ഇടിപ്പിന് പരിക്ക് പറ്റി വിശ്രമത്തിലിരിക്കുന്ന അവസ്ഥയിലുള്ള ദിവസങ്ങളെ കുറിച്ച് കുറിപ്പ് പങ്കുവെച്ച് നടി രശ്മിക മന്ദാന. ഒരു ഡയറിയില് കുറിക്കുന്നത് പോലെയാണ് രശ്മിക ഇന്സ്റ്റഗ്രാം സ്റ്റോറി പങ്കുവച്ചിരിയ്ക്കുന്നത്. ഇപ്പോൾ കുടുംബത്തിനൊപ്പം സമയം ചെലവഴിക്കാനുള്ള അവസരം കിട്ടുന്നുണ്ടെന്നും, ഇടയ്ക്കൊക്കെ ജീവിതത്തിന്റെ വേഗത കുറയ്ക്കുന്നത് അത്ര വലിയ തെറ്റൊന്നുമല്ലയെന്നും രശ്മിക പറഞ്ഞു.
രശ്മികയുടെ കുറിപ്പിന്റെ പൂർണരൂപം;
“പ്രിയപ്പെട്ട ഡയറി, ഞാന് എവിടെ നിന്നാണ് തുടങ്ങേണ്ടത്. എന്റെ ദിവസങ്ങള് നന്നായി പോകുന്നു. നല്ല ഉറക്കവും വിശ്രമവും പസില്സും കുറച്ച് വായനയും ഷോകള് കണ്ടും, വളരെ അത്യാവശ്യമായ സ്കിന് കെയറും ഹെയര് കെയറുമൊക്കെയായി അങ്ങനെ.. അതിനൊപ്പം കുറച്ചു മീറ്റിങ്ങുകള് അറ്റന്റ് ചെയ്യുന്നുണ്ട്, കുടുംബത്തിനൊപ്പം സമയം ചെലവഴിക്കാനുള്ള അവസരവും കിട്ടുന്നു. കല്യാണത്തിന്റെ വീഡിയോകളും ഫോട്ടോകളുമൊക്കെ നോക്കുകയായിരുന്നു. കാരണം ഇതുവരെ അതൊക്കെ ആസ്വദിച്ച് കാണാനുള്ള ശരിയായ സമയം എനിക്ക് കിട്ടിയിരുന്നില്ല.
എന്റെ ദിവസങ്ങള് ഏകദേശം, ഉണരുക.. അതും അലാറം വിളിച്ചെഴുന്നേല്പ്പിക്കുമ്പോഴല്ല.. എപ്പോഴാണോ എന്റെ ശരീരം എഴുന്നേല്ക്കാന് ആവശ്യപ്പെടുന്നത് അപ്പോള് മാത്രം. ഭക്ഷണം അമിതമാവാതിരിക്കാന് രണ്ട് നേരം മാത്രം കഴിക്കാന് വളരെ അധികം പാടുപെട്ട് ശ്രമിക്കുകയാണ്. മീറ്റിങുകള് അറ്റന്റ് ചെയ്യുന്നു. ഔറ തയ്യാറാണെങ്കില് അവള്ക്കൊപ്പം പസില്സ് കളിക്കുന്നു, വായിക്കുന്നു. കുറച്ച് നേരം എന്തെങ്കിലും ഷോകള് കാണും, അതിന് ശേഷം ഉറങ്ങാന് പോകുന്നു. ഇടയ്ക്കൊക്കെ ജീവിതത്തിന്റെ വേഗത കുറയ്ക്കുന്നത് അത്ര വലിയ തെറ്റൊന്നുമല്ല അല്ലേ-“
മൈസ എന്ന ചിത്ത്രതിന്റെ ഷൂട്ടിങ് സമയത്താണ് രശ്മികക്ക് ഇടിപ്പിന് പരിക്ക് സംഭവിച്ചത്. അതിനെ തുടര്ന്നുള്ള വിശ്രമത്തിലാണ് ഇപ്പോള് നടി. ശരീരത്തെ ഒരു യന്ത്രമായി കണ്ട തന്റെ രീതിയ്ക്ക് ദൈവം തന്ന ഒരു വിശ്രമ സമയമാണ് ഇതെന്നാണ് രശ്മിക മന്ദാന നേരത്തെ ഒരു പോസ്റ്റില് പറഞ്ഞിരുന്നത്. ഇപ്പോള് ഒരു ഡയറിയില് കുറിക്കുന്നത് പോലെയാണ് രശ്മിക ഇന്സ്റ്റഗ്രാം സ്റ്റോറി പങ്കുവച്ചിരിയ്ക്കുന്നത്.
ഷൂട്ടിങിന് ഇടയില് തുടര്ച്ചയായി മൂന്നാം തവണയാണ് തനിക്ക് ഇത്തരത്തിലുള്ള അപകടങ്ങള് സംഭവിക്കുന്നത് എന്നാണ് രശ്മിക പറയുന്നത്. ഇടുപ്പിനെ കാലുകളുമായി ബന്ധിപ്പിക്കുന്ന നാല് ടെന്ഡനുകളില് ഒരെണ്ണം അടര്ന്ന് മാറിയതിനെ തുടര്ന്നാണ് ഇപ്പോള് രശ്മിക ചികിത്സയില് കഴിയുന്നത്. വേദനയുണ്ടായിരുന്നു, പക്ഷേ ഇപ്പോള് സുഖപ്പെട്ടു വരുന്നു. അധികം വൈകാതെ തിരിച്ചെത്തുമെന്ന് നടി ആരാധകര്ക്ക് വാക്ക് നല്കുന്നു.