ബോളിവുഡ് നടി ബിപാഷ ബസുവിനെതിരെ ബോഡി ഷെയ്മിങ് നടത്തിയതിൽ ഖേദം പ്രകടിപ്പിച്ച് തെന്നിന്ത്യൻ നടി മൃണാൾ താക്കൂർ. ‘പുരുഷനെപ്പോലെ മസിലുള്ള’ സ്ത്രീയാണ് ബിപാഷ ബസു എന്നായിരുന്നു മൃണാള് പറഞ്ഞിരുന്നത്. തന്റെ സമൂഹമാധ്യമ പേജിലൂടെ പങ്കുവെച്ച കുറിപ്പിലാണ് താരം ഖേദം പ്രകടിപ്പിച്ചിരിക്കുന്നത്.
’19-ാം വയസ്സില് ഒരുപാട് വിഡ്ഢിത്തങ്ങള് പറഞ്ഞിട്ടുണ്ട്. ഞാൻ പറയുന്ന വാക്കുകളുടെ ഗൗരവമോ, തമാശയ്ക്ക് പറയുന്ന കാര്യങ്ങൾ എത്രമാത്രം മറ്റുള്ളവരെ വേദനിപ്പിക്കുമെന്നോ പലപ്പോഴും മനസിലാക്കിയിരുന്നില്ല. ഇപ്പോൾ, ആ വാക്കുകള് വേദനിപ്പിച്ചു എന്നതില് ഞാന് ഖേദിക്കുന്നു. ആരേയും ബോഡിഷെയിം ചെയ്യുക എന്നത് എന്റെ ഉദ്ദേശമായിരുന്നില്ല. മൃണാൾ താക്കൂർ കുറിച്ചു.
‘അഭിമുഖത്തിലെ തമാശ അതിരുകടന്നുപോയതാണ്. എന്നാല്, അത് എങ്ങനെയാണ് വ്യാഖ്യാനിക്കപ്പെട്ടതെന്ന് എനിക്ക് മനസിലാക്കാനാകും. വാക്കുകള് തിരഞ്ഞെടുക്കുമ്പോള് കുറച്ചുകൂടി ശ്രദ്ധിക്കണമായിരുന്നുവെന്ന് ഞാനിപ്പോള് ആത്മാര്ഥമായി ആഗ്രഹിക്കുന്നു. എല്ലാരൂപത്തിലും സൗന്ദര്യമുണ്ടെന്ന് ഞാന് കാലംകൊണ്ട് തിരിച്ചറിയുന്നു’, മൃണാള് താക്കൂര് കൂട്ടിച്ചേർത്തു.
‘സുന്ദരികളായ സ്ത്രീകളേ, നിങ്ങളും മസിലുകള് ഉണ്ടാക്കൂ. നമ്മള് ശക്തരായിരിക്കണം. ശാരീരികവും മാനസികവുമായ ആരോഗ്യം എന്നേക്കും നിലനിര്ത്താന് മസിലുകള് സഹായിക്കും. സ്ത്രീകള് കരുത്തരായോ ശാരീരികമായി ശക്തരായോ കാണപ്പെടരുതെന്നുള്ള പഴഞ്ചന് ചിന്താഗതിയേ തകര്ക്കൂ’, എന്നായിരുന്നു ബിപാഷ സംഭവത്തോട് പ്രതികരിച്ചിരുന്നത്.