“പച്ച പനം തത്തേ.. പുന്നാര പൂമുത്തെ… പുന്നെല്ലിൻ പൂങ്കരളേ”. മലയാള തനിമയോടേറ്റവും ചേർന്ന് നിൽക്കുന്നൊരു ഗാനം. ആ ഗാനത്തിനതിലും മനോഹരമായി ചേർന്നാടിയൊരു നാടൻ പെൺകുട്ടി. ചിത്രം ശ്രദ്ധിക്കപ്പെട്ടില്ലെങ്കിലും നായികയും, നായികയുടെ പ്രകടനവും മലയാളികൾ ഏറ്റെടുത്തു. 2004-ൽ ലാൽ ജോസിൻ്റെ ‘രസികൻ’ എന്ന ചിത്രത്തിലൂടെ ദിലീപിന്റെ നായികയായി അരങ്ങേറിയ അതേ പെൺകുട്ടി. ഗ്ലാമർ വേഷങ്ങളോട് മുഖം തിരിഞ്ഞു നിന്ന, നായികാ പ്രാധാന്യമുളള കഥാപാത്രങ്ങളോട് ശാഠ്യം പിടിക്കാത്ത നിഷ്കളങ്കമായ അഭിനയത്രി. മലയാളത്തിന്റെ ഭാഗ്യ നായികയെന്ന് പിൽക്കാലത്ത് സിനിമ ലോകവും പ്രേക്ഷകരും ഒരുപോലെ സമ്മതിച്ച ‘സംവൃത സുനിൽ’. ചേർന്ന് നിന്ന ഓരോ നായകനോടും അസാധ്യമായ കെമിസ്ട്രി വർക്ഔട്ട് ആക്കിയ നായിക. സിനിമയുടെ വെള്ളിവെളിച്ചത്തിൽ വെറും 8 വർഷക്കാലം കൊണ്ട് അവർ നേടിയെടുത്ത ആരാധക വൃന്ദം ഇന്നും എത്രയോ നടിമാർക്ക് സ്വപ്നമാണ്. ഇന്ന് ജന്മദിനമാഘോഷിക്കുന്ന സംവൃതക്ക് സെല്ലുലോയ്ഡിന്റെ ഹൃദയം നിറഞ്ഞ ജന്മദിനാശംസകൾ.
കണ്ണൂർ സെന്റ് തെരേസാസ് ആംഗ്ലോ ഇന്ത്യൻ ഹയർ സെക്കൻഡറി സ്കൂളിലെ പഠനത്തിനു ശേഷം എറണാകുളം സെന്റ് തെരേസാസ് കോളേജിൽ നിന്നാണ് സംവൃത ഉന്നത വിദ്യാഭ്യാസം പൂർത്തിയാക്കിയത്. ചെറുപ്പത്തിലേ കലാരംഗത്ത് താല്പര്യം കാണിച്ചിരുന്ന സംവൃതയെ സിനിമയിലേക്ക് ആനയിക്കുന്നത് സംവിധായകൻ ലാൽ ജോസാണ്. 2004-ൽ പുറത്തിറങ്ങിയ രസികൻ എന്ന ചിത്രത്തിലെ തങ്കപ്പന്റെ പാർവ്വതി അഥവാ തങ്കിയായി എത്തി പ്രേക്ഷകശ്രദ്ധ പിടിച്ചുപറ്റിയ സംവൃത, പിന്നീട് തിരിഞ്ഞുനോക്കേണ്ടി വന്നിട്ടില്ല. തുടർന്ന് ചന്ദ്രോത്സവത്തിൽ മോഹൻലാലിനൊപ്പവും, നേരറിയാൻ സി.ബി.ഐയിൽ മമ്മൂട്ടിക്കൊപ്പവും വേഷമിട്ടുകൊണ്ട് മലയാളത്തിലെ മഹാരഥന്മാരായ അഭിനേതാക്കളുടെ കൂടെ തന്റെ കരിയറിന്റെ തുടക്കത്തിൽ തന്നെ സാന്നിധ്യമറിയിക്കാൻ അവർക്ക് സാധിച്ചു. അച്ഛനുറങ്ങാത്ത വീട്, നോട്ടം, മൂന്നാമതൊരാൾ, വാസ്തവം, പുലിജന്മം തുടങ്ങിയ ചിത്രങ്ങളിലൂടെ വൈവിധ്യമുള്ള കഥാപാത്രങ്ങളെ അവതരിപ്പിക്കാൻ അവർക്ക് അവസരം ലഭിച്ചു. ഓരോ സിനിമ കഴിയുന്തോറും അഭിനയത്തിൽ വരുത്തിയ പുരോഗതിയും പക്വതയും സംവൃതയെ കൂടുതൽ ജനപ്രിയയാക്കി മാറ്റുകയായിരുന്നു.
ദിലീപിനും, മോഹൻലാലിനും, പൃഥ്വിരാജിനും, ഉണ്ണിമുകുന്ദനും, ഫഹദിന് വരെ സംവൃത നായികയായി. തിരഞ്ഞെടുക്കുന്ന ഓരോ കഥാപാത്രങ്ങൾക്കും തൊട്ടടുത്ത വീട്ടിലെ കുട്ടിയുടെ മുഖസാദൃശം കൊണ്ട് വരുന്നതിൽ സംവൃത മറ്റാരേക്കാളും നന്നായി വിജയിച്ചിട്ടുണ്ട്. തൊണ്ണൂറുകളുടെ അവസാനത്തിലും രണ്ടായിരങ്ങളുടെ തുടക്കത്തിലും മലയാള സിനിമ കണ്ട ഏറ്റവും ജനപ്രിയ കൂട്ടുകെട്ടുകളിൽ ഒന്നായിരുന്നു പൃഥ്വിരാജും സംവൃത സുനിലും. ചോക്ലേറ്റ്, മിന്നാമിന്നിക്കൂട്ടം, തിരക്കഥ, റോബിൻഹുഡ്, നീലത്താമര, മാണിക്യക്കല്ല്, സ്വപ്നസഞ്ചാരി തുടങ്ങി ഒട്ടനവധി ചിത്രങ്ങളിൽ ഇരുവരും ഒന്നിച്ചെത്തുകയും ആ ചിത്രങ്ങളെല്ലാം പ്രേക്ഷകർ ഇരുകൈയും നീട്ടി സ്വീകരിക്കുകയും ചെയ്തു. പ്രത്യേകിച്ച് ചോക്ലേറ്റ് എന്ന ചിത്രത്തിലെ നന്ദന എന്ന കഥാപാത്രവും തിരക്കഥയിലെ ദേവയാനിയും പ്രേക്ഷകമനസ്സിൽ ഇന്നും തിളങ്ങിനിൽക്കുന്നവയാണ്. അറബിക്കഥയിൽ ശ്രീനിവാസനോടൊപ്പം അവർ അവതരിപ്പിച്ച കഥാപാത്രവും ഏറെ പ്രശംസ പിടിച്ചുപറ്റി. കോക്ടെയിൽ, ഹാപ്പി ഹസ്ബന്റ്സ്, വൈരം, നീലത്താമര, ഗ്രാമം, അയാളും ഞാനും തമ്മിൽ, ഡയമണ്ട് നെക്ലേസ്, മല്ലുസിംഗ് തുടങ്ങിയ സിനിമകളിലെല്ലാം വ്യത്യസ്തമായ ഭാവങ്ങളുള്ള കഥാപാത്രങ്ങളെയാണ് സംവൃത അവതരിപ്പിച്ചത്. ഡയമണ്ട് നെക്ലേസിലെ മായ എന്ന കഥാപാത്രവും അയാളും ഞാനും തമ്മിലിലെ സൈനുവും സംവൃതയുടെ അഭിനയ ജീവിതത്തിലെ എടുത്തുപറയേണ്ട നാഴികക്കല്ലുകളാണ്.
തന്റെ കരിയറിന്റെ ഏറ്റവും ഉന്നതിയിൽ നിൽക്കുമ്പോഴായിരുന്നു സംവൃതയുടെ വിവാഹം. 2012-ൽ അമേരിക്കയിൽ എൻജിനീയറായ അഖിൽ ജയരാജുമായുള്ള വിവാഹത്തോടെ അവർ സിനിമയിൽ നിന്നും താത്കാലികമായി ഒരു ഇടവേള എടുത്തു. കുടുംബജീവിതത്തിനും വ്യക്തിപരമായ ആഗ്രഹങ്ങൾക്കും മുൻഗണന നൽകിക്കൊണ്ട് കരിയറിലെ തിളക്കമുള്ള സമയത്ത് പോലും സിനിമയോട് ഗുഡ്‌ബൈ പറയാൻ കാണിച്ച ആർജ്ജവം സംവൃത എന്ന വ്യക്തിയുടെ പ്രത്യേകതയാണ്. സിനിമയിൽ നിന്നും വിട്ടുനിന്നെങ്കിലും ആരാധകരുടെ മനസ്സിൽ നിന്നും സംവൃത ഒരിക്കലും ഇറങ്ങിപ്പോയിരുന്നില്ല. തുടർന്ന് വർഷങ്ങൾക്ക് ശേഷം ഒരു ജനപ്രിയ ടെലിവിഷൻ റിയാലിറ്റി ഷോയിലൂടെ വിധികർത്താവായി തിരിച്ചെത്തിയ സംവൃതയെ മലയാളി പ്രേക്ഷകർ വൻ വരവേൽപ്പോടെയാണ് സ്വീകരിച്ചത്. പിന്നീട് 2019-ൽ ബിജു മേനോൻ നായകനായ സത്യം പറഞ്ഞാ വിശ്വസിക്കുവോ എന്ന ചിത്രത്തിലൂടെ അവർ വീണ്ടും വെള്ളിത്തിരയിലേക്ക് ശക്തമായ തിരിച്ചുവരവ് നടത്തി. ഏറെ കാലത്തെ ഇടവേളയ്ക്ക് ശേഷവും അവരുടെ അഭിനയത്തിൽ തെല്ലും മാറ്റം വന്നിട്ടില്ലെന്ന് ഈ ചിത്രം തെളിയിച്ചു.
സംവൃത സുനിൽ തന്റെ കരിയറിൽ നിരവധി അവാർഡുകൾക്കും നാമനിർദ്ദേശങ്ങൾക്കും അർഹയായി. മിന്നാമിന്നിക്കൂട്ടം എന്ന ചിത്രത്തിനുള്ള ഏഷ്യാനെറ്റ് ഫിലിം അവാർഡ് ഉൾപ്പെടെ, നിരവധി ഫിലിംഫെയർ നാമനിർദ്ദേശങ്ങൾ അവൾ സ്വന്തമാക്കി. മികച്ച സഹനടിക്കുള്ളതും മികച്ച നടിക്കുള്ളതുമായ വിഭാഗങ്ങളിൽ അവളുടെ പേര് പലവട്ടം പ്രത്യക്ഷപ്പെട്ടു. 2012-ൽ അവൾ മലയാളത്തിലെ ടോപ്പ് സ്റ്റാർ (ഫീമെയിൽ) ആയി തിരഞ്ഞെടുത്തതും അവളുടെ ജനപ്രിയതയുടെ തെളിവാണ്.
നിലവിൽ അമേരിക്കയിൽ ഭർത്താവിനും അഗസ്ത്യ, രുദ്ര എന്നീ രണ്ട് മക്കൾക്കുമൊപ്പം സന്തോഷകരമായ കുടുംബജീവിതം നയിക്കുകയാണ് സംവൃത. സോഷ്യൽ മീഡിയയിലൂടെ തന്റെ കുഞ്ഞു വിശേഷങ്ങളും യാത്രാചിത്രങ്ങളും കുടുംബത്തോടൊപ്പമുള്ള സന്തോഷനിമിഷങ്ങളും അവർ ആരാധകരുമായി പങ്കുവെക്കാറുണ്ട്. മലയാള സിനിമയിൽ എത്രയോ നായികമാർ വന്നുപോയിട്ടുണ്ടെങ്കിലും, സംവൃതയോടുള്ള മലയാളികളുടെ സ്നേഹത്തിന് ഇന്നും യാതൊരു കുറവും വന്നിട്ടില്ല. അവരുടെ നിഷ്കളങ്കമായ പുഞ്ചിരിയും സ്വാഭാവിക ശൈലിയും ഒരുകാലത്ത് മലയാള സിനിമയ്ക്ക് നൽകിയ ഭംഗി വളരെ വലുതാണ്. വീണ്ടും സിനിമയിലേക്ക് തിരിച്ചെത്തണമെന്നും നല്ല നല്ല കഥാപാത്രങ്ങളിലൂടെ ഞങ്ങളെ സന്തോഷിപ്പിക്കണമെന്നുമാണ് ഓരോ സിനിമാപ്രേമിയുടെയും ആഗ്രഹം. ഈ മനോഹരമായ ജന്മദിനത്തിൽ പ്രിയപ്പെട്ട സംവൃത സുനിലിന് ആയുരാരോഗ്യ സൗഖ്യങ്ങളും സകലവിധ ഐശ്വര്യങ്ങളും നിറഞ്ഞ പിറന്നാൾ ആശംസകൾ നേരുന്നു. ഇനി വരാനിരിക്കുന്ന നാളുകളിൽ കൂടുതൽ നല്ല കഥാപാത്രങ്ങളിലൂടെ മലയാള സിനിമയിൽ വീണ്ടും തിളങ്ങാൻ അവർക്ക് സാധിക്കട്ടെ എന്ന് ഹൃദയപൂർവ്വം ആശംസിക്കുന്നു.
സംവൃതയുടെ അഭിനയത്തിൽ എപ്പോഴും ഒരു ശാന്തതയുണ്ടായിരുന്നു, അത് കഥാപാത്രങ്ങളെ യാഥാർത്ഥ്യത്തിൽ നിന്ന് പറിച്ചെടുത്തതുപോലെ തോന്നിപ്പിക്കും. വളരെ ചെറിയ കാലയളവിനുള്ളിൽ തൊട്ടടുത്ത വീട്ടിൽ താമസിക്കാൻ വന്നൊരു വിരുന്നു കാരിയെപോലെ അവർ കടന്നു വരികയും, യാത്ര പറഞ്ഞ് പോവുകയും ചെയ്തു. അതിനിടയിൽ അവർ മനോഹരമാക്കിയ ഒരു പിടി നല്ല കഥാപാത്രങ്ങൾ, ദിലീപ് മുതൽ ഉണ്ണി മുകുന്ദൻ വരെ അവരനശ്വരമാക്കിയ ജോഡി പൊരുത്തം. മലയാള സിനിമയുടെ നായികമാരുടെ പേരെടുത്ത് പറയാൻ പറഞ്ഞാൽ മലയാളികളെന്നും അതെ ഇഷ്ടത്തോടെ ചേർത്തുവെക്കുമെന്നുറപ്പുള്ള നായിക. മലയാളത്തിന്റെ പ്രിയപ്പെട്ട നായികയ്ക്ക് ഒരിക്കൽ കൂടി ഹൃദയം നിറഞ്ഞ ജന്മദിനാശംസകൾ.