സമൂഹത്തിൽ വർധിച്ചുവരുന്ന സാമൂഹികമര്യാദയില്ലാത്ത പെരുമാറ്റങ്ങൾക്കെതിരെയും സ്വകാര്യതാലംഘനങ്ങൾക്കെതിരെയും നടി മഞ്ജു വാരിയർ. സിനിമാ താരങ്ങളായ സലിംകുമാറിന്റെയും ഭാഗ്യരാജിന്റെയും മരണാനന്തര ചടങ്ങുകൾക്കിടെ ചിലരിൽ നിന്നുണ്ടായ അവസരോചിതമല്ലാത്ത പെരുമാറ്റങ്ങളെ ചൂണ്ടിക്കാണിച്ചായിരുന്നു താരത്തിന്റെ വിമർശനം. ഉന്നതവിജയം നേടിയ വിദ്യാർഥികൾക്കായി ഹൈബി ഈഡൻ എം.പി. സംഘടിപ്പിച്ച അവാർഡുവിതരണച്ചടങ്ങിൽ സംസാരിക്കുകയായിരുന്നു അവർ.
നമ്മൾ എവിടെ നിൽക്കുന്നുവെന്നും ഏത് അവസരത്തിലാണ് നിൽക്കുന്നതെന്നും, അവിടെ സ്വയം പാലിക്കേണ്ട നിയന്ത്രണങ്ങൾ എന്തൊക്കെയാണെന്നും ഓരോരുത്തർക്കും കൃത്യമായ ബോധ്യമുണ്ടാകണമെന്ന് മഞ്ജു വാരിയർ ഓർമ്മിപ്പിച്ചു. വിദേശരാജ്യങ്ങളിൽ ഒരാളുടെ ചിത്രം പകർത്തുന്നത് പോലും കൃത്യമായ അനുമതി ചോദിച്ച ശേഷമാണെന്നും, എല്ലാവരുടെയും സ്വകാര്യത മാനിക്കപ്പെടേണ്ടതാണെന്ന അവബോധം നമുക്കുണ്ടാകണമെന്നും താരം വ്യക്തമാക്കി. കേവലം പുസ്തകങ്ങളിൽ മാത്രം ഒതുങ്ങേണ്ട ഒന്നല്ല പൗരബോധമെന്നും, അത് സ്വന്തം ജീവിതത്തിൽ പ്രാവർത്തികമാക്കുമെന്ന ദൃഢതീരുമാനം വിദ്യാർഥികൾ കൈക്കൊള്ളണമെന്നും മഞ്ജു വാര്യർ കൂട്ടിച്ചേർത്തു.