വഖഫ് ഭേദഗതി ബില്ലിനെ ചൊല്ലിയുള്ള രാജ്യസഭ ചർച്ചയിൽ ജോൺ ബ്രിട്ടാസ് എംപി, സുരേഷ് ഗോപിയെ എമ്പുരാൻ സിനിമയിലെ കഥാപാത്രമായ ‘മുന്ന’യോട് ഉപമിച്ചതിനെ തുടർന്ന് നടക്കുന്ന വിവാദം പുതിയ ചൂട് പിടിക്കുന്നു. “ഞാൻ ആരുടെയും പേരു പറഞ്ഞിട്ടില്ല. എന്നാൽ ചിലരുടെ പ്രതികരണങ്ങൾ തങ്ങളാണ് മുന്നയെന്ന് കരുതിയതായി സൂചിപ്പിക്കുന്നു” എന്നായിരുന്നു ജോൺ ബ്രിട്ടാസിന്റെ പ്രതികരണം.
ഇതിനുപിന്നാലെ, സൈബർ ലോകത്ത് സുരേഷ് ഗോപിയുടെ ഫാൻസിന്റെ പിന്തുണയോടെ പ്രചരിക്കുന്ന ഒരു കുറിപ്പ് ശ്രദ്ധേയമാകുന്നു. ‘മുന്ന’ എന്ന പദം ടെററിസ്റ്റിനെയും രാജ്യദ്രോഹിയെയും സൂചിപ്പിക്കുന്നതല്ല. ചെറിയ കുട്ടികളോടുള്ള വാത്സല്യപരമായ വിളിപ്പേരാണ് ‘മുന്നാ’ എന്നും, അങ്ങനെയുള്ള മനസ്സിന്റെ ഉടമയാണു സുരേഷ് ഗോപിയെന്നും കുറിപ്പിൽ പറയുന്നു.
സുരേഷ് ഗോപിയെ അടുത്തറിയുന്നവർ അദ്ദേഹത്തെ “ശുദ്ധഗതിക്കാരൻ”, “കൊച്ചുകുട്ടികളെപ്പോലെയുള്ള മനസ്സുള്ളവൻ”, “പെട്ടെന്ന് പരിഭവിക്കുകയും പിന്നീട് തനിയെ ഇണങ്ങുകയും ചെയ്യുന്നവൻ” എന്നിങ്ങനെയാണ് വിശേഷിപ്പിക്കുന്നത്. അദ്ദേഹം ആകുന്നതെല്ലാം കാപട്യമില്ലാത്ത സ്നേഹമാണെന്നും, അതാണ് ജനങ്ങൾ അദ്ദേഹത്തോടുള്ള സ്നേഹത്തിൽ കൂടുതൽ ചേർന്നു നിൽക്കാനുള്ള കാരണം എന്നും കുറിപ്പിൽ വ്യക്തമാക്കുന്നു. പുറമേ ചിരിയും ഉള്ളിൽ കാപട്യവുമുള്ള നേതാക്കളേക്കാൾ മനസ്സിന്റെ ഉളളളിപ്പുള്ള ശരിയായൊരു മനുഷ്യനെയാണ് ജനങ്ങൾ തിരഞ്ഞെടുത്തതെന്ന് കുറിപ്പ് ചൂണ്ടിക്കാട്ടുന്നു. പ്രധാനമന്ത്രിയെയും കുഞ്ഞുങ്ങളുടെ മനസ്സുകളെയും തൊട്ടെടുത്ത നേതാവാണ് സുരേഷ് ഗോപിയെന്നും, അദ്ദേഹത്തെ ‘മുന്ന’ എന്ന് വിളിക്കുന്നവരുടെ എണ്ണം കുറയുകയല്ല, ദിവസേന വർധിക്കുകയാണ് എന്നും കുറിപ്പിൽ പറയുന്നു.