പാൻ മസാലയുടെ പരസ്യത്തിൽ അഭിനയിച്ചതിൽ കോടതിയിൽ വിശദീകരണം നൽകി ബോളിവുഡ് നടൻ സൽമാൻ ഖാൻ. താൻ സിൽവർ കോട്ടിങ്ങുള്ള ഏലക്കയാണ് പരസ്യം ചെയ്തതെന്നും ഗുഡ്ക അല്ല എന്നും അദ്ദേഹം കോടതിയിൽ വാദിച്ചു. കോട്ട ഉപഭോക്ത്യ കോടതിയിലാണ് അദ്ദേഹം സമഗ്രമായ മറുപടി നൽകിയത്. വിഷയത്തിൽ സൽമാൻ ഖാൻ അന്വേഷണം ആവശ്യപ്പെട്ടിട്ടുണ്ട്.
തെറ്റായ കാരണങ്ങൾ പറഞ്ഞ് സൽമാൻ ഖാനെ പരാതിക്കാരൻ ഈ വിഷയത്തിലേക്ക് വലിച്ചിഴച്ചതാണെന്ന് സൽമാന്റെ ഖാന്റെ അഭിഭാഷകൻ ആശിഷ് ദുബെ പറഞ്ഞു. പരാതി പരിഗണിക്കാൻ ഉപഭോക്തൃ കമ്മീഷന് അധികാരമില്ലെന്നും, സൽമാൻ ഖാൻ പാൻ മസാലയുടെ നിർമാതാവോ സേവനദാതാവോ അല്ലാത്തതിനാൽ, അദ്ദേഹത്തെ കേസിൽ ഉൾപ്പെടുത്തുന്നത് നിയമപരമായി ന്യായീകരിക്കാനാവില്ലെന്നും അദ്ദേഹം വാദിച്ചു. കേസിൽ ഡിസംബർ 9-നാണ് അടുത്ത വാദം കേൾക്കൽ.
കുങ്കുമം ചേർത്ത “കുങ്കുമം ചേർത്ത ഏലക്ക”, “കുങ്കുമം ചേർത്ത പാൻ മസാല” എന്നിവ പ്രോത്സാഹിപ്പിക്കുന്ന ഒരു പരസ്യത്തിൽ നിന്നാണ് ഈ വിവാദത്തിന്റെ തുടക്കം. സൽമാൻ ഖാനും കമ്പനിയും പൊതുജനങ്ങളെ തെറ്റിദ്ധരിപ്പിക്കുകയാണെന്ന് ആരോപിച്ച് കോട്ടയിലെ ബിജെപി നേതാവും അഭിഭാഷകനുമായ ഇന്ദർ മോഹൻ സിംഗ് ഹാനി പരാതി നൽകിയിരുന്നു. 5 രൂപയുടെ പാക്കറ്റിൽ യഥാർത്ഥ കുങ്കുമപ്പൂവ് ഉപയോഗിക്കാൻ സാധ്യമല്ലെന്നാണ് അദ്ദേഹം പരാതിയിൽ പറഞ്ഞിരുന്നത്. ഇത്തരം പരസ്യങ്ങൾ പാൻ മസാലയും പുകയില ഉൽപ്പന്നങ്ങളും ഉപയോഗിക്കാൻ യുവാക്കളെ പ്രോത്സാഹിപ്പിക്കുന്നുവെന്നും, ഇത് ഗുരുതരമായ ആരോഗ്യ പ്രത്യാഘാതങ്ങൾ ഉണ്ടാക്കുമെന്നും അദ്ദേഹം മുന്നറിയിപ്പ് നൽകി.
മറ്റ് രാജ്യങ്ങളിലെ പ്രമുഖരോ സിനിമാ താരങ്ങളോ ശീതളപാനീയങ്ങൾ പോലും പ്രോത്സാഹിപ്പിക്കുന്നില്ല. എന്നാൽ ബോളിവുഡ് താരങ്ങൾ പുകയിലയും പാൻ മസാലയും പ്രോത്സാഹിപ്പിക്കുന്നു. വായിലെ അർബുദത്തിന് പ്രധാന കാരണങ്ങളിലൊന്നാണ് പാൻ മസാല, അതിനാൽ യുവാക്കൾക്ക് തെറ്റായ സന്ദേശം നൽകരുതെന്ന് അവരോട് അഭ്യർത്ഥിക്കുന്നു എന്നും ഹാനി എഎൻ.ഐയോട് പറഞ്ഞു. തുടർന്ന് ആശങ്കകൾ കണക്കിലെടുത്ത കോടതി സൽമാൻ ഖാനും പാൻ മസാല കമ്പനിക്കും നോട്ടീസ് അയയ്ക്കുകയായിരുന്നു.
അതേസമയം, സൽമാൻ ഖാന് വേണ്ടി സമർപ്പിച്ച മറുപടിയിൽ പരാതിക്കാരനായ പ്രദീപ് സിംഗ് ഹാനി എതിർപ്പ് പ്രകടിപ്പിച്ചു. രേഖയിലെ ഒപ്പുകൾ സൽമാൻ ഖാൻ്റെ യഥാർത്ഥ ഒപ്പുകളായി തോന്നുന്നില്ലെന്ന് അദ്ദേഹം വാദിച്ചു.