വോട്ടർ പട്ടികയിൽ പേരില്ലെന്ന വാർത്തകൾക്ക് പിന്നാലെ നടി ലക്ഷ്മി പ്രിയയെ ട്രോളി സൈബർ ലോകം. ‘ഇത്രയും ഗതികെട്ടവന് വേറെയുണ്ടാകുമോ’ എന്ന ഡയലോഗ് ക്യാപ്ഷനാക്കിയാണ് പലരും നിലവിലെ സംഭവം സോഷ്യല് മീഡിയയില് ട്രോളാക്കിയിരിക്കുന്നത്. സ്ഥാനാര്ഥി പ്രഖ്യാപനം പുറത്തുവന്നതിന് പിന്നാലെ ലക്ഷ്മിപ്രിയ മാധ്യമങ്ങളോട് പറഞ്ഞ വാക്കുകളും ട്രോളൻമാർ ഏറ്റെടുത്തിട്ടുണ്ട്.
തന്റെ തെരഞ്ഞെടുപ്പ് പ്രചരണത്തിനായി സൂപ്പര് താരങ്ങളായ മോഹന്ലാലും മമ്മൂട്ടിയും ദിലീപും സിദ്ദിഖുമെല്ലാം വരുമെന്നാണ് തന്റെ പ്രതീക്ഷയെന്നായിരുന്നു താരം പറഞ്ഞിരുന്നത്.
‘അയ്യോ, ഇനി മമ്മൂട്ടിയും മോഹൻലാലും ദിലീപും ജയറാമും അമിതാഭ് ബച്ചനും ഷാരുഖ് ഖാനും തുടങ്ങി ഇന്ത്യൻ സിനിമയിലെ ഒട്ടുമിക്ക നായകന്മാരും ഇവരുടെ ഇലക്ഷൻ പ്രചാരണത്തിന് ഇറങ്ങാൻ തയ്യാറായി ഇരിക്കുകയായിരുന്നു… അവരൊക്കെ ഇനി എന്ത് ചെയ്യും മല്ലയാ.’
‘മമ്മൂക്കയ്ക്കും ലാലേട്ടനും ഭാഗ്യമില്ലാ’, ‘ഇലക്ഷൻ പ്രചരണത്തിന് പെരുമ്പാവൂരിലേക്ക് പുറപ്പെട്ട മമ്മൂട്ടിയും, മോഹൻലാലും അങ്കമാലി വഴി തിരിച്ചു പോയി….ദിലീപ് ആലുവയിലെ വീട്ടിൽ തുടരുന്നു’, ‘ചേച്ചി അമ്മയില് വോട്ട് ചെയ്ത കാര്ഡുമായി വന്നതാ’, ‘ഇതൊക്കെ ശ്രദ്ധിക്കണ്ടേ അമ്പാനെ.. മമ്മൂട്ടിയും മോഹൻലാലും ഇനി ആർക്ക് വേണ്ടി വോട്ട് പിടിക്കും’- എന്നിങ്ങനെ പോകുന്നു സോഷ്യൽ മീഡിയയിലെ കമന്റുകൾ.
വരാനിരിക്കുന്ന സംസ്ഥാന നിയമസഭ തെരഞ്ഞെടുപ്പിൽ പെരുമ്പാവൂരിൽ നിന്ന് ട്വന്റി 20 സ്ഥാനാർഥിയായി ലക്ഷ്മിപ്രിയ മത്സരിക്കുമെന്ന വാർത്തകളിലൂടെ നടി വലിയ ജനശ്രദ്ധ പിടിച്ചു പറ്റിയിരുന്നു. വോട്ടർ പട്ടികയിൽ പേരില്ലാത്ത സാഹചര്യത്തിൽ സ്ഥാനാർഥിത്വം തള്ളിപ്പോകാൻ ഇടയുള്ളതിനാൽ കാര്യങ്ങൾ വിശദമായി പരിശോധിച്ചു വരുന്നു എന്നാണ് എൻഡിഎ നേതൃത്വം വ്യക്തമാക്കിയിട്ടുള്ളത്. താരസംഘടനയായ അമ്മയുടെ വൈസ് പ്രസിഡന്റ് കൂടിയാണ് ലക്ഷ്മിപ്രിയ.
ജനവിധി തേടിയിറങ്ങുന്ന സെലിബ്രിറ്റികളായ രമേഷ് പിഷാരടി, അഖിൽ മാരാർ, വീണ നായർ, അഞ്ജലി നായർ തുടങ്ങിയവരുടെ ലിസ്റ്റിലാണ് ലക്ഷ്മിപ്രിയയും ഉണ്ടായിരുന്നത്.
അതേസമയം തൃപ്പൂണിത്തുറ കരിങ്ങാച്ചിറയിലാണ് ലക്ഷ്മിപ്രിയ ഇപ്പോൾ താമസിക്കുന്നത്. എന്നാൽ ഇവിടെ ഇവർക്ക് വോട്ടില്ല എന്നാണ് വിവരം. തൃക്കാക്കരയിൽ ഒരു ഫ്ലാറ്റ് ഉണ്ടെങ്കിലും ഇവിടെയും വോട്ടർ പട്ടികയിൽ പേരില്ലെന്നാണ് സൂചനകൾ.