നടൻ മമ്മൂട്ടിയുടെ ആരോഗ്യസ്ഥിതിയെക്കുറിച്ചുള്ള വാർത്തകളിൽ സന്തോഷം പങ്കിട്ട് നടൻ മോഹൻലാൽ. മമ്മൂട്ടിക്കൊപ്പമുളള ചിത്രം തന്റെ സോഷ്യൽ മീഡിയ പേജിൽ പങ്കുവെച്ചുകൊണ്ടാണ് മോഹൻലാലിന്റെ പ്രതികരണം. മോഹൻലാൽ മമ്മൂട്ടിയെ ചുംബിക്കുന്ന ഫോട്ടോയാണ് പങ്കുവെച്ചിട്ടുളളത്. മറ്റു കുറിപ്പുകളോ വാക്കുകളോ ഒന്നും തന്നെ കൂടെ പങ്കുവെച്ചിട്ടില്ല.
കുറച്ചു മണിക്കൂറുകൾക്ക് മുന്നെയാണ് മമ്മൂട്ടിയുടെ പേർസണൽ അസിസ്റ്റന്റ് ജോർജും, നിർമ്മാതാവ് ആന്റോ ജോസഫും മമ്മൂട്ടിയുടെ ആരോഗ്യ നിലയെ കുറിച്ച് പോസ്റ്റ് പങ്കുവെച്ചത്. “സന്തോഷത്തില് നിറഞ്ഞ കണ്ണുകളോടെ കൈകൂപ്പി നിങ്ങളുടെ മുന്നില് ഞാന് നില്ക്കുന്നു. പ്രാര്ത്ഥിച്ചവര്ക്കും, കൂടെ നിന്നവര്ക്കും, ഒന്നുമുണ്ടാവില്ല എന്ന് പറഞ്ഞു ആശ്വസിപ്പിച്ചവര്ക്കും പറഞ്ഞാല് തീരാത്ത സ്നേഹത്തോടെ പ്രിയപ്പെട്ടവരെ…നന്ദി!”.എന്ന് മമ്മൂട്ടിയുടെ പേഴ്സണല് അസിസ്റ്റന്റ് ജോര്ജ് എസ് തന്റെ ഫേസ്ബുക് പേജിൽ പങ്കുവെച്ച കുറിപ്പിലൂടെ പറഞ്ഞിരുന്നു. ലോകമെമ്പാടുമുള്ള ഒരുപാട് പേരുടെ പ്രാര്ത്ഥനയ്ക്ക് ഫലം കണ്ടെന്ന് നിര്മാതാവ് ആന്റോ ജോസഫ് ഫേസ്ബുക്കില് പോസ്റ്റ് പങ്കുവെച്ചതിനു പിന്നാലെയാണ് ജോർജിന്റെ പോസ്റ്റും സോഷ്യൽ മീഡിയയിൽ നിറയുന്നത്. “ലോകമെമ്പാടുമുള്ള ഒരുപാട് പേരുടെ പ്രാർത്ഥനയ്ക്ക് ഫലം കണ്ടു. ദൈവമേ നന്ദി, ആനന്ദി, നന്ദി”, എന്നാണ് ആന്റോ ജോസഫ് പങ്കുവെച്ചിരിക്കുന്നത്. എന്നാല് മറ്റു സൂചനകളൊന്നും നല്കിയിരുന്നില്ല.
നടി മാലാ പാർവതിയും സംഭവത്തെ കുറിച്ച് പ്രതികരിച്ചിരുന്നു. ‘ഇതില് കൂടുതല് ഒരു നല്ല വര്ത്തമാനം ഇല്ല. മമ്മൂക്ക പൂര്ണ്ണ ആരോഗ്യം വീണ്ടെടുത്തിരിക്കുന്നു. ചികിത്സിച്ച ഡോക്ടര്മാര്ക്കും, ശ്രുശൂഷിച്ച എല്ലാവര്ക്കും, ആശുപത്രിയോടും കടപ്പാട്. സ്നേഹം’, മാലാ പാർവതി കുറിച്ചു.
ജിതിൻ കെ. ജോസ് സംവിധാനം ചെയ്യുന്ന കളങ്കാവൽ ആണ് മമ്മൂട്ടിയുടേതായി റിലീസിനൊരുങ്ങുന്ന പുതിയ ചിത്രം. ഈ ചിത്രത്തിന്റെ പുതിയ പോസ്റ്റർ കഴിഞ്ഞദിവസം ഇറങ്ങിയിരുന്നു. മഹേഷ് നാരായണൻ സംവിധാനം ചെയ്യുന്ന ചിത്രത്തിൽ മോഹൻലാൽ, ഫഹദ് ഫാസിൽ, കുഞ്ചാക്കോ ബോബൻ എന്നിവർക്കൊപ്പം മമ്മൂട്ടിയെത്തും.