ഗായിക കെ ജമുനാ റാണി അന്തരിച്ചു. 88 വയസ്സായിരുന്നു. ബംഗളുരുവിലെ വസതിയില് വച്ചായിരുന്നു അന്ത്യം. കുടുംബാംഗങ്ങളാണ് ഗായികയുടെ മരണവിവരം പങ്കുവച്ചത്. ഗായികയുടെ മരണത്തില് ചലച്ചിത്രമേഖലയിലെ നിരവധി പ്രമുഖര് അനുശോചനം അറിയിച്ചു.
പതിറ്റാണ്ടുകളായി കോടി കണക്കിന് ആസ്വാദകരുടെ ഹൃദയത്തില് നാദവിസ്മയം തീര്ത്ത ഗായികയാണ് ജമുന റാണി. മലയാളത്തിലടക്കം ആറായിരത്തിലധികം ഗാനങ്ങള് പാടിയിട്ടുണ്ട്. 1938ല് മേയ് പതിനേഴിന് ആന്ധ്രാപ്രദേശില് ജനിച്ച ജമുനാറാണി തെലുങ്ക്, കന്നട, തമിഴ്, മലയാളം, സിംഹള ഉള്പ്പടെ അഞ്ച് ഭാഷകളിലും ഗാനം ആലപിച്ചിട്ടുണ്ട്. മലയാളത്തില് എംസ് വിശ്വനാഥ്, ബ്രദര് ലക്ഷ്മണ്, എംബി ശ്രീനിവാസ്, എംഎസ് ബാബു രാജ് അടക്കമുള്ളവരുടെ സംഗീതത്തില് പാടി. ആന വളര്ത്തിയ വാനമ്പാടി, ഭാഗ്യ ജാതകം, പുതിയ ആകാശം, പുതിയ ഭൂമി, സ്നേഹഗീതം തുടങ്ങി നീളുന്നു ജമുന റാണി പാടിയ മലയാളം ചിത്രങ്ങള്,
ഏഴാമത്തെ വയസ്സില് ത്യാഗയ്യ എന്ന തെലുങ്ക് ചിത്രത്തിനു വേണ്ടിയാണ് ആദ്യമായി പാടിയത്. പതിമൂന്നാം വയസ്സില് റാണി വലയപതി, കല്യാണി തുടങ്ങിയ ചിത്രങ്ങളില് പാടി. 1955 ലാണ് തമിഴില് ആദ്യ പാട്ട് പാടുന്നത്. 1953-ല് ആനന്ദ സമരകൂണിന്റെ സംവിധാനത്തില് സുജാതയ്ക്കുവേണ്ടിയാണ് ജമുന റാണി ആദ്യമായി ശ്രീലങ്കന് സിനിമയില് പാടിയത് . തുടര്ന്ന് സിംഹള ഭാഷയില് നിരവധി ഗാനങ്ങള് പാടി. പി. സുശീല, പി. ലീല, എല്.ആര്. ഈശ്വരി തുടങ്ങി നിരവധി ഗായികമാര്ക്കൊപ്പം അവര് യുഗ്മഗാനങ്ങളും ആലപിച്ചു. നിരവധി പുരസ്കാരങ്ങളും ഇവരെ തേടിയെത്തി.