ജയറാമുമായുള്ള അകൽച്ചയെക്കുറിച്ചും നടി ഉർവശിയുടെ സമീപകാല പരാമർശങ്ങളെക്കുറിച്ചും തുറന്നു സംസാരിച്ച് സംവിധായകൻ രാജസേനൻ. കഥയിലെ അനാവശ്യ ഇടപെടലുകളാണ് ജയറാമുമായുള്ള അകൽച്ചയ്ക്ക് കാരണമായതെന്ന് വെളിപ്പെടുത്തിയ അദ്ദേഹം, ഒരുമിച്ച് വീണ്ടും സിനിമ ചെയ്യാനുള്ള സാധ്യതയും തള്ളിക്കളയുന്നില്ല. ഒപ്പം, ‘മധുചന്ദ്രലേഖ’ എന്ന ചിത്രത്തെക്കുറിച്ചുള്ള ഉർവശിയുടെ പ്രസ്താവനയ്ക്കും രാജസേനൻ മറുപടി നൽകി.
മൂവി വേൾഡ് മീഡിയക്ക് നൽകിയ പ്രത്യേക അഭിമുഖത്തിലാണ് രാജസേനൻ സിനിമയ്ക്കുള്ളിലെ ഈ തുറന്നുപറച്ചിലുകൾ നടത്തിയത്. മുൻകാലങ്ങളിൽ ഫോണിലൂടെ കേൾക്കുന്ന ചുരുങ്ങിയ വാക്കുകളിൽ വിശ്വസിച്ച് ലൊക്കേഷനിലെത്തി മാത്രം തിരക്കഥ വായിച്ചിരുന്ന ജയറാം, പിൽക്കാലത്ത് കഥകളിൽ ഇടപെടാൻ തുടങ്ങിയതാണ് പ്രശ്നങ്ങൾക്ക് തുടക്കമിട്ടതെന്ന് രാജസേനൻ വ്യക്തമാക്കുന്നു. കഥയിൽ ഇടപെടാൻ ജയറാമിന് അറിയില്ലെന്നും, എന്നാൽ ദിലീപിന് അതിനുള്ള കഴിവുണ്ടെന്നും അദ്ദേഹം കൂട്ടിച്ചേർത്തു. ‘മധുചന്ദ്രലേഖ’, ‘കനകസിംഹാസനം’ എന്നീ ചിത്രങ്ങൾക്ക് ശേഷം പ്ലാൻ ചെയ്ത സിനിമയുടെ ഘട്ടത്തിലാണ് തർക്കമുണ്ടായത്. മുൻപത്തെപ്പോലെയല്ല കാര്യങ്ങളെന്ന് രാജസേനൻ ചൂണ്ടിക്കാണിച്ചപ്പോൾ, ഇനി അങ്ങനെയൊക്കെ മതിയെന്ന നിലപാടാണ് ജയറാം സ്വീകരിച്ചത്. ഇതോടെ താൻ പിന്മാറുകയായിരുന്നുവെന്നും വഴക്കിട്ടല്ല, പരസ്പര സ്നേഹത്തോടെയാണ് അന്ന് പിരിഞ്ഞതെന്നും അദ്ദേഹം ഓർത്തെടുത്തു. തങ്ങൾക്കിടയിലെ പ്രശ്നങ്ങൾ വഷളാക്കാൻ ചിലർ ശ്രമിച്ചതായും, തന്റെ മകളുടെ വിവാഹത്തിന് വരാത്ത ജയറാമിനെ മക്കളുടെ വിവാഹത്തിന് താൻ പ്രതീക്ഷിച്ചില്ലെന്നും രാജസേനൻ പറഞ്ഞു. എങ്കിലും, ജയറാം മുൻകൈ എടുത്താൽ ഭാവിയിൽ ഒരു ഒത്തുചേരലിന് സാധ്യതയുണ്ടെന്ന സൂചനയും അദ്ദേഹം നൽകുന്നുണ്ട്.
അതേസമയം, ഇതേ അഭിമുഖത്തിൽ നടി ഉർവശി ‘മധുചന്ദ്രലേഖ’ എന്ന സിനിമയെക്കുറിച്ച് നടത്തിയ പരാമർശങ്ങൾക്കും രാജസേനൻ മറുപടി നൽകി. തനിക്ക് അഞ്ചാമത് സംസ്ഥാന അവാർഡ് നേടിത്തന്നതും വലിയ ജനപ്രീതി ലഭിച്ചതുമായ ‘മധുചന്ദ്രലേഖ’ താൻ ഒട്ടും ഇഷ്ടപ്പെടാതെ ചെയ്ത സിനിമയാണെന്നായിരുന്നു ഉർവശിയുടെ പ്രസ്താവന. ഭർത്താവിനെ മറ്റൊരു പെൺകുട്ടിക്ക് വിട്ടുകൊടുക്കുന്ന കഥാപാത്രത്തെ ഉൾക്കൊള്ളാൻ കഴിഞ്ഞിരുന്നില്ലെന്നും, ജയറാമിന്റെയും ഭാര്യയുടെയും നിർബന്ധത്തിന് വഴങ്ങിയാണ് സിനിമ ചെയ്തതെന്നുമാണ് ഉർവശി പറഞ്ഞിരുന്നത്. എന്നാൽ, ഈ കഥ കേട്ട് സംശയങ്ങളുണ്ടായിരുന്ന ഉർവശി തന്നെ ഫോണിൽ വിളിച്ചിരുന്നതായും, നേരിട്ട് കണ്ട് വൺലൈൻ കഥ വിവരിച്ചപ്പോൾ കൺഫ്യൂഷൻ മാറി സന്തോഷത്തോടെയാണ് സിനിമ ഏറ്റെടുത്തതെന്നും രാജസേനൻ വിശദീകരിച്ചു. ഉർവശിയുടെ പ്രസ്താവനയ്ക്കെതിരെ സോഷ്യൽ മീഡിയയിൽ വന്ന ട്രോളുകൾ താൻ കണ്ടിരുന്നുവെന്നും, എന്നാൽ ഇത്തരം കാര്യങ്ങൾക്ക് മറുപടി നൽകി സമയം കളയാൻ താല്പര്യമില്ലെന്നും രാജസേനൻ വ്യക്തമാക്കി.