നിർമ്മാതാക്കളുടെ സംഘടനയുടെ പ്രസിഡന്റ് സ്ഥാനത്തേക്ക് നാമനിർദേശ പത്രിക സമർപ്പിക്കാൻ പർദ്ദ ധരിച്ചെത്തി നടിയും നിർമ്മാതാവുമായ സാന്ദ്ര തോമസ്. ചിലരുടെ തുറിച്ചു നോക്കലുകൾ ഒഴിവാക്കാനാണ് പർദ ധരിച്ചതെന്ന് സാന്ദ്ര തോമസ് മാധ്യമങ്ങളോട് പറഞ്ഞു. സംഘടന കയ്യടക്കിയ കുത്തകകളുടെ മാറ്റത്തിനായാണ് മത്സരമെന്നും ഇതിനായി നാമനിർദേശ പത്രിക സമർപ്പിച്ചുവെന്നും താരം കൂട്ടിച്ചേർത്തു. ഓഗസ്റ്റ് 14നാണ് സംഘടനാ തിരഞ്ഞെടുപ്പ് നടക്കുന്നത്.
സംഘടനയുടെ നിലവിലെ നേതാക്കൾ സ്വാർത്ഥ താല്പര്യങ്ങൾക്ക് വേണ്ടി മാത്രമാണ് പ്രവർത്തിക്കുന്നതെന്നും ഭൂരിഭാഗം അംഗങ്ങളുടെയും പൊതുവികാരം അവരുടെ പ്രവർത്തനങ്ങൾക്കെതിരെയാണെന്നും സാന്ദ്ര പറഞ്ഞു. “താരങ്ങളുടെ മുന്നിൽ ഓച്ഛാനിച്ചു നിൽക്കേണ്ടവരല്ല നിർമാതാക്കൾ. സിനിമാ രംഗത്തെ ഏറ്റവും ശക്തമായ സംഘടനയാണ് ഇത്. പ്രസിഡന്റായി തിരഞ്ഞെടുക്കപ്പെട്ടാൽ നിർമാതാക്കളുടെയും മലയാള സിനിമയുടെയും ഗുണത്തിനായി പ്രവർത്തിക്കും,” സാന്ദ്ര പറഞ്ഞു.
ഇതിനിടെ, കഴിഞ്ഞ മാസങ്ങളിൽ സംഘടന പുറത്തുവിട്ട സിനിമാ ലാഭനഷ്ട കണക്കുകൾ വിമർശിക്കപ്പെട്ടതായും സാന്ദ്ര ഓർമ്മിപ്പിച്ചു. “ആ കണക്കുകൾ പുറത്തുവിട്ടത് വലിയ പരാജയമായിരുന്നു. അതിലൂടെ ആര്ക്കും ഗുണം ലഭിച്ചില്ല. അസോസിയേഷന്റെ പരാജയമാകുകയാണ് അത്. അത് അവർക്ക് നിർത്തേണ്ടി വന്നു,” സാന്ദ്ര വ്യക്തമാക്കി.
ഇലക്ഷൻ സമയത്തല്ലാതെ സംഘടനയുടെ ഭാഗമായുള്ള നിർമാതാക്കളെ പൊതുവേ അവഗണിക്കുന്ന രീതിയും കനത്ത വിമർശനമായാണ് സാന്ദ്ര ഉന്നയിച്ചത്. “കഴിഞ്ഞ കുറച്ച് വർഷങ്ങളായി ഇലക്ഷൻ സമയത്ത് മാത്രം എല്ലാവരെയും വിളിച്ചു കൂട്ടുന്ന രീതി തുടരുകയാണ്. അവരിൽ പലർക്കും ഇതിലൂടെ ഗുണമൊന്നുമില്ല. ഞാൻ പ്രസിഡന്റായാൽ ഗുണകരമായ മാറ്റങ്ങൾ ഉറപ്പാക്കും. ഒരു സിനിമ കൂടി ചെയ്ത് മരിക്കണം എന്ന ആഗ്രഹമുള്ള നിർമാതാക്കൾ ഉണ്ടെന്നു ഞാൻ അറിയുന്നു. സംഘടന ആഗ്രഹിച്ചാൽ അതിന് പൂർണ്ണമായി സഹായിക്കാവുന്നതാണ്. എന്നാൽ സംഘടന അതൊന്നും ചെയ്യുന്നില്ല,” സാന്ദ്ര കുറ്റപ്പെടുത്തി.
“സ്വന്തം നേട്ടം മാത്രമാണ് ഇപ്പോഴത്തെ നേതാക്കൾ കാണുന്നത്. നിർമാതാക്കളുടെയും ഇൻഡസ്ട്രിയുടെയും ഭാവിക്കായുള്ള പ്രതിബദ്ധത ഇവരിൽ നിന്നും കാണുന്നില്ല. അതിനാലാണ് ഞാൻ മത്സരിക്കുന്നത്. വിജയിച്ചാൽ ഒറ്റനോട്ടത്തിൽ ഉന്നതമായ സേവനമാണ് നൽകുന്നത്,” സാന്ദ്ര തോമസ് വ്യക്തമാക്കി.