മമ്മൂട്ടി എടുത്തു കൊടുത്ത ചിത്രം പങ്കുവെച്ച് കോ ഡിസൈനർ അഭിജിത്ത് സി. ഫോട്ടോയ്ക്ക് ലൈറ്റ് സെറ്റ് ചെയ്തത് മമ്മൂട്ടിയുടെ പേഴ്സണൽ സെക്രട്ടറിയും നിർമാതാവുമായ ജോർജ് ആണെന്നും അഭിജിത്ത് പറഞ്ഞു. ഇളം മഞ്ഞ ഷർട്ടും ജീൻസും ധരിച്ച് വരാന്തയിലെ കസേരയിൽ ഇരിക്കുന്ന അഭിജിത്തിന്റെ ചിത്രമാണ് മമ്മൂട്ടി പകർത്തിയത്. മമ്മൂട്ടിയുടെ തിരിച്ചുവരവ് ഉടനുണ്ടാകുമെന്ന സൂചനയും അഭിജിത്ത് ചിത്രത്തിനൊപ്പം പങ്കുവെച്ചു.
‘എൻ്റെ കണ്ണിലെ നൂറു വാട്ട് തെളിച്ചം കണ്ടാൽ തോന്നും മമ്മൂക്കയെ കണ്ടപ്പോഴാണെന്ന്..? അതെ…ഫോട്ടം പിടിക്കണത് മമ്മുക്കയാണ്. ലൈറ്റ് അറേഞ്ച്മെന്റ്റ് ബൈ ജോർജ്ജേട്ടൻ. മനസ്സിലായി … നിങ്ങള് ചോദിക്കാൻ പോണത് തിരിച്ചുള്ള ആ ഒരു എൻട്രി എപ്പോ കാണാം എന്നല്ലേ…? 10…….8…’. അഭിജിത്ത് കുറിച്ചു.
ചെന്നൈയിൽ നിന്ന് എടുത്ത ചിത്രമാണ് അഭിജിത്ത് പങ്കുവച്ചത്. മമ്മൂട്ടിയുടെ ഫോട്ടോഗ്രഫി മികവിനെ പ്രശംസിച്ചും അദ്ദേഹത്തിന്റെ തിരിച്ചുവരവിലുള്ള പ്രതീക്ഷ അറിയിച്ചും നിരവധിപേരാണ് കമന്റ് ചെയ്യുന്നത്. ‘അടുത്ത അധ്യായത്തിന് വേണ്ടി അദ്ദേഹം ഒരുങ്ങി കഴിഞ്ഞു, കൂടെ ഞങ്ങളും,’ എന്നായിരുന്നു ഒരു ആരാധകൻ്റെ കമൻ്റ്. ആരോഗ്യസംബന്ധമായ പ്രശ്നങ്ങൾ മൂലം സിനിമയിൽ നിന്ന് ചെറിയൊരു ഇടവേള എടുത്ത മമ്മൂട്ടി വീണ്ടും സിനിമയിൽ സജീവമായിക്കൊണ്ടിരിക്കുകയാണ്. മോഹൻലാലും മമ്മൂട്ടി ഒന്നിച്ചെത്തുന്ന മഹേഷ് നാരായണൻ ചിത്രം ‘പാട്രിയറ്റി’ന്റെ ചിത്രീകരണത്തിലാകും അദ്ദേഹം ആദ്യമെത്തുക എന്നാണ് സൂചന.