ബാലതാരമായി വന്ന് മലയാള സിനിമയുടെ മുൻ നിര നായികാ പദവിയിലേക്ക് അനായാസം നടന്നു കയറിയ താരമാണ് നടി ‘ജോമോൾ’. സ്വാഭാവികമാർന്ന അഭിനയ ശൈലി കൊണ്ട് തന്റേതായൊരിടം മലയാള സിനിമയിൽ ജോമോൾ ഇന്നും കാത്തു സൂക്ഷിക്കുന്നുണ്ട്. “എന്ന് സ്വന്തം ജാനകിക്കുട്ടിയിലെ” ജാനകിയും, “മയിൽപ്പീലിക്കാവിലെ” ഗായത്രിയും, കുട്ടിമാണിയും, “പഞ്ചാബി ഹൗസിലെ” സുജാതയും, “നിറത്തിലെ” വർഷയുമൊക്കെ ഇന്നും ഗൃഹാതുരത്വമുണർത്തുന്ന കഥാപാത്രങ്ങളാണ്. ഒരു നീണ്ട ഇടവേളയ്ക്ക് ശേഷം ഉണ്ണിമുകുന്ദൻ ചിത്രം ജയ് ഗണേഷിലൂടെ തിരികെ വന്നപ്പോഴും അവരുടെ അഭിനയ പ്രതിഭയ്ക്ക് കോട്ടമൊന്നും തട്ടിയിട്ടില്ല. ഇന്ന് ജോമോളുടെ ജന്മദിനമാണ്. മലയാളികളുടെ പ്രിയപ്പെട്ട നായികക്ക് സെല്ലുലോയ്ഡിന്റെ ഹൃദയം നിറഞ്ഞ ജന്മദിനാശംസകൾ.
ഇന്ന് ഗൗരി ചന്ദ്രശേഖര പിള്ള എന്ന പേരിൽ അറിയപ്പെടുന്ന ജോ മോൾ 1982 ഒക്ടോബര് 4 ന് കോഴിക്കോട് കെ. എ. ജോൺ – അൽഫോൻസ ദമ്പതികളുടെ മകളെയാണ് ജനിക്കുന്നത്. വളരെ ചെറുപ്പത്തിലേ സിനിമ ലോകത്ത് അരങ്ങേറ്റം കുറിച്ചു. 1989-ൽ പുറത്തിറങ്ങിയ എം. ടി. വാസുദേവൻ നായരുടെ കഥയും ഹരിഹരന്റെ സംവിധാനവും ചേർന്ന ക്ലാസിക് ചിത്രം “ഒരു വടക്കൻ വീരഗാഥ”യിലൂടെയായിരുന്നു അത്.
അത് വെറും അരങ്ങേറ്റമായിരുന്നില്ല, മലയാളികൾ തലമുറകൾ കഴിഞ്ഞും ഓർത്തിരിക്കും വിധത്തിലുള്ള ഒരു കഥാപാത്രമായിരുന്നു ചിത്രത്തിലെ ഉണ്ണിയാർച്ചയുടെ ബാല്യം. ബാല്യത്തിന്റെ മനോഹരമായ സ്വാഭാവികതയും മുഖത്ത് നിറഞ്ഞിരുന്ന ചിരിയും ജോമോളിനെ മലയാളികളുടെ ഇഷ്ടതാരമാക്കി മാറ്റി. തുടർന്ന് “അനഘ”, “മൈഡിയർ മുത്തച്ഛൻ” എന്നിവയിലൂടെ ബാലതാരമായി കൂടുതൽ പ്രേക്ഷക ശ്രദ്ധ നേടിയെടുത്തു.
1998-ൽ, വീണ്ടും എം.ടി – ഹരിഹരൻ കൂട്ടുകെട്ടിന്റെ സിനിമയായ “എന്നു സ്വന്തം ജാനകിക്കുട്ടി” യിലൂടെ ജോമോൾ നായികയായി മലയാള സിനിമയിൽ പ്രവേശിച്ചു. മലയാളത്തിലെ കരുത്തുറ്റ സാഹിത്യകാരന്റെ കഥയും മഹാനായ സംവിധായകന്റെ ദൃശ്യാവിഷ്കാരവും ചേർന്ന ആ സിനിമയിൽ ജോമോളിന്റെ കഥാപാത്രമായ ജാനകിക്കുട്ടി, അവളുടെ അഭിനയജീവിതത്തിന് ഏറ്റവും വലിയ വഴിത്തിരിവായി മാറി.
ആ ചിത്രത്തിലെ പ്രകടനത്തിന് മികച്ച നടിക്കുള്ള കേരള സംസ്ഥാന ചലച്ചിത്ര പുരസ്കാരവും, കൂടാതെ ദേശീയ അവാർഡ് ജൂറി സ്പെഷ്യൽ മെൻഷനും ജോമോൾക്ക് ലഭിച്ചു. ഇത്രയും ചെറുപ്പത്തിൽ വലിയൊരു അവാർഡ് സ്വന്തമാക്കിയ ജോമോൾ മലയാള സിനിമയുടെ പ്രതീക്ഷയായി മാറി.
1998 മുതൽ 2002 വരെ, മലയാള സിനിമയിൽ തുടർച്ചയായി ശ്രദ്ധേയ കഥാപാത്രങ്ങളെ ജോമോൾ അവതരിപ്പിച്ചു . “മയിൽപ്പീലിക്കാവ്”, “സ്നേഹം”, “നിറം”, “ദീപസ്തംഭം മഹാശ്ചര്യം”, “ഉസ്താദ്”, “സായാഹ്നം”, “അരയന്നങ്ങളുടെ വീട്” തുടങ്ങി നിരവധി ചിത്രങ്ങൾ അവളുടെ പേരിലുണ്ട്. ചോക്ലേറ്റ് ലുക്കുള്ള ഹീറോകളും, പുതുമുഖ നായികമാരും നിറഞ്ഞിരുന്ന ആ കാലഘട്ടത്തിൽ, അമ്മമാർക്കും പെൺകുട്ടികൾക്കും ഒരുപോലെ ഇഷ്ടപ്പെട്ട സുന്ദരിയും സംസ്കാരസമ്പന്നയുമായ ഒരു നായികയായി ജോമോൾ അറിയപ്പെട്ടു.
തുടർന്ന് വന്ന 1999-ലെ “നിറം” എന്ന ഫാസിൽ സിനിമയിൽ കുഞ്ചാക്കോ ബോബനൊപ്പം അഭിനയിച്ച ജോമോൾ, യുവജന പ്രേക്ഷകർക്കിടയിൽ പ്രത്യേക പ്രിയങ്കരിയായി. “ദീപസ്തംഭം മഹാശ്ചര്യം”ത്തിലെ ഇന്ദു =വിന്റെ കരളിലുറഞ്ഞ പ്രകടനം, ഇന്നും മലയാള സിനിമയിലെ മികച്ച സ്ത്രീ കഥാപാത്രങ്ങളിൽ ഒന്നായി വിലയിരുത്തപ്പെടുന്നു.
2002-ൽ ജോമോൾ തന്റെ സ്വകാര്യജീവിതത്തിലേക്ക് വലിയൊരു തിരിഞ്ഞുമാറ്റം വരുത്തി. മർച്ചന്റ് നേവിയിൽ എഞ്ചിനീയറായിരുന്ന ചന്ദ്രശേഖര പിള്ളയെ വിവാഹം കഴിച്ചു. വിവാഹശേഷം അവൾ ഹിന്ദുമതം സ്വീകരിച്ച് ഗൗരി ചന്ദ്രശേഖര പിള്ള എന്ന പേരും സ്വീകരിച്ചു.
ഇന്ന് മക്കളായ ആര്യയും ആർജയുമൊത്ത് നല്ലൊരു കുടുംബിനിയായി കൂടി കഴിയുകയാണ് ജോമോൾ.
വിവാഹശേഷം ജോമോൾ സിനിമയിൽ നിന്ന് ഒരുപാട് കാലം വിട്ടുനിന്നു. എന്നാൽ അഭിനയത്തിന്റെ ആകർഷണം അവളെ വീണ്ടും സിനിമയിലേക്ക് കൊണ്ടുവന്നു. 2017-ൽ വിപിൻ പ്രകാശ് സംവിധാനം ചെയ്ത “കെയർഫുൾ” എന്ന ചിത്രത്തിലൂടെയാണ് അവൾ തിരിച്ചുവന്നത്. തുടർന്ന് “ജയ് ഗണേഷ്” (2024) പോലുള്ള ചിത്രങ്ങളിലും അഭിനയിച്ചു. അതിനു മുൻപ് തന്നെ ചില ടെലിവിഷൻ സീരിയലുകളിലും അവൾ അഭിനയിച്ചിരുന്നു. കുടുംബജീവിതവും അഭിനയം ഒരുപോലെ സംയോജിപ്പിച്ച് മുന്നേറുന്ന ഒരു കലാകാരിയായാണ് ഇന്ന് ജോമോൾ അറിയപ്പെടുന്നത്.
2023-ൽ ജോമോൾ ഒരു പുതിയ മേഖലയിലും കഴിവ് തെളിയിച്ചു. “കാതൽ – ദി കോർ” എന്ന സിനിമയിൽ നായികയായ ജ്യോതികയ്ക്ക് വേണ്ടി ശബ്ദം നൽകി. മലയാളത്തിലെ നായികമാർക്ക് ഡബ്ബിങ് മേഖലയിൽ പ്രവേശിക്കുന്നതു വളരെ അപൂർവമായിരിക്കെ, ജോമോളിന്റെ ശബ്ദഭാവം ഏറെ ശ്രദ്ധേയമായി.
ജോമോൾ എന്നും കുടുംബ മൂല്യങ്ങൾ പാലിക്കുന്ന നായിക എന്ന നിലയിലാണ് ആരാധകർ ഓർക്കുന്നത്. തുറന്ന മനസ്സോടെ അഭിനയിച്ചിട്ടും, സംസ്കാരത്തിന്റെയും ലാളിത്യത്തിന്റെയും പ്രതീകമായിട്ടാണ് അവർ നിലകൊണ്ടത്. മലയാള സിനിമയിലെ പല നായികമാരും ഗ്ലാമർ വഴിയാണ് മുന്നേറിയത്. എന്നാൽ ജോമോൾ തിരഞ്ഞെടുത്തത് കഥാപാത്രങ്ങളുടെ ആത്മാവിനെക്കൊണ്ട് നിറഞ്ഞ സിനിമകളായിരുന്നു. ഇന്ന് 43-ാം വയസ്സിലെത്തിയിട്ടും, ജോമോളിന്റെ മുഖത്തെ സൗന്ദര്യവും ചിരിയും മാറിയിട്ടില്ല.
മലയാള സിനിമയിലെ ഒരു കാലഘട്ടത്തിന്റെ പെൺകുട്ടികളുടെ പ്രതിനിധിയായിരുന്നു ജോമോൾ. കൂടുതൽ മികച്ച വേഷങ്ങളിലൂടെ ഇനിയും പ്രേക്ഷകരെ വിസ്മയിപ്പിക്കാൻ ജോമോൾക്ക് കഴിയട്ടെ എന്നാശംസിക്കുന്നു. ഒരിക്കൽ കൂടി ഹൃദയം നിറഞ്ഞ ജന്മദിനാശംസകൾ.