പഹൽഗാം ആക്രമണത്തെ തുടർന്ന് ഇന്ത്യയുടെ ശക്തമായ പ്രതികരണങ്ങളെ പിന്തുണച്ച് നടൻ ജയസൂര്യ നടത്തിയ പ്രതികരണം വൈറലാകുന്നു. ഇന്ത്യയുടെ ദേഹത്ത് തൊട്ടാൽ പിന്നെ അവന്റെ വിധിയെഴുതുന്നത് ഇന്ത്യയായിരിക്കും എന്നായിരുന്നു നടന്റെ ശക്തമായ പ്രതികരണം. കൊല്ലം കോട്ടാരക്കര മഹാദേവ ക്ഷേത്രോത്സവത്തിൽ പങ്കെടുത്ത് സംസാരിക്കുകയായിരുന്നു ജയസൂര്യ.
ക്ഷേത്രോത്സവത്തിൽ താരം സംസാരിച്ചുകൊണ്ടിരിക്കെ കാണികളിൽ ഒരാൾ ‘ആട്’ എന്ന സിനിമയിലെ പ്രശസ്തമായ ഡയലോഗ് പറയാൻ ആവശ്യപ്പെട്ടപ്പോഴാണ് ജയസൂര്യ വിഷയത്തെ കുറിച്ച് പ്രതികരിച്ചത്.
“ആട് സിനിമയിൽ ഒരു ഡയലോഗ് ഉണ്ട് — എന്റെ ദേഹത്തു തൊട്ടാൽ അവന്റെ വിധി എഴുതുന്നത് പാപ്പനായിരിക്കും. അതുപോലെ ഇന്ത്യയുടെ ദേഹത്ത് തൊട്ടാൽ അവന്റെ വിധിയെഴുതുന്നത് ഇന്ത്യ ആയിരിക്കും. അതുപോലെ ഇപ്പോൾ ഇന്ത്യ-പാകിസ്താൻ തമ്മിൽ വലിയൊരു സംഘർഷം നടക്കുകയാണ്. തീർച്ചയായും അത് ഉടൻ തന്നെ പരിഹരിക്കപ്പെടാൻ നമുക്ക് പ്രാർത്ഥിക്കാം,” ജയസൂര്യ പറഞ്ഞു. രാജ്യത്ത് നില നിൽക്കുന്ന സംഘർഷാവസ്ഥ ഉടൻ അവസാനിക്കട്ടെയെന്നും, സമാധാനവും സൗഹാർദ്ദവുമാണ് ഏറ്റവും ആവശ്യമെന്നും ജയസൂര്യ കൂട്ടിച്ചേർത്തു.