നിതേഷ് തിവാരി സംവിധാനം ചെയ്യുന്ന ബ്രഹ്മാണ്ഡ ചിത്രം ‘രാമായണ’യുടെ ട്രെയ്ലർ റിലീസ് തീയതി നീട്ടി. സാൻ ഡിയേഗോ കോമിക്-കോൺ പരിപാടിക്കിടെ ആഗോളതലത്തിൽ ട്രെയ്ലർ പുറത്തുവിടാനായിരുന്നു നേരത്തെ തീരുമാനിച്ചിരുന്നതെങ്കിലും നിലവിലെ സാഹചര്യങ്ങൾ കണക്കിലെടുത്ത് മാറ്റിവെക്കുകയാണെന്ന് നിർമാതാവ് നമിത് മൽഹോത്ര സോഷ്യൽ മീഡിയയിലൂടെ അറിയിച്ചു. ചിത്രത്തിന്റെ ആഗോള വിതരണത്തിനായി സോണി പിക്ചേഴ്സ് എന്റർടെയ്ൻമെന്റുമായി കൈകോർത്ത വിവരം പങ്കുവെച്ചുകൊണ്ടായിരുന്നു ഈ പ്രതികരണം.
ഡൽഹിയിൽ നടക്കുന്ന വിദ്യാർഥി പ്രക്ഷോഭത്തിന്റെ പശ്ചാത്തലത്തിലാണ് തീരുമാനമെന്നാണ് പ്രസ്താവനയിലെ വാക്കുകൾ സൂചിപ്പിക്കുന്നത്. “രാജ്യത്തെ യുവാക്കളാണ് നമ്മുടെ ഭാവി. നമ്മുടെ ഭാവി സംരക്ഷിക്കാനായി നമ്മളാൽ സാധ്യമാകുന്നതിന്റെ പരമാവധി ചെയ്യാം, ജയ് ഹിന്ദ്,” എന്ന് നിർമാതാവ് കുറിച്ചപ്പോൾ, “അമേസിങ്, ജയ് ഹോ” എന്ന് സംഗീത സംവിധായകൻ എ.ആർ. റഹ്മാൻ ഇതിന് താഴെ കമന്റ് ചെയ്തു.
അതേസമയം, പ്രക്ഷോഭത്തിലേക്ക് ജന ശ്രദ്ധ തിരിഞ്ഞിരിക്കുന്നതിനാൽ മാർക്കറ്റിങ് തന്ത്രത്തിന്റെ ഭാഗമായാണ് റിലീസ് മാറ്റിയതെന്നും, സോണി പിക്ചേഴ്സിന്റെ തന്നെ ‘സ്പൈഡർ-മാൻ: ബ്രാൻഡ് ന്യൂ ഡേ’യ്ക്കൊപ്പം ട്രെയ്ലർ പ്രീമിയർ ചെയ്യാനുള്ള നീക്കമാണിതെന്നും റിപ്പോർട്ടുകളുണ്ട്.
രൺബീർ കപൂർ, സായ് പല്ലവി, യഷ് എന്നിവർ പ്രധാന വേഷങ്ങളിലെത്തുന്ന ചിത്രം രണ്ട് ഭാഗങ്ങളായാണ് തിയേറ്ററുകളിലെത്തുന്നത്. ആദ്യ ഭാഗം 2026 ദീപാവലിക്കും, നിലവിൽ ചിത്രീകരണം പുരോഗമിക്കുന്ന രണ്ടാം ഭാഗം 2027 ദീപാവലിക്കും പുറത്തിറങ്ങും. പ്രൈം ഫോക്കസ് സ്റ്റുഡിയോസ്, വിഷ്വൽ ഇഫക്ട്സ് സ്റ്റുഡിയോ ഡിഎൻഇജി, യഷിന്റെ മോൺസ്റ്റർ മൈൻഡ് ക്രിയേഷൻസ് എന്നിവർ ചേർന്നാണ് ചിത്രം നിർമിക്കുന്നത്. ഓസ്കാർ ജേതാക്കളായ ഹാൻസ് സിമ്മറും എ.ആർ. റഹ്മാനുമാണ് ചിത്രത്തിന് സംഗീതമൊരുക്കുന്നത്.