ബോളിവുഡ് താരം നാനാ പടേക്കറുടെ നിര്യാണത്തിൽ അനുശോചനം രേഖപ്പെടുത്തി സംവിധായകൻ വിശ്വൻ വിശ്വനാഥൻ പങ്കുവെച്ച കുറിപ്പ് നൊമ്പരമാകുന്നു. നാനാ പടേക്കർ, വിനായകൻ, ഐ.എം വിജയൻ എന്നിവരെ പ്രധാന കഥാപാത്രങ്ങളാക്കി ഒരു പാലക്കാടൻ ഫോക്ക് ഹൊറർ ചിത്രം ഒരുക്കാനുള്ള തയാറെടുപ്പിലായിരുന്നു താനെന്നും, ചിത്രവുമായി ബന്ധപ്പെട്ട് നാനാ പടേക്കറുമായി നേരിട്ട് സംസാരിച്ചിരുന്നുവെന്നും വിശ്വൻ ഓർത്തെടുക്കുന്നു.
ഗോവയിലെ ഡോണ പൗളയിലുള്ള വസതിയിൽ വെച്ച് ഹൃദയാഘാതത്തെ തുടർന്ന് ഇന്ന് പുലർച്ചെ 5:20ഓടെയായിരുന്നു നാനാ പടേക്കറുടെ വിയോഗം. വീട്ടിനുള്ളിൽ അബോധാവസ്ഥയിൽ കണ്ടെത്തിയ അദ്ദേഹത്തെ ഉടൻ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഈ ദുരന്ത വാർത്ത പ്രൊഡക്ഷൻ കൺട്രോളർ ഷാജി ഒലവക്കോട് വിളിച്ചാണ് തന്നെ അറിയിച്ചതെന്ന് വിശ്വൻ വ്യക്തമാക്കി.
ഐ.എം വിജയനോടാണ് ആദ്യം കഥ പറഞ്ഞതെന്നും അദ്ദേഹത്തിന് അത് ഏറെ ഇഷ്ടപ്പെട്ടുവെന്നും വിശ്വൻ പറയുന്നു. തുടർന്ന് ചിത്രത്തിലെ ഒരു നിർണായക വേഷത്തിനായി തന്റെ എക്കാലത്തെയും പ്രിയ നടനായ നാനാ പടേക്കറെ ബന്ധപ്പെടുകയും സിനോപ്സിസും കഥാപാത്ര വിവരങ്ങളും അയച്ചുകൊടുക്കുകയും ചെയ്തു. തൊട്ടുപിന്നാലെ നാനാ പടേക്കർ തിരിച്ച് വിളിക്കുകയും കഥാപാത്രത്തെക്കുറിച്ച് ആവേശത്തോടെയും കൗതുകത്തോടെയും നിരവധി കാര്യങ്ങൾ ചോദിച്ചറിയുകയും ചെയ്തു. സംഭാഷണത്തിനിടയിൽ തന്റെ വയസ്സ് ചോദിച്ചറിഞ്ഞ അദ്ദേഹം, തനിക്ക് 75 വയസ്സായെന്നും വിശ്വനോട് “യു ആർ ടൂ യങ്ങ്” എന്ന് പറഞ്ഞതായും അദ്ദേഹം ഓർക്കുന്നു. ഈ ഫോൺ സംഭാഷണത്തിന് ശേഷം ഏറെ ആത്മനിർവൃതിയിലായിരുന്നു താനെന്നും തന്റെ വലിയൊരു സ്വപ്നമായിരുന്നു അതെന്നും വിശ്വൻ കുറിച്ചു.
“ഇന്ന് രാവിലെ പ്രൊഡക്ഷൻ കൺട്രോളർ ഷാജി ഒലവക്കോട് വിളിച്ചാണ് ആ ദുരന്ത വാർത്ത പറഞ്ഞത്. ഞാൻ ഞെട്ടിത്തകർന്നു. വിട നാനാജി. നമ്മൾ സ്വർഗ്ഗത്തിലോ നരകത്തിലോ വെച്ച് ഒരു സിനിമ ചെയ്യും, ഉറപ്പ്,” വിശ്വൻ വിശ്വനാഥൻ വേദനയോടെ കുറിച്ചു. ‘അപ്പവും വീഞ്ഞും’, ‘ഡോക്ടർ പേഷ്യന്റ്’, ‘ഔട്ട് ഓഫ് സിലബസ്’ തുടങ്ങിയ ചിത്രങ്ങളുടെ സംവിധായകനാണ് വിശ്വൻ വിശ്വനാഥൻ.
വിശ്വൻ വിശ്വനാഥന്റെ വാക്കുകൾ:
‘‘നാനാ പടേക്കർ, വിനായകൻ , ഐ.എം വിജയൻ എന്നീ മൂന്ന് പ്രതിഭകളെ വെച്ച് ഒരു പാലക്കാടൻ ഫോക്ക് ഹൊറർ സിനിമയുടെ പണിപ്പുരയിലായിരുന്നു ഞാൻ. വിജയേട്ടനോടാണ് ആദ്യം കഥ പറഞ്ഞത്. അദ്ദേഹത്തിന് കഥ ഭയങ്കരമായി ഇഷ്ടപ്പെട്ടു. വിനായകനെ കാണാൻ പറ്റിയിട്ടില്ല. പിന്നെ അതിലെ ഒരു പ്രധാന കഥാപാത്രം ചെയ്യാൻ എന്റെ എക്കാലത്തേയും പ്രിയനടൻ നാനാ പടേക്കറെ ഞാൻ നേരിട്ട് ബന്ധപ്പെട്ടു .സിനോപ്സിസും മറ്റു കഥാപാത്രങ്ങളുടെ വിവരങ്ങളും അയച്ചുകൊടുത്തു. അപ്പോഴുണ്ട് അദ്ദേഹം എന്നെ തിരിച്ച് വിളിക്കുന്നു. ആദ്യമായി ഫോണിലൂടെ ആ ശബ്ദം എന്റെ ചെവിയിൽ മുഴങ്ങിയത് ഞാൻ മറക്കില്ല. സംസാരത്തിനിടയിൽ കഥാപാത്രത്തെ കുറിച്ച് വീണ്ടും വീണ്ടും ചോദിച്ചു. ആ കൗതുകം എന്നെ അദ്ഭുതപ്പെടുത്തി.
കൂട്ടത്തിൽ എത്ര വയസ്സായി എനിക്കെന്ന് ചോദിച്ചു. ഞാൻ പറഞ്ഞു 52. എനിക്ക് 75 വയസ്സായി യു ആർ ടൂ യങ്ങ്, അദ്ദേഹം പറഞ്ഞു. സംഭാഷണം കഴിഞ്ഞ ശേഷം കുറേ നേരം ഞാൻ ഹൈ ആയി. അപ്പോൾ തന്നെ ആരോടൊക്കയോ നാനാ പടേക്കർ എന്നെ വിളിച്ച് സംസാരിച്ച കാര്യം പറഞ്ഞ് ആത്മനിർവൃതി കൊണ്ടു. ഒരു വലിയ സ്വപ്നം. കുട്ടിക്കാലം മുതലെ എന്റെ പ്രിയപ്പെട്ട നടന്മാരിൽ ഒരാൾ എന്റെ സിനിമയിൽ അഭിനയിക്കുന്നത് ഞാൻ സ്വപ്നം കണ്ടു.
ഇന്ന് രാവിലെ പ്രൊഡക്ഷൻ കൺട്രോളർ ഷാജി ഒലവക്കോട് വിളിച്ചിട്ട് ആ ദുരന്ത വാർത്ത പറഞ്ഞപ്പോൾ ഞാൻ ഞെട്ടി തകർന്നു. വിട നാനാജി. നമ്മൾ സ്വർഗ്ഗത്തിലോ നരകത്തിലോ വച്ച് ഒരു സിനിമ ചെയ്യും. ഉറപ്പ്’’.
ഗോവയിലെ ഡോണ പൗളയിലുള്ള വസതിയിൽ വച്ച് ഹൃദയാഘാതത്തെ തുടർന്നായിരുന്നു നാനാ പടേക്കറുടെ അന്ത്യം. ഇന്നു പുലർച്ചെ വീട്ടിനുള്ളിൽ അബോധാവസ്ഥയിൽ കണ്ടെത്തിയ അദ്ദേഹത്തെ ഉടനടി ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. പുലർച്ചെ 5.20 ഓടെയാണ് അന്ത്യം സംഭവിച്ചതെന്ന് ഡോക്ടർമാർ സ്ഥിരീകരിച്ചു.