മലയാള ചലച്ചിത്ര രംഗത്ത് ഗ്രൂപ്പ് വഴക്കുകളും പൊളിറ്റിക്‌സും ശക്തമാണെന്ന രൂക്ഷ വിമർശനവുമായി പ്രമുഖ നടി ഇനിയ. മുൻകൂട്ടി തീരുമാനിച്ചതും കരാറിലെത്തിയതുമായ പ്രമുഖ സംവിധായകരുടെ ചിത്രങ്ങളിൽ നിന്നുപോലും തന്നെ അവസാന നിമിഷം ഒഴിവാക്കിയിട്ടുണ്ടെന്ന് താരം മൂവി വേൾഡ് മീഡിയയ്ക്ക് നൽകിയ അഭിമുഖത്തിൽ വെളിപ്പെടുത്തി.
സംവിധായകരായ ലാൽ ജോസ്, ജീത്തു ജോസഫ് എന്നിവരുടെ സിനിമകളിലടക്കം അവസരം ഉറപ്പിച്ച ശേഷമാണ് തന്നെ മാറ്റിനിർത്തിയത്. ചില ചിത്രങ്ങളിൽ നിന്നും മാറ്റിയ വിവരം ഷൂട്ടിംഗ് തുടങ്ങാൻ രണ്ടുദിവസം മാത്രം ബാക്കി നിൽക്കെ മാധ്യമങ്ങളിലൂടെയാണ് താൻ അറിഞ്ഞതെന്നും നടി വ്യക്തമാക്കി. തമിഴ് ഉൾപ്പെടെയുള്ള മറ്റു ഭാഷകളിൽ ഒരു നടിയെ നിശ്ചയിച്ചു കഴിഞ്ഞാൽ അവരുടെ ഡേറ്റിനായി കാത്തിരിക്കാറുണ്ട്. എന്നാൽ മലയാളത്തിൽ തനിക്ക് സൗകര്യമില്ലെന്ന് അറിയിച്ചാൽ ഉടൻ തന്നെ വേറെ നായികയെ കണ്ടെത്തുകയോ അല്ലെങ്കിൽ വ്യക്തിപരമായ ശുപാർശകളുടെ പേരിൽ പുതിയൊരാളെ കൊണ്ടുവരികയോ ആണ് ചെയ്യുന്നതെന്ന് ഇനിയ തുറന്നടിച്ചു.
തമിഴിലും മറ്റ് ഭാഷകളിലും മികച്ച കഥാപാത്രങ്ങൾ ലഭിച്ചിട്ടും സ്വന്തം മാതൃഭാഷയായ മലയാളം തന്നിലെ നടിയെ വേണ്ടവിധം ഉപയോഗപ്പെടുത്തിയില്ലെന്ന വിഷമവും താരം പങ്കുവെച്ചു. മറ്റു ഭാഷകളെ അപേക്ഷിച്ച് മലയാളത്തിൽ അവസരങ്ങൾ നിഷേധിക്കുന്ന തരത്തിലുള്ള ആഭ്യന്തര രാഷ്ട്രീയവും ശുപാർശകളും കുറച്ചുകൂടി കൂടുതലാണെന്നാണ് ഇനിയയുടെ സാക്ഷ്യപ്പെടുത്തൽ.
ഇനിയയുടെ വാക്കുകൾ
”മലയാള സിനിമ യൂസ് ചെയ്തിട്ടില്ലെന്ന് തോന്നിയിട്ടുണ്ട്. എന്നോട് ഒരുപാട് പേര്‍ പറഞ്ഞിട്ടുണ്ട്, ഇനിയയെ പോലെ അഭിനയിക്കുന്ന നടിയെ മലയാള സിനിമ വേണ്ട പോലെ ഉപയോഗിച്ചിട്ടില്ല എന്ന്. സുഹൃത്തുക്കളും പുറം രാജ്യങ്ങളില്‍ പോകുമ്പോഴും പ്രേക്ഷകരും പറഞ്ഞിട്ടുണ്ട്. മലയാളത്തില്‍ എപ്പോഴാണ് അടുത്ത പടം എന്നും എന്താണ് മലയാളത്തിലേക്ക് കൊണ്ടുവരാത്തത് എന്ന് ചോദിച്ചിട്ടുണ്ട്. മലയാളം എന്നെ ഉപയോഗിക്കുന്നില്ലെന്ന് അപ്പോള്‍ ഞാനും ചിന്തിക്കും.
ഞാന്‍ എപ്പോഴും ചെന്നൈയില്‍ ആയതിനാല്‍ എപ്പോഴും ഒരു ആര്‍ട്ടിസ്റ്റിനെ വിളിച്ചുവരുത്തി കഥ പറയാനൊക്കെയുള്ള ചെലവായിരിക്കാം ഒരു കാരണം. രണ്ട് ഇവിടുത്ത പൊളിറ്റിക്‌സ് ആണ്. എല്ലാ ഭാഷയിലും പൊളിറ്റിക്‌സും മത്സരവുമൊക്കെയുണ്ട്. പക്ഷെ ഇവിടെ കുറച്ച് കൂടുതലായിട്ടുണ്ട്. ഞാന്‍ മലയാളിയായിട്ട് അങ്ങനെ പറയാന്‍ പാടില്ല. അങ്ങനെ പറയേണ്ടി വരുന്നതില്‍ വിഷമമുണ്ട്.
ലാല്‍ ജോസ് സാറിന്റെ സിനിമയാണെങ്കിലും, ജീത്തു സാറിന്റെ സിനിമയാണെങ്കിലും, ഒരുപാട് വലിയ വലിയ സിനിമകളില്‍ കമ്മിറ്റ് ചെയ്തിട്ട് മാറ്റിയിട്ടുണ്ട്. അതിന്റെ കാരണം എന്താണെന്ന് പോലും എനിക്കറിയില്ല. അവര്‍ക്ക് അവരുടേതായ കാരണമുണ്ടാകാം. ചിലപ്പോള്‍ ഷെഡ്യൂള്‍ മാറ്റിയിട്ടുണ്ടാകും. ആ സമയത്ത് ഞാന്‍ തെലുങ്കിലേക്കും കന്നഡയിലേക്കും പോയിട്ടിട്ടുണ്ടാകാം. ബജറ്റ് സെറ്റായിട്ടുണ്ടാകില്ല.
തമിഴിലൊക്കെ ആണെങ്കില്‍ ഒരു ആര്‍ട്ടിസ്റ്റിനെ തീരുമാനിച്ചു കഴിഞ്ഞാല്‍ ഡേറ്റിന് വേണ്ടി കാത്തിരിക്കും. പക്ഷെ ഇവിടെ മലയാളത്തില്‍ അങ്ങനെയല്ല. അവര്‍ക്ക് തിരക്കാണെന്ന് പറഞ്ഞാല്‍ മാറ്റി വേറെ നായികയെ വെക്കും. അല്ലെങ്കില്‍ റെക്കമെന്റേഷനില്‍ പുതിയ ആളെ കൊണ്ടു വരും. നമ്മള്‍ പോലും അറിയാതെ. ഏതോ ഒന്ന് രണ്ട് സിനിമകളിലൊക്കെ, ഷൂട്ടിങ് മറ്റന്നാള്‍ ആരംഭിക്കാനിരിക്കുമ്പോള്‍ ഞാന്‍ ആ സിനിമയില്‍ ഇല്ല എന്നത് പത്രത്തില്‍ വാര്‍ത്ത കണ്ടിട്ടാണ് ഞാന്‍ അറിയുന്നത് തന്നെ. മലയാളത്തില്‍ അങ്ങനെ കുറേ അനുഭവങ്ങളുണ്ടായിട്ടുണ്ട്.”