വിവാഹശേഷം അഭിനയത്തിൽ സജീവമല്ലാത്തതിന്റെ കാരണം ഭർത്താവ് ദിലീപാണെന്ന പരാമർശങ്ങളിൽ വ്യക്തത വരുത്തി നടി കാവ്യാ മാധവൻ. തന്നെ അഭിനയിക്കാൻ വിടാതെ വീട്ടിലിരുത്തിയത് ദിലീപല്ലെന്ന് കാവ്യ പറഞ്ഞു. കൂടാതെ തനിക്ക് കുടുംബജീവിതം പൂർണമായും അനുഭവിച്ചറിയുക എന്ന വ്യക്തിപരമായ തീരുമാനമുണ്ടായിരുന്നുവെന്നും കാവ്യാ മാധവൻ പറഞ്ഞു. ദിലീപ് പങ്കെടുക്കേണ്ടിയിരുന്ന ഒരു ചടങ്ങിൽ ദിലീപിന് പകരമായി എത്തിയപ്പോഴായിരുന്നു കാവ്യയുടെ പ്രതികരണം. വിവാഹശേഷം ദിലീപ്, കാവ്യയെ അഭിനയിക്കാൻ വിടുന്നില്ല എന്ന തരത്തിൽ സോഷ്യൽ മീഡിയയിൽ പ്രചരിച്ചിരുന്ന കമന്റുകൾക്ക് മറുപടിയായാണ് കാവ്യ ഇത്രയും കാലത്തെ മൗനം ഭേദിച്ചത്.
“ഒരിക്കലും ദിലീപേട്ടൻ അല്ല എന്നെ വീട്ടിൽ നിർത്തിയിട്ടുളളത്. അത് എൻ്റെ അഭിപ്രായം തന്നെ ആയിരുന്നു. എനിക്കു മോളെ ഒക്കെ നോക്കി ആ ഒരു കാലഘട്ടം നേരിട്ട് എക്സ്പീരിയൻസ് ചെയ്യണം എന്നുണ്ടായിരുന്നു. അതിനുവേണ്ടിയിട്ടാണ് ഞാൻ ഒരു ബ്രേക്ക് എടുത്തത്.” കാവ്യ മാധവൻ പറഞ്ഞു.
സോഷ്യൽ മീഡിയയിലും കാവ്യ മാധവന്റെ ഫാൻസ് പേജുകളിലും ഈ വിഡിയോ വ്യാപകമായി പ്രചരിക്കുന്നുണ്ട്. കാവ്യയുടെ വാക്കുകൾ ഉൾക്കൊണ്ടുള്ള ഒരു കുറിപ്പും ഫാൻസ് പേജ് പങ്കുവെച്ചിട്ടുണ്ട്. “ഒന്നും അറിയാതെ കമന്റ് ബോക്സിൽ വന്ന് പലതും വിളിച്ച് പറയുന്നവരോട് ഒന്നേ പറയാനൊള്ളൂ, അത് അവളുടെ മാത്രം തീരുമാനമായിരുന്നു അതിനെ ബഹുമാനിക്കുക. എല്ലാവർക്കും അവരുടേതായ ഇഷ്ടങ്ങളും കാഴ്ചപ്പാടും ഉണ്ടാവും. ഒരു തിരിച്ചു വരവ് ഞങ്ങളും പ്രതീക്ഷിക്കുന്നുണ്ട്.’’ഫാൻസ് പേജ് കുറിച്ചു.
2016 ൽ പുറത്തിറങ്ങിയ അടൂർ ഗോപാലകൃഷ്ണന്റെ ‘പിന്നെയും’ എന്ന ചിത്രത്തിലാണ് കാവ്യ അവസാനമായി അഭിനയിച്ചത്. ദിലീപിനൊപ്പമുള്ള ചിത്രം വിവാഹത്തിന് തൊട്ടു മുന്നേ ഇറങ്ങിയ ചിത്രമായിരുന്നു. 2016 നവംബർ 25-നാണ് കാവ്യയും ദിലീപും വിവാഹിതരാകുന്നത്. വിവാഹത്തിന് ശേഷം കാവ്യ സിനിമയിൽ നിന്ന് പൂർണമായും വിട്ടുനിന്നു. കാവ്യ ഉടൻ തന്നെ സിനിമയിലേക്ക് തിരിച്ചുവരുമോ എന്നാണ് ആരാധകർ ഇപ്പോൾ കമന്റുകളിൽ ചോദിക്കുന്നത്.