ഒരിടവേളയ്ക്ക് ശേഷം സംവിധായകൻ സുനിൽ ഒരുക്കുന്ന പുതിയ ചിത്രം കേക്ക് സ്റ്റോറിയുടെ ട്രയ്ലർ പുറത്തിറങ്ങി. ‘മാനത്തെ കൊട്ടാരം’, ‘ആലഞ്ചേരി തമ്പ്രാക്കള്‍’, ‘വൃദ്ധന്മാരെ സൂക്ഷിക്കുക’, ‘പ്രിയപ്പെട്ട കുക്കു’ തുടങ്ങിയ ഹിറ്റ് ചിത്രങ്ങള്‍ സുനിലിന്റേതാണ്. ഒരു കേക്കിനെ കേന്ദ്രകഥാപാത്രമാക്കിയാണ് കഥ ഒരുക്കിയിരിക്കുന്നത്.
ചിത്രത്തിലെ നായികാ കഥാപാത്രത്തെ അവതരിപ്പിക്കുന്നത് സംവിധായകന്റെ മകളായ വേദ സുനിലാണ്. തിരക്കഥയും വേദ തന്നെയാണ് എഴുതിയിരിക്കുന്നുവെന്നത് സിനിമയുടെ പ്രത്യേകതയാണ്. എഡിറ്ററായും , അസിസ്റ്റന്റ് ഡയറക്ടറായും അച്ഛനോടൊപ്പം നിരവധി പ്രോജക്ടുകളിൽ പ്രവർത്തിച്ചിട്ടുള്ള വേദയുടെ ആദ്യത്തെ തിരക്കഥാവിഷ്‌ക്കാരം കൂടിയാണ് ‘കേക്ക് സ്റ്റോറി’. ബിന്ദു സുനിലും ജയന്തകുമാർ അമൃതേശ്വരിയും ചേർന്ന് ചിത്രവേദ റീൽസിൻ്റേയും ജെകെആര്‍ ഫിലിംസിൻ്റേയും ബാനറിലാണ് ചിത്രം നിർമ്മിക്കുന്നത്.
ചിത്രത്തിൽ മറ്റൊരു പ്രധാന കഥാപാത്രത്തെ അവതരിപ്പിക്കുന്നത് അശോകനാണ്. ബാബു ആന്‍റണി, ജോണി ആന്‍റണി, മേജർ രവി, കോട്ടയം രമേഷ്, അരുൺ കുമാർ, മല്ലിക സുകുമാരൻ, നീനാ കുറുപ്പ്, സാജു കൊടിയൻ, ദിനേഷ് പണിക്കർ, ഡൊമിനിക്, അൻസാർ കലാഭവൻ, ടിഎസ് സജി, ഗോവിന്ദ്, അശിൻ, ജിത്തു, ഗോകുൽ, സംഗീത കിങ്സ്ലി, ജനനി സജി, അമൃത ജയന്ത്, സിന്ധു ജയന്ത്, വിദ്യാ വിശ്വനാഥ് തുടങ്ങിയവരും സിനിമയിൽ അഭിനയിക്കുന്നു.
വിദേശികളായ ജോസഫ് (യുഎസ്എ), മിലിക്ക (സെർബിയ), ലൂസ് (കാലിഫോർണിയ), നാസ്തിയ (മോസ്കോ) എന്നിവരും ചിത്രത്തിൽ അണിനിരക്കുന്നു. തമിഴ് നടൻ റെഡിൻ കിൻസ്ലി ആദ്യമായി അഭിനയിക്കുന്ന മലയാള സിനിമ കൂടിയാണിത്. അദ്ദേഹത്തിൻ്റെ കഥാപാത്രം വളരെ പ്രധാനപ്പെട്ടതുമാണ്.
ആർ എച്ച് അശോക് , പ്രദീപ് നായർ എന്നിവരാണ് ക്യാമറ കൈകാര്യം ചെയ്യുന്നത് . സംഗീതം: ജെറി അമൽദേവ്, എസ് പി വെങ്കിടേഷ്, എഡിറ്റിംഗ്: എംഎസ് അയ്യപ്പൻ നായർ. വരികൾ: വിനായക് ശശികുമാർ, സന്തോഷ് വർമ്മ. കലാസംവിധാനം: സജീഷ് താമരശ്ശേരി. വസ്ത്രാലങ്കാരം: അരുൺ മനോഹർ. മേക്കപ്പ്: കലാമണ്ഡലം വൈശാഖ്, സിജു കൃഷ്ണ. ചീഫ് അസോസിയേറ്റ് ഡയറക്ടർ: ജിബി മാള, അസോസിയേറ്റ് ഡയറക്ടർ: നിധീഷ് ഇരിട്ടി. അസിസ്റ്റന്റ് ഡയറക്ടേഴ്സ്: ഹാരിസ് ഹംസ, പ്രജി സുബ്രഹ്മണ്യൻ, രാഹുൽ കെ എം. സ്റ്റിൽസ്: ഷാലു പേയാട്. പി.ആർ.ഒ: ആതിര ദിൽജിത്ത്.