള ഒരു ധൈര്യം ഞങ്ങൾക്കുണ്ടായി. ഒരു മോശം സിനിമയൊന്നും ആയിരിക്കില്ല. ഇതിലൊന്നും കള്ളത്തരങ്ങൾ ഒന്നുമില്ല.
ജോർജ് കുട്ടിക്കും കുടുംബത്തിനും സംഭവിച്ചത് എന്താണെന്ന് എല്ലാവർക്കുമറിയാം. അതിൽ നിന്ന് അയാൾ എങ്ങനെ രക്ഷപ്പെടുന്നു എന്നതാണ് എല്ലാവർക്കും അറിയേണ്ടത്. എന്റെ പിറന്നാൾ ദിവസം തന്നെ ഈ സിനിമ റിലീസ് ചെയ്യുന്നതിൽ സന്തോഷമുണ്ട്” -മോഹൻലാൽ കൂട്ടിച്ചേർത്തു.