പ്രിയം സിനിമ കണ്ട് നടി ദീപ നായരെ വിളിച്ച സംഭവം വിശദീകരിച്ച് നടൻ അജു വർഗീസ്. ലവ് ലെറ്റര് എഴുതാനുള്ള വിവരം ഉണ്ടായിരുന്നില്ലെന്നും, അത് കൊണ്ടാണ് ഫോൺ ചെയ്തതെന്നും അജു പറഞ്ഞു. ദീപ പറഞ്ഞത് കേട്ടിരുന്നുവോ എന്ന ചോദ്യത്തിന് മറുപടി നല്കുകയായിരുന്നു അജു. പുതിയ ചിത്രം വാഴ 2വിന്റെ പ്രൊമോഷന്റെ ഭാഗമായി മഴവില് മനോരമയ്ക്ക് നല്കിയ അഭിമുഖത്തിലാണ് അജു ഈ കാര്യം വ്യക്തമാക്കിയത്.
”എനിക്ക് കുറേ പോസ്റ്ററുകള് വന്നിരുന്നു. ദീപ ചേച്ചി എന്റെ സുഹൃത്താണ്. ലവ് ലെറ്റര് എഴുതാനുള്ള വിവരം ഉണ്ടായിരുന്നില്ല. അതിനാല് ഫോണ് ചെയ്തു. പറഞ്ഞതൊന്നും ഓര്മയില്ല. ഞാന് ഇടയ്ക്ക് ഇടയ്ക്ക് വിളിക്കുമായിരുന്നു.നമ്മളന്ന് കുഞ്ചാക്കോ ബോബന് ഫാന് ആണ്. ചാക്കോച്ചന്റെ അനിയത്തിപ്രാവ്, നിറം, മയില്പ്പീലിക്കാവ്, അങ്ങനെയാണ് പ്രിയയവും കാണുന്നത്. സ്വാഭാവികമായും ആനിയെന്ന കഥാപാത്രത്തോടും ദീപ ചേച്ചിയോടും ഇഷ്ടം തോന്നി. ഭയങ്കര നല്ല കഥാപാത്രമാണ്. അങ്ങനെ വിളിച്ചതാണ്.” അജു വർഗീസ് പറഞ്ഞു.
“ഡയറക്ടറി നോക്കിയാണ് നമ്പര് കണ്ടുപിടിച്ചത്. പ്രിയം ഇറങ്ങിയത് മുതല് അറിയാം. മഞ്ജിമയെ കണ്ടപ്പോള് ചോദിച്ചപ്പോള് ഓസ്ട്രേലിയയില് സെറ്റില് ചെയ്തുവെന്ന് അറിഞ്ഞു. പക്ഷെ നേരിട്ട് കണ്ടത് കഴിഞ്ഞ വര്ഷമായിരുന്നുവെന്നും അജു വര്ഗീസ് പറയുന്നു. അതേസമയം താന് കുറേപേരെ അങ്ങനെ വിളിച്ചിട്ടുണ്ടെന്നും അജു പറയുന്നു. ഡയറക്ടറി നോക്കി മമ്മൂക്കയെ വിളിച്ചിട്ടുണ്ട്. പക്ഷെ എടുത്തിട്ടില്ല. ചാക്കോച്ചനേയും വിളിച്ചിട്ടുണ്ട്. എടുത്തിട്ടില്ല. ആകെ എടുത്തത് ദീപ ചേച്ചി മാത്രമാണ്. പത്താം ക്ലാസില് പഠിക്കുമ്പോഴാണ്. അന്ന് എനിക്ക് 15 വയസ് മാത്രമേയുള്ളൂ.” അജു വർഗീസ് കൂട്ടിച്ചേർത്തു.
നടന് അജു വര്ഗീസ് പ്രിയം സിനിമ കണ്ട് തന്നെ വിളിച്ചിട്ടുണ്ടെന്ന ദീപ നായരുടെ വാക്കുകള് ഈയ്യടുത്ത് വൈറലായിരുന്നു. കുഞ്ചാക്കോ ബോബന് നായകനായ പ്രിയത്തിലൂടെ മലയാളി മനസില് ഇടം നേടിയ നടിയാണ് ദീപ നായര്. അന്ന് കൂട്ടിയായിരുന്ന അജു വര്ഗീസ് തന്നെ ഫോണ് വിളിച്ചിട്ടുണ്ടെന്നാണ് ദീപ പറഞ്ഞത്. പൊങ്കാലയിടാന് നാട്ടിലെത്തിയപ്പോഴായിരുന്നു ദീപ ഓര്മ പങ്കിട്ടത്. വര്ഷങ്ങള്ക്ക് ശേഷം അജു നടനായപ്പോള് താന് അജുവിന്റെ ആരാധികയായെന്നും ദീപ പറഞ്ഞിരുന്നു.