സിനിമയെ സിനിമയായി കാണണമെന്ന് തുറന്നു പറഞ്ഞ് നടൻ ശ്രീനാഥ് ഭാസി. സിനിമ കണ്ടതിനു ശേഷം പ്രേക്ഷകര് ചെയ്യുന്ന കാര്യങ്ങള്ക്ക് തനിക്കോ സംവിധായകര്ക്കോ ഉത്തരവാദിത്തമില്ലെന്നും, ആളുകളുടെ മനസ്സിലുള്ള കാര്യങ്ങളുടെ പ്രതിഫലനമാണ് സിനിമയെന്നും ശ്രീനാഥ് പറഞ്ഞു. തന്റെ പുതിയ ചിത്രം ‘പൊങ്കാല’ യുടെ പ്രൊമോഷന്റെ ഭാഗമായി സംഘടിപ്പിച്ച വാർത്താ സമ്മേളനത്തിൽ സംസാരിക്കുകയായിരുന്നു നടൻ. മലയാള സിനിമാ രംഗത്ത് യുവാക്കളുടെ പിന്തുണയുള്ള താരമായതു കൊണ്ട് വയലന്സടക്കമുള്ള രംഗങ്ങള് ചെയ്യുമ്പോള് ഉത്തരവാദിത്വമില്ലേ എന്ന മാധ്യമ പ്രവര്ത്തകന്റെ ചോദ്യത്തിനായിരുന്നു താരത്തിന്റെ പ്രതികരണം.
“സിനിമയാടാ, ആളുകള്ക്ക് സിനിമ കണ്ടാല് പോരെ. അതില് കൂടുതലുള്ള വിവരം മലയാളികള്ക്കുണ്ടെന്നാണ് ഞാന് കരുതുന്നത്. ഈ സിനിമ കണ്ടിട്ട് ആള്ക്കാര് വല്ലതും ചെയ്യുമെന്ന് എനിക്ക് തോന്നുന്നില്ല. സിനിമ കണ്ടല്ല ആള്ക്കാര് എന്തെങ്കിലും ചെയ്യുന്നത്. ആര്ട്ട് റിഫ്ളെക്ട്സ് ലൈഫ്, ലൈഫ് റിഫ്ളെക്സ് ആര്ട്ട്. ആളുകളുടെ മനസ്സിലുള്ള കാര്യങ്ങളുടെ പ്രതിഫലനമാണ് സിനിമ. ഇതെല്ലാം കണ്ടിട്ട് എന്തെങ്കിലും ചെയ്യുന്നുണ്ടെങ്കില് അവര്ക്ക് വട്ടാണ്.” ശ്രീനാഥ് ഭാസി പറഞ്ഞു.
“സംവിധായകന് ഇഷ്ടമുള്ള പടമേ അവര് ചെയ്യുള്ളൂ. അല്ലെങ്കില് അവര്ക്ക് വേറെയെന്തെങ്കിലും ജോലി ചെയ്താല് മതിയല്ലോ. ആവിഷ്കാര സ്വാതന്ത്ര്യം എല്ലാ കലകള്ക്കും വേണം. അയ്യോ ഞാനിത് ചെയ്തിട്ട് ആളുകള് കണ്ട് എന്തെങ്കിലും ചെയ്യുമോ എന്ന് പേടിച്ചിരുന്നാല് ഒരു കാര്യവും ചെയ്യാന് പറ്റില്ല. സിനിമ അത്തരത്തിലൊരു മീഡിയമാണ്. ആളുകളെ തിരുത്തേണ്ടതും പഠിപ്പിക്കേണ്ടതും എന്റെ ഉത്തരവാദിത്വമല്ല. നമ്മളെല്ലാവരും പൊളിറ്റിക്കലാണ്. അതിന്റെ അടിസ്ഥാനത്തിലാണ് സിനിമ ചെയ്യുന്നത്. അതിന്റപ്പുറത്തേക്കുള്ള ഉത്തരവാദിത്വങ്ങളൊന്നും തലയിൽ വെച്ച് നടക്കരുത്.” ശ്രീനാഥ് ഭാസി കൂട്ടിച്ചേർത്തു.
ശ്രീനാഥ് ഭാസി നായകനായെത്തുന്ന പുതിയ ചിത്രമാണ് പൊങ്കാല. ഞായറാഴ്ച തിയറ്ററുകളിലെത്തുന്ന ചിത്രത്തിന്റെ പ്രൊമോഷൻ തിരക്കുകളിലാണിപ്പോൾ താരങ്ങൾ. എ ബി ബിനിലാണ് പൊങ്കാല സംവിധാനം ചെയ്യുന്നത്. ബാബുരാജ്, അലന്സിയര്, സുധീര് കരമന തുടങ്ങിയവരും ചിത്രത്തില് പ്രധാനവേഷത്തിലെത്തുന്നു. യാമി സോന ആണ് ചിത്രത്തിലെ നായിക.