ബോളിവുഡ് സിനിമാ മേഖലയിലെ മയക്കുമരുന്ന് ശൃംഖലകൾ കേന്ദ്രീകരിച്ച് കാശിമിര പോലീസ് നടത്തിയ മിന്നൽ പരിശോധനയിൽ പ്രമുഖ നടനും മോഡലുമായ റോഹുല്ല മെഹ്ദി ധാർ (റോഹു), സഹായി കാസിഫ് എന്നിവർ അറസ്റ്റിലായി. മലാഡിലെ ഒരു ഷൂട്ടിങ് സ്റ്റുഡിയോയ്ക്ക് പുറത്തുനിന്നാണ് നടനെ പോലീസ് കസ്റ്റഡിയിലെടുത്തത്. പ്രതികളിൽ നിന്ന് 5.6 ലക്ഷം രൂപ വിപണി വിലമതിക്കുന്ന 28 ഗ്രാം മെഫെഡ്രോൺ (എം.ഡി) പോലീസ് പിടിച്ചെടുത്തു. സംഭവത്തിൽ എൻ.ഡി.പി.എസ് (NDPS) നിയമപ്രകാരം കേസെടുത്ത കാശിമിര പോലീസ്, നടനെ കോടതിയിൽ ഹാജരാക്കി അഞ്ച് ദിവസത്തേക്ക് കസ്റ്റഡിയിൽ വാങ്ങി.
സ്നാപ്ചാറ്റ്, വാട്സാപ്പ് തുടങ്ങിയ സോഷ്യൽ മീഡിയ പ്ലാറ്റ്ഫോമുകൾ വഴി വൻതോതിൽ ലഹരിമരുന്ന് വിൽപ്പന നടക്കുന്നുണ്ടെന്ന രഹസ്യവിവരത്തിന്റെ അടിസ്ഥാനത്തിലായിരുന്നു പോലീസ് നീക്കം. ക്രൈംബ്രാഞ്ച് ഉദ്യോഗസ്ഥൻ സഞ്ജയ് ലോഖണ്ഡേയുടെ നേതൃത്വത്തിൽ വ്യാജ ഉപഭോക്താവിനെ ഉപയോഗിച്ച് പോലീസ് പ്രതികൾക്കായി കെണിയൊരുക്കുകയായിരുന്നു. ലഹരിമരുന്ന് ആവശ്യപ്പെട്ട് പോലീസുകാർ നടത്തിയ ആശയവിനിമയത്തിനൊടുവിൽ, ദഹിസർ ചെക്ക് നാകയിലെ താക്കൂർ മാളിന് സമീപം 28 ഗ്രാം എം.ഡിയുമായി എത്തിയ സഹായി കാസിഫിനെ പോലീസ് തടഞ്ഞുവെച്ചു. ഇയാളെ വിശദമായി ചോദ്യം ചെയ്തപ്പോഴാണ് നടൻ റോഹുല്ല മെഹ്ദിയുടെ പങ്ക് പുറത്തുവരുന്നത്. തുടർന്ന് പോലീസ് സംഘം മലാഡിലെ ഷൂട്ടിങ് സെറ്റിലെത്തി നടനെ അറസ്റ്റ് ചെയ്യുകയായിരുന്നു.
ജമ്മു കശ്മീരിലെ ബദ്ഗാം സ്വദേശിയായ റോഹുല്ല മെഹ്ദി നിലവിൽ മുംബൈ ഗോരെഗാവിലാണ് താമസം. 2025-ൽ പുറത്തിറങ്ങിയ ഷാഹിദ് കപൂർ ചിത്രം ‘ദേവ’ ഉൾപ്പെടെ നിരവധി പ്രമുഖ സിനിമകളിലും പ്രശസ്തമായ ചില വെബ് സീരീസുകളിലും ഇയാൾ ശ്രദ്ധേയമായ വേഷങ്ങൾ കൈകാര്യം ചെയ്തിട്ടുണ്ട്.
സിനിമാ രംഗത്തെ പ്രമുഖർക്കും സഹപ്രവർത്തകർക്കും ഇയാൾ മയക്കുമരുന്ന് എത്തിച്ചുനൽകിയിട്ടുണ്ടോ എന്ന കാര്യമാണ് പോലീസ് നിലവിൽ അന്വേഷിക്കുന്നത്. നടന്റെ ഫോൺ രേഖകളും ഉപഭോക്തൃ പട്ടികയും വിതരണ ശൃംഖലയും കേന്ദ്രീകരിച്ച് കാശിമിര പോലീസ് ചോദ്യം ചെയ്യൽ തുടരുകയാണ്. സിനിമാ വ്യവസായവും ലഹരി മാഫിയയും തമ്മിലുള്ള ആഴത്തിലുള്ള ബന്ധത്തിലേക്ക് വെളിച്ചം വീശുന്നതാണ് ഈ അറസ്റ്റ് എന്നും വരും ദിവസങ്ങളിൽ കൂടുതൽ പ്രമുഖരുടെ അറസ്റ്റ് ഉണ്ടായേക്കുമെന്നും പോലീസ് കേന്ദ്രങ്ങൾ സൂചന നൽകുന്നു.