വിജയ്യുടെ വിജയം കൈവരിച്ച തമിഴ്നാട്ടിലെ പാർട്ടി കേരളത്തിൽ പ്രവർത്തനം ആരംഭിച്ചാൽ എന്താണ് കുഴപ്പമെന്ന് നടനും കേന്ദ്രമന്ത്രിയുമായ സുരേഷ് ഗോപി. അദ്ദേഹം വരുന്നുണ്ടെങ്കിൽ വരട്ടെയെന്നും, ലോകത്തിനും തമിഴ് ജനതയ്ക്കും ഗുണമുണ്ടാകട്ടെയെന്നും സുരേഷ് ഗോപി പറഞ്ഞു. കൂടാതെ മുഖ്യമന്ത്രി എന്ന നിലയിൽ വിജയ്ക്ക് പ്രവർത്തിക്കാൻ ജനങ്ങൾ അവസരം നൽകിയിട്ടുണ്ടെന്നും അദ്ദേഹം പ്രവർത്തിച്ച് സ്വയം തെളിയിക്കട്ടെയെന്നും സുരേഷ് ഗോപി കൂട്ടിച്ചേർത്തു. ചൊവ്വാഴ്ച മാധ്യമപ്രവർത്തകരുടെ ചോദ്യങ്ങൾക്ക് മറുപടി നൽകുകയായിരുന്നു അദ്ദേഹം.
“മുഖ്യമന്ത്രി വിജയ് പ്രവർത്തിക്കട്ടെ. അദ്ദേഹം പ്രവർത്തിച്ച് സ്വയം തെളിയിക്കട്ടെ. അതിനുമുമ്പ് അദ്ദേഹത്തെ വിമർശിക്കുന്നത് ശരിയാവില്ല. ജനങ്ങൾ അദ്ദേഹത്തിന് ഒരു അവസരം നൽകിയിട്ടുണ്ട്. അദ്ദേഹം നല്ല രീതിയിൽ പ്രവർത്തിക്കട്ടെ. വിജയം കൈവരിച്ച തമിഴ്നാട്ടിലെ പാർട്ടി കേരളത്തിൽ പ്രവർത്തനം ആരംഭിച്ചാൽ എന്താണ് പ്രശ്നം? അദ്ദേഹം വരുന്നുണ്ടെങ്കിൽ വരട്ടെ. അദ്ദേഹം ആഗ്രഹിക്കുന്ന ഇടത്തെല്ലാം വരട്ടെ, പ്രവർത്തനം തുടങ്ങട്ടെ. എല്ലാവരും വരട്ടെ, ലോകത്തിനും തമിഴ് ജനതയ്ക്കും ഗുണമുണ്ടാകട്ടെ.” സുരേഷ് ഗോപി പറഞ്ഞു.
വലിയ രാഷ്ട്രീയ അനിശ്ചിതത്വങ്ങൾക്കൊടുവിൽ മേയ് പത്തിനാണ് വിജയ് തമിഴ്നാടിന്റെ മുഖ്യമന്ത്രിയായി സത്യപ്രതിജ്ഞ ചെയ്തത്. ആദ്യമായി ജനവിധി തേടിയ തിരഞ്ഞെടുപ്പിൽ തന്നെ 108 സീറ്റുകൾ നേടി വൻ ഭൂരിപക്ഷത്തോടെയാണ് വിജയ്യുടെ തമിഴക വെട്രിക്കഴകം (ടിവികെ) അധികാരം പിടിച്ചെടുത്തത്. ഇതോടെ ദശാബ്ദങ്ങളായി തമിഴ് രാഷ്ട്രീയം ഭരിച്ചിരുന്ന ഡിഎംകെ, എഐഎഡിഎംകെ പാർട്ടികളുടെ ആധിപത്യത്തിനാണ് അന്ത്യമായത്.
കോൺഗ്രസ്, ഇടത് പാർട്ടികൾ, വിസികെ, ഐയുഎംഎൽ തുടങ്ങിയ കക്ഷികളുടെ പിന്തുണയോടെയാണ് പുതിയ സർക്കാർ രൂപീകരിച്ചിരിക്കുന്നത്.വ്യത്യസ്ത രാഷ്ട്രീയ പ്രത്യയശാസ്ത്രങ്ങളിലുള്ളവരാണെങ്കിലും തെന്നിന്ത്യൻ സിനിമയിലെ സൂപ്പർതാരത്തിന്റെ രാഷ്ട്രീയ പ്രവേശനത്തെ ചലച്ചിത്ര ലോകം ഒന്നടങ്കം പിന്തുണയ്ക്കുന്നുണ്ട്. സുരേഷ് ഗോപിക്ക് പുറമെ കമൽഹാസൻ, ഖുശ്ബു തുടങ്ങി രാഷ്ട്രീയത്തിലും സിനിമയിലും സജീവമായ നിരവധി പ്രമുഖർ ഇതിനകം തന്നെ വിജയ്ക്ക് ആശംസകളുമായി രംഗത്തെത്തിയിട്ടുണ്ട്.