മലയാളത്തിലെ എവർഗ്രീൻ കോമഡി എന്റർടൈൻമെന്റ് ചിത്രം CID മൂസയ്ക്ക് 22 വയസ്സ്. ഇപ്പോഴിതാ ഇരുപത്തി രണ്ടാം വർഷത്തിൽ തന്റെ ആദ്യ സ്വതന്ത്ര സംവിധാന ചിത്രത്തിന്റെ സന്തോഷം പങ്കിട്ടിരിക്കുകയാണ് സിനിമയുടെ സംവിധായകൻ ജോണി ആന്റണി. സോഷ്യൽ മീഡിയയിൽ പങ്കുവെച്ച കുറിപ്പ് നിമിഷ നേരം കൊണ്ടാണ് വൈറലായത്.
“ഇന്ന് CID മൂസയ്ക്കും ഞാൻ എന്ന സംവിധായകനും 22 വയസ്സ് തികയുകയാണ്. ഒരു സ്വതന്ത്ര സംവിധായകൻ എന്ന നിലയിൽ ഈ സിനിമയിലേക്ക് എന്നെ എത്തിച്ചവർക്കും, എന്നോടൊപ്പം പ്രവർത്തിച്ചവർക്കും മുന്നോട്ട് പോകാൻ പിന്തുണച്ചവർക്കും എല്ലാവർക്കും നന്ദി നന്ദി നന്ദി”, ജോണി ആന്റണി കുറിച്ചു.
പിന്നാലെ നിരവധി പേരാണ് 22 വർഷം മുൻപ് സിനിമ കാണാൻ പോയ ഓർമകൾ പങ്കുവച്ച് രംഗത്ത് എത്തിയത്. “പൊലീസിന്റെ അടിയും ഇടിയും കൊണ്ട് ഒടുക്കം മൂന്നാമത്തെ തവണ രണ്ട് മണിക്കൂർ മുന്നേ പോയ് ക്യൂവിൽ നിന്ന് ടിക്കറ്റ് എടുത്ത് കണ്ട സിനിമ”.എന്നാണ് ഒരു ആരാധകന്റെ കമന്റ്. ജോണി ആന്റണി ഇനിയും സിനിമകൾ സംവിധാനം ചെയ്യണമെന്ന് ആവശ്യപ്പെടുന്നവരും ധാരാളമാണ്.
ഇതിനിടെ സിഐഡി മൂസ 2 അല്ലെങ്കിൽ റി റിലീസ് വേണമെന്ന് ആവശ്യപ്പെട്ടും നിരവധി പേർ കമന്റ് ചെയ്തിട്ടുണ്ട്. സിഐഡി മൂസ 2 വരുമെന്ന് നേരത്തെ ജോണി ആന്റണി അറിയിച്ചിരുന്നു. എങ്ങനെ തുടങ്ങിയോ അതേ ഊർജ്ജത്തിൽ എല്ലാം ഒത്തുവന്നാൽ രണ്ടാം ഭാഗം ഉണ്ടാകുമെന്നായിരുന്നു അദ്ദേഹം നേരത്തെ പറഞ്ഞിരുന്നത്. ഇതൊരു അനിമേഷൻ സിനിമയാണെന്ന അഭ്യൂഹങ്ങളും നടക്കുന്നുണ്ട്. 2003 ജൂലൈ 4ന് ആയിരുന്നു സിഐഡി മൂസയുടെ റിലീസ്.