മലയാള സിനിമയുടെ ചരിത്രത്തിൽ ചില പേരുകൾ കാലാതീതമാണ്. തലമുറകൾ കടന്നുപോയാലും, സിനിമയുടെ തിരശ്ശീലകൾ മാറിക്കഴിഞ്ഞാലും, ആ പേരുകൾ എന്നും മലയാളികളുടെ ഹൃദയങ്ങളിൽ തെളിഞ്ഞുനിൽക്കും. അത്തരത്തിലുള്ള അപൂർവ സാന്നിധ്യമാണ് മധു. മലയാള സിനിമയുടെ ‘എക്കാലത്തെയും നായകൻ’. ആറു പതിറ്റാണ്ടിലേറെ അഭിനയത്തിന്റെ വൈവിധ്യം കൊണ്ടും, സർഗ്ഗ സംഭാവന കൊണ്ടും മലയാള സിനിമയെ അനശ്വരമാക്കിയ നടൻ. മലയാളത്തിന്റെ കാരണവർക്ക് ഇന്ന് 93 ആം പിറന്നാളാണ്. പ്രസരിപ്പുള്ള യുവാവായും, കടുപ്പമുള്ള അച്ഛനായും, വാത്സല്യമുള്ള മുത്തച്ഛനായും നിറഞ്ഞു നിന്ന മധുവിന് പ്രേക്ഷക മനസ്സിൽ ഇന്നും യവ്വനമാണ്, കഴുത്തിൽ തൂവാല കെട്ടി, വിഷാദ ചുവയുള്ള കണ്ണുകളിൽ നഷ്ട പ്രണയത്തെ പുൽകി, “മനസാ മൈനേ” പാടി കടലിനെ കരയിച്ച ‘പരീകുട്ടിയാണ്’, ‘കറുത്തമ്മയുടെ പരീക്കുട്ടി’. മലയാളത്തിന്റെ പ്രിയപ്പെട്ട മുത്തച്ഛൻ മധുവിന് സെല്ലുലോയ്ഡിന്റെ ഹൃദയം നിറഞ്ഞ ജന്മദിനാശംസകൾ.
സംഭാവനകളെ സ്മരിക്കുക എന്നത് ഓരോ മലയാളിയുടെയും കടമയാണ്. തിളക്കമുള്ള താരപ്പൊലിമകൾക്കപ്പുറം, തന്റെ തനതായ അഭിനയശൈലികൊണ്ടും വ്യക്തിപ്രഭാവം കൊണ്ടും മലയാളിയുടെ ഭാവുകത്വത്തെ ദീർഘകാലം സ്വാധീനിച്ച മഹാപ്രതിഭയാണ് മധു.
മാധവൻ നായർ എന്ന മധുവിന്റെ ജനനവും ബാല്യവും തിരുവനന്തപുരത്തായിരുന്നു. കലയോടുള്ള അടങ്ങാത്ത അഭിനിവേശം അദ്ദേഹത്തെ ആദ്യം എത്തിച്ചത് നാടകവേദിയിലേക്കാണ്. പിന്നീട് സിനിമയിലേക്ക് ചുവടുമാറിയ അദ്ദേഹം മലയാള സിനിമയുടെ സുവർണ്ണകാലഘട്ടത്തിന് അടിത്തറയിട്ടവരിൽ പ്രധാനിയായി മാറി. തിരുവിതാംകൂർ സർവ്വകലാശാലയിൽ നിന്ന് മാസ്റ്റർ ബിരുദം നേടിയ ശേഷം കുറച്ചുകാലം അധ്യാപകനായി ജോലി ചെയ്ത ശേഷമാണ് അദ്ദേഹം സിനിമയിലേക്ക് വരുന്നത്. അധ്യാപകനായിരുന്ന ആ പശ്ചാത്തലം അദ്ദേഹത്തിന്റെ വാക്കുകളിലും പെരുമാറ്റത്തിലും എക്കാലത്തും ഒരു ഗൗരവവും സംയമനവും നിലനിർത്തിയിരുന്നു.
ആ കാലഘട്ടത്തിൽ മലയാള സിനിമയിലെ പ്രധാന താരങ്ങൾ സത്യൻ, പ്രേം നസീർ എന്നിവരായിരുന്നു. എങ്കിലും 1963-ൽ റിലീസ് ചെയ്ത “നിണമണിഞ്ഞ കാൽപ്പാടുകൾ” എന്ന ചിത്രത്തിലൂടെ മധു സിനിമയിൽ അരങ്ങേറ്റം കുറിച്ചപ്പോൾ തന്നെ, അദ്ദേഹത്തിന്റെ പ്രകടനം വ്യത്യസ്തതയാർന്ന ഒന്നായി ശ്രദ്ധിക്കപ്പെട്ടു. പിന്നീട് വന്ന മൂടുപടവും ഭാർഗവീനിലയവും അദ്ദേഹത്തിന് വലിയ വഴിത്തിരിവായി മാറി. വൈക്കം മുഹമ്മദ് ബഷീറിന്റെ തിരക്കഥയിൽ എ വിൻസെന്റ് സംവിധാനം ചെയ്ത ഭാർഗവിനിലയത്തിലെ കാമുകനായ എഴുത്തുകാരനായി മധു പകർന്നാടിയ അഭിനയം മലയാളികളുടെ സിനിമാസ്വാദന ശൈലിയെത്തന്നെ മാറ്റിമറിച്ചു. ഒരു നടന് സൗന്ദര്യം മാത്രമല്ല, ഭാവങ്ങളും കണ്ണുകളിലെ തീക്ഷ്ണതയും എത്രത്തോളം പ്രധാനമാണെന്ന് അദ്ദേഹം തെളിയിച്ചു.
തുടർന്ന് വന്ന ‘ചെമ്മീൻ’ എന്ന ചിത്രത്തിലെ പരീക്കുട്ടി മലയാള സിനിമയുടെ അമരത്തേക്ക് അദ്ദേഹത്തെ സ്ഥിരപ്രതിഷ്ഠനാക്കി. രാമു കാര്യാട്ടിന്റെ സംവിധാനത്തിൽ, തകഴി ശിവശങ്കരപിള്ളയുടെ നോവലിനെ ആസ്പദമാക്കിയ ചിത്രത്തിൽ, പരീക്കുട്ടിയായി എത്തിയ മധുവിനെ മലയാളികൾക്കിന്നും മറക്കാൻ കഴിഞ്ഞിട്ടില്ല. കടലിന്റെ പശ്ചാത്തലത്തിൽ, പ്രണയവും വേദനയും നിറഞ്ഞ ഒരു കഥാപാത്രത്തെ അദ്ദേഹം അത്രയും യാഥാർത്ഥ്യത്തോടെ അവതരിപ്പിച്ചു. മലയാള സിനിമയ്ക്ക് ദേശീയ പുരസ്കാരം നേടി കൊടുത്ത ആദ്യ ചിത്രം കൂടിയായിരുന്നു “ചെമ്മീൻ”. മധുവിന്റെ അഭിനയജീവിതത്തിലും അതൊരു മൈൽസ്റ്റോൺ ആയിരുന്നു. മലയാളി ഒരിക്കലും മറക്കാത്ത പ്രണയത്തിന്റെ പ്രതീകമായി പരീക്കുട്ടി ഇന്നും ജീവിക്കുന്നു.
പിന്നീട് വന്ന “ഓളവും തീരവും” (1974) – ബാപ്പുട്ടിയായി അഭിനയിച്ച മധു, കടലിനോട് ചേർന്ന ജീവിതത്തിന്റെ കഠിനതയും സ്നേഹവും അവതരിപ്പിച്ചു. തുടർന്ന് വന്ന “എഴുത്തച്ഛൻ, അഗ്നിപുത്രൻ, എന്റെ അമ്മയുടെ അനിയത്തി” പോലുള്ള ചിത്രങ്ങളിലൂടെ, സാമൂഹിക-കുടുംബ പശ്ചാത്തലത്തിലുള്ള കഥാപാത്രങ്ങളെ തന്മയത്തത്തോടെ അവതരിപ്പിക്കാൻ അദ്ദേഹത്തിന് കഴിഞ്ഞു.”എണിപ്പടികൾ” (1971) – കേശവപ്പിള്ള എന്ന കഥാപാത്രം, ശക്തനായ ഒരു കുടുംബാധിപന്റെ ജീവിതം അദ്ദേഹം എത്ര യാഥാർത്ഥ്യത്തോടെ അവതരിപ്പിച്ചു എന്ന് തെളിയിക്കുന്നു. 2005 ൽ മോഹൻലാലിനൊപ്പം അഭിനയിച്ച “നരനി” ലെ നമ്പ്യാർ എന്ന കഥാപാത്രം മോഹൻലാലിന്റെ നരനെന്ന കഥാപാത്രത്തിനും മേലെ തെളിഞ്ഞു നിന്നത്, മധുവെന്ന നടന്റെ കഥാപാത്രത്തിനൊപ്പമുള്ള ഒഴുക്കിന്റെ തെളിമയായിരുന്നു.
1960-70 കാലഘട്ടം മധുവിന്റെ നായകവേഷങ്ങളുടെ സ്വർണ്ണയുഗമായിരുന്നു. പക്ഷേ, 1980-90കളിൽ അദ്ദേഹം അതിവേഗം മാറുന്ന സിനിമാ പ്രവണത തിരിച്ചറിഞ്ഞു. തന്റെ വയസ്സിനും അനുയോജ്യമായ പിതാവിന്റെയും ഗുരുവിന്റെയും വേഷങ്ങൾ സ്വീകരിച്ചുകൊണ്ട്, തന്റെ കരിയർ സ്വാഭാവിക അഭിനേതാവിന്റെ പാതയിലേക്ക് തിരിച്ചു. അത് തന്നെയാണ് മധുവിനെ ഇന്നും പ്രസക്തനാക്കി നിലനിർത്തുന്നത്.
അഭിനയത്തിലൊതുങ്ങാതെ, മധു സംവിധായകനായും നിർമാതാവായും തന്റെ കഴിവ് തെളിയിച്ചു. മോഡേൺ തീയറ്റേഴ്സ്-സുമായി ചേർന്ന്, അദ്ദേഹം “സുമംഗലി” പോലുള്ള സിനിമകൾ സംവിധാനം ചെയ്തു. സ്വന്തം സ്റ്റുഡിയോ (ഉമ്മാർ) ആരംഭിച്ച്, നിരവധി സിനിമകൾ നിർമ്മിക്കുകയും പുതിയ തലമുറക്ക് അവസരങ്ങൾ ഒരുക്കുകയും ചെയ്തു. ഇതിലൂടെ, മലയാള സിനിമയ്ക്ക് സംവിധാന-നിർമാണ മേഖലകളിലും തന്റെ സംഭാവനകൾ അദ്ദേഹം ഉറപ്പിച്ചു.
മലയാള ചലച്ചിത്ര ചരിത്രത്തിൽ ഏറ്റവും കൂടുതൽ നായികമാരുടെ നായകനായി അഭിനയിച്ചിട്ടുള്ള നടൻ മധു ആയിരിക്കും. സത്യനും പ്രേംനസീറും മലയാള സിനിമയുടെ നെടുംതൂണുകളായി നിന്ന കാലഘട്ടത്തിൽ, അവരോടൊപ്പം തന്നെ സമാന്തരമായി സ്വന്തമായൊരു സ്ഥാനം നേടിയെടുക്കാൻ മധുവിന് കഴിഞ്ഞു. പ്രണയനായകനായി മാത്രമല്ല, വില്ലൻ വേഷങ്ങളിലും സ്വഭാവനടനായും സംവിധായകനായും നിർമ്മാതാവായും അദ്ദേഹം തന്റെ സർഗ്ഗശേഷി തെളിയിച്ചു. ‘അനർത്ഥം’, ‘ബോയ് ഫ്രണ്ട്’ തുടങ്ങി നിരവധി ചിത്രങ്ങൾ അദ്ദേഹം സംവിധാനം ചെയ്യുകയും നിർമ്മിക്കുകയും ചെയ്തിട്ടുണ്ട്. സിനിമയോടുള്ള അടങ്ങാത്ത ആവേശം കൊണ്ട് ഒരുകാലത്ത് മലയാളത്തിലെ മിക്ക സംവിധായകരുടെയും ആദ്യ ചോയ്സ് മധു ആയിരുന്നു.
അഭിനയത്തിനൊപ്പം തന്നെ സാമൂഹിക സാംസ്കാരിക രംഗങ്ങളിലും മധു സജീവമായിരുന്നു. തിരുവനന്തപുരം ആനയറയിൽ സ്ഥിതി ചെയ്യുന്ന അദ്ദേഹത്തിന്റെ വീട് ഇന്നും സിനിമാപ്രേമികളുടെയും കലാകാരന്മാരുടെയും സംഗമകേന്ദ്രമാണ്. പ്രായം തളർത്താത്ത ആവേശത്തോടെ, ഇന്നും സിനിമയോട് ആത്മബന്ധം പുലർത്തുന്ന അദ്ദേഹത്തിന്റെ ജീവിതം പുതുതലമുറയ്ക്ക് വലിയൊരു പാഠപുസ്തകമാണ്. അഹങ്കാരമോ താരജാഡകളോ ഇല്ലാത്ത, തികച്ചും സാധാരണക്കാരനായ ഒരു മനുഷ്യനായി ജീവിക്കുമ്പോഴും മലയാള സിനിമയുടെ ചരിത്രത്തിൽ അദ്ദേഹത്തിന് നൽകാനുള്ള സംഭാവനകൾ സമാനതകളില്ലാത്തതാണ്.
കലയ്ക്ക് നൽകിയ സമഗ്ര സംഭാവനകൾ മുൻനിർത്തി പത്മശ്രീ നൽകി രാജ്യം അദ്ദേഹത്തെ ആദരിച്ചിട്ടുണ്ട്. മലയാള സിനിമയുടെ ഇന്നത്തെ വളർച്ചയ്ക്ക് അടിത്തറയിട്ട തലമുറയിലെ അവസാന കണ്ണികളിൽ ഒരാളാണ് മധു. സാങ്കേതികവിദ്യ എത്രയൊക്കെ വളർന്നാലും അഭിനയത്തിന്റെ ആത്മാവ് എന്താണെന്ന് മലയാളികളെ പഠിപ്പിച്ച ആ പഴയ മാസ്റ്ററുടെ പുഞ്ചിരി ഇന്നും നമുക്ക് ഒരു ഊർജ്ജമാണ്. അദ്ദേഹത്തിന്റെ ജന്മദിനത്തിൽ മലയാള സിനിമയുടെ ആ സൗമ്യസാന്നിധ്യത്തിന് ആരോഗ്യവും ദീർഘായുസ്സും നേർന്നുകൊണ്ട് നമുക്ക് ഈ ദിനം ആഘോഷിക്കാം.
മധുവിന്റെ അഭിനയജീവിതത്തെക്കുറിച്ച് ഓർക്കുമ്പോൾ നമ്മുടെ മനസ്സിലേക്ക് വരുന്നത് ഒട്ടനവധി അനശ്വര കഥാപാത്രങ്ങളാണ്. മലയാള സിനിമയിലെ റൊമാന്റിക് നായക സങ്കൽപ്പങ്ങളെ പുതുക്കിപ്പണിത ആ മുഖം ഇന്നും പുതിയ തലമുറയ്ക്ക് പ്രചോദനമാണ്. ഈ ജന്മദിനത്തിൽ മലയാളികളുടെ സ്വന്തം മധുവിന് ആയുരാരോഗ്യ സൗഖ്യങ്ങൾ ആശംസിക്കുന്നു.
ഇത്രയും കാലം സിനിമാമേഖലയിൽ അദ്ദേഹം പുലർത്തിയ അച്ചടക്കവും അർപ്പണബോധവും ഇന്നത്തെ യുവതലമുറ മാതൃകയാക്കേണ്ടതാണ്. കലയെ ജീവനായിക്കണ്ട ഒരു കലാകാരന്റെ ജീവിതം തന്നെയാണ് ഏറ്റവും വലിയ വിജയഗാഥ.
മലയാളികളുടെ ഓർമ്മകളിൽ മധു എന്നും പരീക്കുട്ടി, ബാപ്പുട്ടി, കേശവപ്പിള്ള, നമ്പ്യാർ എന്നിങ്ങനെ നിലകൊള്ളും. അദ്ദേഹത്തിന്റെ ജീവിതം മലയാള സിനിമയുടെ ചരിത്രത്തിന്റെ തന്നെ പുനർനിർമ്മിതിയാണ്. കാലഘട്ടങ്ങൾ മാറി, തലമുറകൾ മാറി, സിനിമയുടെ സാങ്കേതികവിദ്യ മുന്നോട്ട് പോയാലും, മധു എന്ന പേരിന്റെ പ്രസക്തി ഒരിക്കലും മങ്ങുകയില്ല. മലയാള സിനിമയുടെ 100 വർഷത്തിലേറെ നീണ്ടുനിൽക്കുന്ന ചരിത്രത്തിൽ, പല താരങ്ങളും വന്ന് പോയിട്ടുണ്ട്. പക്ഷേ, മധുവിനെ പോലൊരു നടൻ, സംവിധായകൻ, നിർമാതാവ്, അധ്യാപകൻ, സാംസ്കാരിക പ്രവർത്തകൻ എന്നിങ്ങനെ സമയോചിതമായി ചേർന്നൊരു വ്യക്തിത്വം അപൂർവമാണ്. മലയാളത്തിന്റെ എക്കാലത്തെയും മികച്ച നടൻ അഭിനയ പ്രതിഭയ്ക്ക് ഒരിക്കൽ കൂടി ഹൃദയം നിറഞ്ഞ ജന്മദിനാശംസകൾ.