പുതിയ തലമുറയിലെ നടിമാരുടെ നൃത്തമികവിനെയും ആത്മവിശ്വാസത്തെയും പുകഴ്ത്തി നടിയും നർത്തകിയുമായ ഷംന കാസിം. യുവനടിമാരിൽ തനിക്കേറ്റവും പ്രിയപ്പെട്ടത് മമിത ബൈജുവിനെയും ശ്രീലീലയെയുമാണെന്ന് വ്യക്തമാക്കിയ ഷംന, ചലച്ചിത്ര മേഖലയിൽ സ്ത്രീകളുടെ നിലപാടുകളിലുണ്ടായ വിപ്ലവാത്മകമായ മാറ്റങ്ങളെക്കുറിച്ചും സംസാരിച്ചു.
കേരള ഫിലിം ഇൻഡസ്ട്രി സംഘടിപ്പിച്ച ഒരു സാംസ്കാരിക പരിപാടിക്കിടെയാണ് മമിത ബൈജുവിന്റെ ഡാൻസ് നേരിട്ട് കാണാൻ ഇടയായതെന്ന് ഷംന ഓർത്തെടുത്തു. അതുവരെ മമിത ഒരു നർത്തകിയാണെന്ന കാര്യം തനിക്കറിയില്ലായിരുന്നുവെന്നും, വേദിയിലെ പ്രകടനം കണ്ട് താൻ പൂർണ്ണമായും അമ്പരന്നുപോയെന്നും താരം വ്യക്തമാക്കി. ക്ലാസിക്കൽ ഡാൻസ് പകർന്നുനൽകിയ മികവാണ് മമിതയുടെ പ്രകടനത്തിലുള്ളതെന്നും, നൃത്തത്തോടുള്ള പുതിയ തലമുറയുടെ സമീപനം തികച്ചും വ്യത്യസ്തവും പുതുമയേറിയതുമാണെന്നും ഷംന കൂട്ടിച്ചേർത്തു.
മമിതയ്ക്ക് പുറമെ തെലുങ്ക് നടി ശ്രീലീലയുടെ ഡാൻസിനെയും ഷംന പ്രശംസിച്ചു. മുൻകാലങ്ങളിൽ ‘സ്പെഷ്യൽ ഗാനങ്ങളിൽ’ അഭിനയിക്കുന്നത് തങ്ങളുടെ അന്തസ്സിന് ചേർന്നതല്ലെന്ന് കരുതി പ്രധാന നായികമാർ മാറിനിൽക്കാറുണ്ടായിരുന്നു. അത്തരം പാട്ടുകൾക്കായി പ്രത്യേക അഭിനേതാക്കളെയായിരുന്നു ഉൾപ്പെടുത്തിയിരുന്നത്. എന്നാൽ നിലവിൽ ആ മനോഭാവത്തിൽ വലിയ മാറ്റം വന്നിട്ടുണ്ടെന്ന് ഷംന ചൂണ്ടിക്കാട്ടി.
സ്ത്രീകൾ തങ്ങളുടെ അവകാശങ്ങളെക്കുറിച്ചും ഇത്തരം ചിന്താഗതികൾക്ക് പിന്നിലെ സാമൂഹിക സാഹചര്യങ്ങളെക്കുറിച്ചും കൂടുതൽ ബോധവതികളായതാണ് ഈ മാറ്റത്തിന് കാരണമെന്നും ‘സിനിമ എക്സ്പ്രസിന്’ നൽകിയ അഭിമുഖത്തിൽ ഷംന വ്യക്തമാക്കി. രജനികാന്ത് കേന്ദ്രകഥാപാത്രമാകുന്ന ‘ജയിലർ 2’ ആണ് ഷംനയുടേതായി ഇനി പുറത്തിറങ്ങാനുള്ള പ്രധാന ചിത്രം.