സോഷ്യൽ മീഡിയയിൽ തരംഗമായി മമ്മൂട്ടിയുടെ പുതിയ ലുക്ക്. ദുബായിൽ വെച്ചെടുത്ത ഹാഫ് സ്ലീവ് ട്രെൻഡി ബ്ലാക്ക് ഷർട്ടിൽ പുഞ്ചിരിതൂകി നിൽക്കുന്ന മമ്മൂട്ടിയുടെ ചിത്രമാണ് വൈറലായിരിക്കുന്നത്. “ഒരു പുഞ്ചിരി മാത്രം, മറ്റൊന്നും ആവശ്യമില്ല” എന്ന അടികുറിപ്പോട് കൂടി അദ്ദേഹത്തിൻ്റെ സന്തതസഹചാരിയായ ജോർജാണ് ചിത്രം പങ്കുവെച്ചിരിക്കുന്നത്. ഫൈസൽ ലമിയയാണ് ചിത്രം പകർത്തിയിരിക്കുന്നത്.
പുതിയ ലുക്കിൽ യുവാക്കളെപ്പോലും വെല്ലുന്ന സ്റ്റൈലിലാണ് മമ്മൂട്ടി പ്രത്യക്ഷപ്പെട്ടിരിക്കുന്നത്. ‘ഇപ്പോഴും മമ്മൂട്ടി തന്നെയാണ് മലയാളത്തിലെ ഏറ്റവും ചെറുപ്പക്കാരനായ നടൻ’ എന്നാണ് സോഷ്യൽ മീഡിയയിൽ വരുന്ന പ്രധാന കമൻ്റുകൾ. പ്രായം വെറും അക്കങ്ങൾ മാത്രമാണെന്ന് ഓരോ ചിത്രം പങ്കുവയ്ക്കുമ്പോഴും മമ്മൂട്ടി തെളിയിച്ചുകൊണ്ടിരിക്കുകയാണെന്ന് ആരാധകർ പറയുന്നു. നിമിഷങ്ങൾക്കകം തന്നെ ലക്ഷക്കണക്കിന് ലൈക്കുകളും ഷെയറുകളുമാണ് ചിത്രത്തിന് ലഭിച്ചുകൊണ്ടിരിക്കുന്നത്.
‘പാട്രിയറ്റ്’ സിനിമയുടെ പാക്കപ്പിനുശേഷം, ചെറിയൊരിടവേളയെടുത്ത് കുടുംബസമേതം ദുബായിലെത്തിയതാണ് മമ്മൂട്ടി. ഇതിനുശേഷം അടൂർ ഗോപാലകൃഷ്ണൻ ചിത്രത്തിലാണ് അദ്ദേഹം ജോയിൻ ചെയ്യുക. ‘പാട്രിയറ്റ്’ ആണ് ഇനി റിലീസാവാനിരിക്കുന്ന മമ്മൂട്ടി ചിത്രം. മമ്മൂട്ടിയും മോഹൻലാലും നീണ്ടൊരിടവേളയ്ക്കുശേഷം ഒരുമിക്കുന്നുവെന്ന പ്രത്യേകതയും ഇതിനുണ്ട്. പിന്നീട് ഖാലിദ് റഹ്മാൻ സംവിധാനം ചെയ്യുന്ന ചിത്രത്തിലും അദ്ദേഹം അഭിനയിക്കും. അതിനൊപ്പം രഞ്ജിത്ത് സംവിധാനം ചെയ്യുന്ന ചിത്രം, ‘ചത്ത പച്ച: ദ റിങ് ഓഫ് റൗഡീസ് എന്നിവയിലും അദ്ദേഹം അതിഥിതാരമായെത്തും.