ടെക്‌സാസ് ഫിലിം ഫാക്ടറിയുടെ ബാനറില്‍ അംജിത് എസ്.കെ, സിനീഷ് അലി പുതുശ്ശേരി, ഫിനോസ് ഇലച്ചോല, സമീര്‍ ചെമ്പായില്‍ എന്നിവര്‍ ചേര്‍ന്ന് നിര്‍മിച്ച്, ആരതി ഗായത്രി ദേവി തിരക്കഥ രചിച്ച് സംവിധാനം ചെയ്ത പുതിയ ചിത്രം ‘തേരി മേരി’യുടെ ഫസ്റ്റ് ലുക്ക് പോസ്റ്റര്‍ പുറത്തിറങ്ങി. മനോഹരമായ ബീച്ച് പശ്ചാത്തലത്തില്‍ നായികയും നായകനും നില്‍ക്കുന്ന പോസ്റ്ററാണ് നിരവധി സിനിമാതാരങ്ങളുടെ സോഷ്യല്‍ മീഡിയ പേജുകളിലൂടെ പ്രേക്ഷകര്‍ക്കിടയില്‍ എത്തിച്ചത്.
അനൂപ് മേനോന്‍ തിരക്കഥയും സംവിധാനവും നടത്തിയ ‘കിംഗ്ഫിഷ്’യ്ക്ക് ശേഷം ടെക്‌സാസ് ഫിലിം ഫാക്ടറി നിര്‍മിക്കുന്ന പുതിയ സിനിമയാണ് ‘തേരി മേരി’. ടൂറിസവുമായി ബന്ധപ്പെട്ട് പ്രവര്‍ത്തിക്കുന്ന രണ്ടു ചെറുപ്പക്കാരുടെ ഹൃദയസ്പര്‍ശിയായ കഥയാണ് ചിത്രത്തില്‍ അവതരിപ്പിക്കുന്നത്.
ശ്രീനാഥ് ഭാസിയും ഷൈന്‍ ടോം ചാക്കോയും കേന്ദ്രകഥാപാത്രങ്ങളെ അവതരിപ്പിക്കുന്ന ചിത്രത്തില്‍ തെലുങ്ക് ഇന്‍ഫ്‌ലുവന്‍സര്‍ ശ്രീരംഗസുധയും മലയാളികളുടെ പ്രിയതാരം അന്നാ രേഷ്മ രാജനും നായികമാരാവുന്നു. ഇര്‍ഷാദ് അലി, സോഹന്‍ സീനുലാല്‍, ബബിതാ ബാബു എന്നിവരും നിരവധി പുതുമുഖങ്ങളും ചിത്രത്തില്‍ പ്രധാന വേഷങ്ങളിലെത്തുന്നു. ചെറുപ്പത്തിന്റെ വികാരങ്ങളെയും കാഴ്ചപ്പാടുകളെയും ആഴത്തില്‍ അവതരിപ്പിക്കുന്നതായിരിക്കും സിനിമയുടെ പ്രധാന ആകര്‍ഷണം.
എക്‌സിക്യൂട്ടീവ് പ്രൊഡ്യൂസര്‍: അലക്‌സ് തോമസ്, അഡീഷണല്‍ സ്‌ക്രിപ്റ്റ്: അരുണ്‍ കാരി മുട്ടം, ക്രിയേറ്റീവ് ഡയറക്ടര്‍: വരുണ്‍ ജി. പണിക്കര്‍, സംഗീതം: കൈലാസ് മേനോന്‍, ഛായാഗ്രഹണം: ബിപിന്‍ ബാലകൃഷ്ണന്‍, എഡിറ്റിംഗ്: എം.എസ്. അയ്യപ്പന്‍ നായര്‍, ആര്‍ട്ട്: സാബുറാം, വസ്ത്രാലങ്കാരം: വെങ്കിട്ട് സുനില്‍, മേക്കപ്പ്: പ്രദീപ് ഗോപാലകൃഷ്ണന്‍, പ്രൊഡക്ഷന്‍ കണ്‍ട്രോളര്‍: ബിനു മുരളി, പ്രൊഡക്ഷന്‍ മാനേജേഴ്‌സ്: സജയന്‍ ഉദയന്‍കുളങ്ങര, സുജിത് വി.എസ്, പി.ആര്‍.ഒ: മഞ്ജു ഗോപിനാഥ്, ഡിസൈന്‍സ്: ആര്‍ട്ടോകാര്‍പസ്.
വര്‍ക്കല, കോവളം എന്നിവിടങ്ങളിലായി ചിത്രീകരണം പൂര്‍ത്തിയായ ‘തേരി മേരി’ ഉടന്‍ പ്രേക്ഷകരുടെ മുന്നിലേക്ക് എത്തും.