ഓവർസീസ് മാർക്കറ്റിൽ ഇതുവരെ ഏറ്റവും കൂടുതൽ കളക്ഷൻ നേടിയ സിനിമകളുടെ ലിസ്റ്റ് പുറത്തു വിട്ടു. ഒന്നും രണ്ടും സ്ഥാനം നേടിയിരിക്കുന്നത് രണ്ട് മോഹൻലാൽ ചിത്രങ്ങളാണ്. പൃഥ്വിരാജ് സംവിധാനം ചെയ്ത “എമ്പുരാനാണ്” 16.90 മില്യൺ ഡോളർ നേടി ഒന്നാം സ്ഥാനത്ത്. തൊട്ടു പിന്നാലെ 11.01 മില്യൺ ഡോളർ നേടി തരുൺ മൂർത്തി സംവിധാനം ചെയ്ത “തുടരും”.
ബോളിവുഡിലെ ഈ വർഷത്തെ ഏറ്റവും വലിയ വിജയ ചിത്രമായ ഛാവയാണ് മൂന്നാം സ്ഥാനത്ത്. 10.30 മില്യൺ ഡോളറാണ് സിനിമയുടെ ഓവർസീസിൽ നിന്നുള്ള സമ്പാദ്യം. ചിത്രം ആഗോള ബോക്സ് ഓഫീസിൽ നിന്നും നേടിയത് 807.88 കോടിയാണ്. വിക്കി കൗശലും രശ്‌മിക മന്ദാനയുമായിരുന്നു ചിത്രത്തിലെ കേന്ദ്ര കഥാപാത്രങ്ങൾ.
ഈ ലിസ്റ്റിലെ ആദ്യ പത്തിൽ ഇടം പിടിച്ച മലയാളം സിനിമകൾ എമ്പുരാനും തുടരുമും മാത്രമാണ്. ഹൗസ്ഫുൾ 5, ഗുഡ് ബാഡ് അഗ്ലി, സിത്താരെ സമീൻ പർ, സിക്കന്ദർ, തഗ് ലൈഫ്, വിടാമുയർച്ചി, സംക്രാന്തികി വസ്തുനാം എന്നിവയാണ് ആദ്യ പത്തിലെ മറ്റു സിനിമകൾ. നിലവിൽ ആമിർ ഖാൻ ചിത്രമായ സിത്താരെ സമീൻ പർ തിയേറ്ററിൽ വിജയകരമായി പ്രദർശനം തുടരുന്നതിനാൽ തൊട്ടുമുൻപിലുള്ള ഹൗസ്ഫുൾ 5 വിനെയും, ഗുഡ് ബാഡ് അഗ്ലിയെയും ഉടൻ മറികടക്കുമെന്നാണ് പ്രതീക്ഷ.