ആണുങ്ങൾ കരയാൻ പാടില്ലെന്ന പരമ്പരാഗത സാമൂഹിക ധാരണകൾക്കെതിരെ തുറന്നടിച്ച് നടൻ ദുൽഖർ സൽമാൻ. വികാരങ്ങൾ അടക്കിവെക്കാതെ സന്തോഷമുള്ളപ്പോഴും സങ്കടമുള്ളപ്പോഴും മനസ്സുതുറന്ന് കരയണമെന്നാണ് തന്റെ പക്ഷമെന്ന് താരം വ്യക്തമാക്കി. പുതിയ ചിത്രമായ ‘അയാം ഗെയിമി’ന്റെ തെലുങ്ക് പ്രമോഷൻ ചടങ്ങിനിടെ ഒരു ആരാധകന്റെ ചോദ്യത്തിന് മറുപടി നൽകുകയായിരുന്നു അദ്ദേഹം. നമ്മുടെ സമൂഹത്തിന്റെ കാഴ്ചപ്പാടിൽ പുരുഷന്മാർക്ക് അവരുടെ ബലഹീനതകൾ മറ്റുള്ളവരുടെ മുന്നിൽ കാണിക്കാനോ കരയാനോ കഴിയില്ലല്ലോ എന്ന ചോദ്യത്തോടായിരുന്നു ദുൽഖറിന്റെ ഈ വ്യക്തമായ പ്രതികരണം.
കരയുന്നത് കൊണ്ട് ആരുടെയും ആണത്തം കുറഞ്ഞുപോകില്ലെന്ന് വ്യക്തമാക്കിയ ദുൽഖർ, ജീവിതത്തിൽ എത്ര കണ്ണീരൊഴുക്കി എന്നതിന്റെ അടിസ്ഥാനത്തിലല്ല ഒരാളുടെ ‘ആണത്തം’ അളക്കേണ്ടതെന്നും കൂട്ടിച്ചേർത്തു. സ്വന്തം നിർമ്മാണ പങ്കാളിത്തത്തിൽ വന്ന ഒരു സിനിമ പരാജയപ്പെട്ടപ്പോൾ താനും സഹനിർമ്മാതാവായ ജോമും ഒരുമിച്ച് കരഞ്ഞ അനുഭവവും അദ്ദേഹം പങ്കുവെച്ചു. സങ്കടം കരഞ്ഞുതീർത്ത ശേഷം ഉച്ചഭക്ഷണത്തിന് ശേഷം സാധാരണപോലെ കാര്യങ്ങൾ സംസാരിച്ച് മുന്നോട്ടുപോയെന്നും താരം ഓർത്തെടുത്തു. ദുൽഖറിന്റെ ഈ സത്യസന്ധമായ മറുപടി സോഷ്യൽ മീഡിയയിൽ വലിയ സ്വീകാര്യതയാണ് നേടുന്നത്.
അതേ സമയം അദ്ദേഹത്തിന്റെ പുതിയ ചിത്രമായ നഹാസ് ഇദയത്ത് സംവിധാനം ചെയ്യുന്ന ‘അയാം ഗെയിം’ സെപ്റ്റംബർ 3-ന് ലോകമെമ്പാടുമുള്ള തിയേറ്ററുകളിൽ റിലീസ് ചെയ്യും. 2023-ൽ പുറത്തിറങ്ങിയ ‘കിംഗ് ഓഫ് കൊത്ത’യ്ക്ക് ശേഷം മലയാളത്തിലേക്ക് എത്തുന്ന ദുൽഖർ ചിത്രമാണിത്. ‘മഹാനടി’, ‘സീതാ രാമം’, ‘ലക്കി ഭാസ്കർ’ തുടങ്ങിയ ചിത്രങ്ങളിലൂടെ തെലുങ്കിലും വലിയ ആരാധകവൃന്ദത്തെ സൃഷ്ടിക്കാൻ ദുൽഖറിന് സാധിച്ചിട്ടുണ്ട്. മലയാളത്തിന് പുറമെ തമിഴ്, തെലുങ്ക്, കന്നഡ ഭാഷകളിൽ പുറത്തിറങ്ങുന്ന ചിത്രത്തിന്റെ സർപ്രൈസ് ഘടകങ്ങൾ നിറഞ്ഞ ട്രെയിലർ ഇതിനകം തന്നെ പ്രേക്ഷകർക്കിടയിൽ വലിയ പ്രതീക്ഷ ഉയർത്തിയിട്ടുണ്ട്.