സൈബർ ലോകം യാതൊരു വിധ കരുണയും കാണിക്കാതിരുന്നൊരു താരപുത്രൻ. ആഡംബരങ്ങളിൽ നിന്നും ആഢ്യത്തിൽ നിന്നും വഴി മാറി നടക്കാനിഷ്ടപ്പെട്ടത് പോലും വെറും പ്രകടനമാണെന്ന് പറഞ്ഞ് ഉറക്കെ വിളിച്ചധിക്ഷേപിച്ചോരു ലോകം. മലയാള സിനിമ അടക്കി വാഴുന്ന താര രാജാവിന്റെ മകന് അഹങ്കാരമൊരല്പം ഇല്ലാത്തതും വലിയൊരു കുറവ് തന്നെ. തുടർച്ചയായ പരാജയങ്ങളിൽ അച്ഛനെ പറയിപ്പിക്കാൻ എന്ന് വരെ പഴികേട്ടു. ഒടുവിൽ കളിയാക്കിയ മനുഷ്യരെ കൊണ്ട് എഴുന്നേറ്റ് നിന്ന് കയ്യടിപ്പിച്ച സാധാരണക്കാരിൽ സാധാരണക്കാരനായൊരു താര പുത്രൻ. പറഞ്ഞു വരുന്നത് പ്രണവ് മോഹൻലാലിനെ കുറിച്ചാണ്. മലയാളികളുടെ പ്രിയപ്പെട്ട ‘അപ്പു’. ആ വിനയത്തിനും നന്മയ്ക്കും മുന്നിൽ ഇന്ന് വിമർശകർ പോലും തോറ്റുപോയിരിക്കുന്നു. താരരാജകുമാരന് സെല്ലുലോയ്ഡിന്റെ ഹൃദയം നിറഞ്ഞ ജന്മദിനാശംസകൾ.
ഇന്ത്യൻ സിനിമയിലെ തന്നെ സമാനതകളില്ലാത്ത നടൻ മോഹൻലാലിന്റെ മകൻ എന്ന വിലാസത്തിൽ ജനിച്ച നാൾ മുതൽ ക്യാമറക്കണ്ണുകളും പൊതുജനങ്ങളും പിന്തുടരുന്ന ഒരു ജീവിതമായിരുന്നു അദ്ദേഹത്തിന്റേത്. എന്നാൽ, ഈ താരപ്പകിട്ടുകളുടെയോ പ്രശസ്തിയുടേയോ യാതൊരു ബാധ്യതയുമില്ലാതെ, ഹിമാലയത്തിലെ കാറ്റും തോളിലൊരു ബാഗുമായി ലോകം ചുറ്റാൻ ഇഷ്ടപ്പെടുന്ന, സിനിമയെ വെറുമൊരു തൊഴിലായി മാത്രം കാണുന്ന ഒരു മനുഷ്യനാണ് പ്രണവ്.
ബാലതാരമായി ‘ഒന്നാമൻ’ എന്ന ചിത്രത്തിലും ‘പുനർജനി’ എന്ന ചിത്രത്തിലും അഭിനയിച്ച് മികച്ച ബാലതാരത്തിനുള്ള സംസ്ഥാന അവാർഡ് വാങ്ങി പ്രണവ് നേരത്തെ തന്നെ കഴിവ് തെളിയിച്ചിരുന്നു. എങ്കിലും ജിത്തു ജോസഫിന്റെ സംവിധാനത്തിൽ ‘ആദി’ എന്ന ചിത്രത്തിലൂടെ നായകനായി അരങ്ങേറുമ്പോൾ മലയാളി പ്രേക്ഷകർക്ക് വലിയ പ്രതീക്ഷകളായിരുന്നു. പ്രതീക്ഷകൾ തെറ്റിയില്ല, ഒരു ആക്ഷൻ ത്രില്ലറായ ‘ആദി’ തിയേറ്ററുകളിൽ വലിയ വിജയമായി മാറി. പ്രത്യേകിച്ച് ചിത്രത്തിലെ പാർക്കർ ആക്ഷൻ രംഗങ്ങൾ പ്രണവ് സ്വയം ചെയ്തത് പ്രേക്ഷകരെ അത്ഭുതപ്പെടുത്തി. ലാലേട്ടന്റെ മകൻ എന്ന നിലയിൽ ഒരു മാസ്സ് എൻട്രിക്ക് പകരം, തന്റെ ശാരീരികക്ഷമതയും പ്രകടനവും കൊണ്ട് പ്രണവ് ആദ്യ സിനിമ തന്നെ വിജയമാക്കി മാറ്റി. പക്വതയാർന്ന അഭിനയവും ലളിതമായ പെരുമാറ്റവും കൊണ്ട് പ്രണവ് ആദ്യ ചിത്രത്തിലൂടെ തന്നെ ആരാധകരെ നേടിയെടുത്തു.
ആദ്യ സിനിമ വൻ വിജയമായെങ്കിലും തൊട്ടടുത്ത ചിത്രങ്ങൾ പ്രണവിന് കരിയറിൽ വലിയ തിരിച്ചടികളാണ് നൽകിയത്. അരുൺ ഗോപി സംവിധാനം ചെയ്ത ‘ഇരുപത്തിയൊന്നാം നൂറ്റാണ്ട്’ എന്ന ചിത്രം ബോക്സ് ഓഫീസിൽ പരാജയപ്പെട്ടു. മോഹൻലാലിന്റെ കരിയറിലെ ലാൻഡ്മാർക്ക് ചിത്രമായ ‘ഇരുപതാം നൂറ്റാണ്ടിന്റെ’ പേരിനോട് സാമ്യമുള്ളതുകൊണ്ട് തന്നെ വലിയ ഹൈപ്പിലാണ് ഈ ചിത്രം വന്നത്. എന്നാൽ ദുർബലമായ തിരക്കഥയും മേക്കിംഗും കാരണം ചിത്രം നിരാശപ്പെടുത്തി. ഇതിനുപിന്നാലെ പ്രണവിനെതിരെ കടുത്ത സൈബർ ആക്രമണങ്ങളും ട്രോളുകളും ഉയർന്നു വന്നു. പ്രണവിന് ഭാവപ്രകടനങ്ങൾ പോരാ, ഡയലോഗ് ഡെലിവറി ശരിയല്ല എന്ന തരത്തിൽ കടുത്ത വിമർശനങ്ങൾ സോഷ്യൽ മീഡിയയിൽ നിറഞ്ഞു. അച്ഛനായ മോഹൻലാലിന്റെ അഭിനയ പ്രതിഭയുമായി പ്രണവിനെ നിരന്തരം താരതമ്യം ചെയ്ത് അപഹസിക്കാൻ പലരും മുതിർന്നു. കഴിവില്ലാതെ അച്ഛന്റെ പേരിൽ മാത്രം സിനിമയിൽ നിൽക്കുന്നു എന്ന രീതിയിലുള്ള ആക്ഷേപങ്ങളും പ്രണവിന് നേരിടേണ്ടി വന്നു. എന്നാൽ ഈ സൈബർ ആക്രമണങ്ങളോടോ നെഗറ്റീവ് കമന്റുകളോടോ പ്രണവ് ഒരിക്കലും പ്രതികരിച്ചില്ല. സിനിമ കഴിഞ്ഞാൽ ഫോൺ പോലും മാറ്റിവെച്ച് യാത്രകൾ പോകുന്ന പ്രണവിന് ഈ ലോകത്തെ കോലാഹലങ്ങൾ ബാധകമേ ആയിരുന്നില്ല.
വിമർശകരുടെ വായടപ്പിച്ചുകൊണ്ട് പ്രണവ് നടത്തിയ ഗംഭീര തിരിച്ചുവരവായിരുന്നു വിനീത് ശ്രീനിവാസൻ സംവിധാനം ചെയ്ത ‘ഹൃദയം’. പ്രണവ് എന്ന നടനിലെ പ്രണയ ഭാവങ്ങളെയും ഇമോഷൻസിനെയും ഏറ്റവും ഭംഗിയായി വിനീത് സ്ക്രീനിലെത്തിച്ചു. അരുൺ നീലകണ്ഠൻ എന്ന കഥാപാത്രത്തിന്റെ ക്യാമ്പസ് ജീവിതവും, പ്രണയവും, തകർച്ചയും, പിന്നീട് അയാൾ ഒരു പ്രൊഫഷണൽ ഫോട്ടോഗ്രാഫറായി മാറുന്നതുമെല്ലാം മലയാളി പ്രേക്ഷകർ നെഞ്ചിലേറ്റി. ചിത്രം 100 കോടി ക്ലബ്ബിൽ ഇടം നേടുകയും, പ്രണവിന്റെ കരിയറിലെ ഏറ്റവും വലിയ വിജയമായി മാറുകയും ചെയ്തു. ‘ഹൃദയം’ തീയേറ്ററുകളിൽ സൃഷ്ടിച്ച തരംഗം പ്രണവിനെ മലയാളത്തിലെ മുൻനിര യുവനായകന്മാരുടെ നിരയിലേക്ക് ഉയർത്തി.
‘ഹൃദയ’ത്തിന് ശേഷം വീണ്ടും വിനീത് ശ്രീനിവാസന്റെ സംവിധാനത്തിൽ പ്രണവ് നായകനായ ചിത്രമാണ് ‘വർഷങ്ങൾക്ക് ശേഷം’. സിനിമയെയും മെഗാസ്റ്റാർ മോഹൻലാലിന്റെയും ശ്രീനിവാസന്റെയും സൗഹൃദത്തിന്റെയുമൊക്കെ പശ്ചാത്തലങ്ങളെ ഓർമ്മിപ്പിക്കുന്ന വിധത്തിലാണ് ഈ ചിത്രം ഒരുക്കിയത്. ചിത്രത്തിൽ മുരളി എന്ന കഥാപാത്രമായി പ്രണവ് മികച്ച പ്രകടനമാണ് കാഴ്ചവെച്ചത്. അച്ഛന്റെ ചെറുപ്പകാലത്തെ ഓർമ്മിപ്പിക്കുന്ന ചില മാനറിസങ്ങളും, സംഗീതത്തോട് ഭ്രാന്തമായ പ്രണയമുള്ള ആ കഥാപാത്രവും പ്രേക്ഷകരെ ആകർഷിച്ചു. സിനിമ തിയേറ്ററുകളിൽ വലിയ സാമ്പത്തിക വിജയം നേടുകയും, പ്രണവ് വീണ്ടും ബോക്സ് ഓഫീസിൽ തന്റെ സ്വാധീനം തെളിയിക്കുകയും ചെയ്തു. ഒരു നടൻ എന്ന നിലയിൽ പ്രണവിന്റെ ഗ്രാഫ് ഉയരുന്നതാണ് ഈ ചിത്രത്തിൽ കണ്ടത്.
പ്രണവിന്റെ അഭിനയജീവിതത്തിലെ ഏറ്റവും മനോഹരമായ അടയാളപ്പെടുത്തലുകളിൽ ഒന്നാണ് അതിനു ശേഷം വന്ന ‘Dies Irae’ എന്ന ചിത്രത്തിലെ പ്രകടനം. ആഴമേറിയ വൈകാരിക തലങ്ങളുള്ള ആ കഥാപാത്രത്തെ തികഞ്ഞ അർപ്പണബോധത്തോടെയും സൂക്ഷ്മതയോടെയുമാണ് പ്രണവ് സ്ക്രീനിൽ എത്തിച്ചത്. കഥാപാത്രത്തിന്റെ മാനസിക സംഘർഷങ്ങളും നിശബ്ദമായ വേദനകളും പ്രേക്ഷകരുടെ ഹൃദയത്തിലേക്ക് നേരിട്ട് എത്തിക്കാൻ അദ്ദേഹത്തിന് സാധിച്ചു.
അതിഭാവുകത്വമില്ലാത്ത ശരീരഭാഷയും സംഭാഷണങ്ങളിലെ സ്വാഭാവികതയും ആ പ്രകടനത്തിന് കൂടുതൽ മിഴിവേകി. വെല്ലുവിളികൾ നിറഞ്ഞ രംഗങ്ങളെപ്പോലും വളരെ പക്വതയോടെ കൈകാര്യം ചെയ്ത പ്രണവ്, ഒരു അഭിനേതാവെന്ന നിലയിലുള്ള തന്റെ വളർച്ച ഈ ചിത്രത്തിലൂടെ തെളിയിച്ചു കഴിഞ്ഞു.ഏറ്റവും ഒടുവിൽ മലയാളത്തിലെ ഏകകലത്തെയും വലിയ ഹിറ്റ് ചിത്രം എമ്പുരാനിൽ ക്ലൈമാക്സിൽ മോഹൻലാലിന്റെ ചെറുപ്പം ഭംഗിയാക്കികൊണ്ട് പ്രണവ് വലിയൊരു സൂചന നൽകിയിട്ടുണ്ട്. വിമർശകരത്രയും വായടച്ച് കണ്ടു കൊണ്ടിരിക്കുമെന്ന തലത്തിലേക്ക് താൻ വളർന്നുവെന്നൊരു സൂചന.
പ്രണവിനെ മറ്റുള്ള നടന്മാരിൽ നിന്നും വേറിട്ട് നിർത്തുന്നത് അദ്ദേഹത്തിന്റെ ജീവിതരീതി തന്നെയാണ്. സിനിമയിൽ നിന്ന് കിട്ടുന്ന പണം മുഴുവൻ യാത്രകൾക്കായി മാറ്റിവെക്കുന്ന ആളാണ് പ്രണവ്. ഹിമാലയൻ യാത്രകളും, യൂറോപ്പിലെ ബാക്ക്പാക്കിംഗും, മലകയറ്റവുമെല്ലാം പ്രണവിന്റെ ജീവിതത്തിന്റെ ഭാഗമാണ്. ഒരു സൂപ്പർതാരത്തിന്റെ മകനായിട്ടും യാതൊരു ആഡംബരങ്ങളുമില്ലാതെ സാധാരണക്കാരനായി ജീവിക്കാൻ അദ്ദേഹം ഇഷ്ടപ്പെടുന്നു. തനിക്ക് സിനിമയിൽ നിന്ന് ലഭിക്കുന്ന പ്രതിഫലത്തിന്റെ വലിയൊരു പങ്ക് ചാരിറ്റി പ്രവർത്തനങ്ങൾക്കായി പ്രണവ് രഹസ്യമായി മാറ്റിവെക്കാറുണ്ട്.
വിജയങ്ങളിൽ അഹങ്കരിക്കുകയോ, പരാജയങ്ങളിൽ തളരുകയോ, സൈബർ ആക്രമണങ്ങളിൽ കാലിടറുകയോ ചെയ്യാത്ത അപൂർവ്വം വ്യക്തിത്വങ്ങളിൽ ഒരാളാണ് പ്രണവ് മോഹൻലാൽ. സിനിമയെന്നത് തന്റെ ജീവിതത്തിലെ ഒരു ചെറിയ ഭാഗം മാത്രമാണെന്ന് വിശ്വസിക്കുന്ന, അതിനപ്പുറമുള്ള വലിയ ലോകത്തെ പ്രണയിക്കുന്ന പ്രണവ് പുതുതലമുറയ്ക്ക് ഒരു മാതൃകയാണ്. വരും വർഷങ്ങളിൽ കൂടുതൽ നല്ല കഥാപാത്രങ്ങളുമായി അദ്ദേഹം സ്ക്രീനിലെത്തട്ടെ എന്ന് ആശംസിക്കുന്നു. പ്രിയപ്പെട്ട പ്രണവിന്, ‘അപ്പു’വിന് ഹൃദയം നിറഞ്ഞ ജന്മദിനാശംസകൾ!