നിതേഷ് തിവാരിയുടെ സംവിധാനത്തിൽ ദീപാവലി റിലീസായി തിയറ്ററുകളിലെത്തിയ ബ്രഹ്മാണ്ഡ ചിത്രം ‘രാമായണം: റൈസ് ഓഫ് എ ലെജൻഡ്’ ആഗോളതലത്തിൽ 500 കോടി ക്ലബ്ബ് പിന്നിട്ട് വൻ വിജയം നേടുന്നതിനിടയിൽ, ചിത്രത്തെയും അണിയറപ്രവർത്തകരെയും പ്രശംസിച്ച് പ്രമുഖ സംവിധായകൻ രാം ഗോപാൽ വർമ്മ രംഗത്ത്. പരമ്പരാഗത ഭക്തി സിനിമകളുടെ രീതികളെ പൊളിച്ചെഴുതിയ ഈ ചിത്രം കേവലമൊരു സിനിമയല്ല, മറിച്ച് തികച്ചും തീവ്രമായ ഒരു ‘ഡിവോഷണൽ ഫോഴ്‌സ്’ ആണെന്ന് അദ്ദേഹം വിശേഷിപ്പിച്ചു. ചിത്രത്തിന് നേരെ ഉയരുന്ന നെഗറ്റീവ് വിമർശനങ്ങളെ ശക്തമായി തള്ളിക്കളഞ്ഞ അദ്ദേഹം, വിമർശകരെ ‘വഴിയരികിൽ കുരയ്ക്കുന്ന നായ്ക്കൾ’ എന്നാണ് വിശേഷിപ്പിച്ചത്.
രൺബീർ കപൂർ, യാഷ്, അനുപം ഖേർ എന്നിവരുടെ പ്രകടനങ്ങളും ചിത്രത്തിന്റെ ഗൗരവമേറിയ ആഖ്യാനശൈലിയും ഇന്ത്യൻ സിനിമയുടെ നിർമ്മാണ നിലവാരത്തെ പുതിയ ഉയരങ്ങളിലെത്തിച്ചിരിക്കുകയാണെന്ന് അദ്ദേഹം തന്റെ കുറിപ്പിൽ വ്യക്തമാക്കി. ആധുനിക വി.എഫ്.എക്സ് സാങ്കേതികവിദ്യയും വലിയ ബജറ്റും ഒത്തുചേർന്ന ചിത്രം ബോക്സ് ഓഫീസിൽ പുതിയ ചരിത്രങ്ങൾ തിരുത്തിക്കുറിച്ചാണ് മുന്നേറുന്നത്.
രാം ഗോപാൽ വർമ്മ പങ്കുവച്ച കുറിപ്പ് ഇങ്ങനെ:
“രാമായണ ഒരു ഭക്തിസിനിമയല്ല. അതൊരു ഭക്തിയുടെ ശക്തിയാണ്. ഇതിലെ നായകൻ കഥയ്ക്ക് മുകളിൽ ഒഴുകിനടക്കുന്ന നീലനിറമുള്ള ദൈവമല്ല. ലോകത്തിന്റെ അവസാനം കണ്ടുകഴിഞ്ഞിട്ടും, പൂർണ്ണമനസ്സോടെ അതിലേക്ക് നടന്നുചെല്ലാൻ തുനിഞ്ഞിറങ്ങിയ ഒരു മനുഷ്യനാണ് അവൻ.
ഇതിൽ ഉയർന്നുനിൽക്കുന്നത് ഒരു സാമ്രാജ്യമല്ല, മറിച്ച് ദുർബലതകളെ വെല്ലുവിളിക്കുന്ന ഒരു മനസ്സിന്റെ നിശ്ചയദാർഢ്യമാണ്. പഴയ നിയമങ്ങളെല്ലാം കത്തിച്ചുകളഞ്ഞ്, ഇപ്പോൾ അധികാരത്തിന്റെയും ശക്തിയുടെയും യുക്തിയാൽ മാത്രം മുന്നേറുന്ന ഒരാളുടെ ഭാരം ഓരോ ഫ്രെയിമിലും അനുഭവപ്പെടാം. ഇതിലെ അക്രമങ്ങൾ കേവലം കാഴ്ചസുഖത്തിനായുള്ള വിനോദമല്ല; അത് പ്രവൃത്തികളുടെ അനന്തരഫലങ്ങളുടെ വ്യക്തതയാണ്.
മറ്റ് എല്ലാ സിനിമാവിഷ്കാരങ്ങളിൽ നിന്നും ഇതിനെ വേർതിരിച്ചു നിർത്തുന്നത്, ഭൂരിഭാഗം സിനിമകളും നീങ്ങാൻ മടിച്ചുനിൽക്കുന്ന ഒരു കാലത്ത്, ഈ ചിത്രം യാതൊരു മടിയുമില്ലാതെ മുന്നോട്ടു നീങ്ങുന്നു എന്നതാണ്. അത് സ്വയം ന്യായീകരണങ്ങൾ നൽകുന്നില്ല. അതുകൊണ്ടാണ് മുൻപുള്ള എന്തിനേക്കാളും ആഴത്തിൽ ഇത് നമ്മെ സ്പർശിക്കുന്നത്. ഈ സിനിമ കണ്ടു കഴിയുമ്പോൾ നിങ്ങൾ ഒരു കഥ കണ്ട അനുഭവം മാത്രമല്ല കൊണ്ടുപോകുന്നത്, മറിച്ച് ഒരു അനുഭവം ജീവിച്ചുതീർത്ത ഉന്മാദത്തോടെയാണ് ഇറങ്ങിവരുന്നത്. സീതാപഹരണത്തിന് ശേഷമുള്ള രംഗത്തിൽ, ശൂന്യമായ ആശ്രമത്തിൽ രൺബീർ നിൽക്കുമ്പോൾ, സീത ഉണ്ടായിരുന്ന ആ സ്ഥലത്തേക്ക് മാത്രം അദ്ദേഹം നോക്കുന്ന രംഗം ക്യാമറ ദീർഘനേരം ഒപ്പിയെടുക്കുന്നുണ്ട്. അവിടെ ആ വിലാപം ഇതിനകം തന്നെ ഒരു കണക്കുകൂട്ടലായി മാറിക്കഴിഞ്ഞുവെന്ന് ആ നിമിഷം വ്യക്തമാകുന്നു.
യഷ് ഒരു എതിരാളിയായിട്ടല്ല അഭിനയിച്ചിരിക്കുന്നത്; താൻ നശിപ്പിക്കാൻ തീരുമാനിച്ചതിനെ മുൻകൂട്ടിത്തന്നെ അംഗീകരിച്ച ഒരു മനസ്സിനെയാണ് അദ്ദേഹം അവതരിപ്പിച്ചിരിക്കുന്നത്. അവസാന രാത്രിക്കു മുമ്പുള്ള ആ നീണ്ട ഏറ്റുമുട്ടലിൽ, ഇരുപടകളും ഇല്ലാതെ തുറസ്സായ നിലത്തുനിന്നു കൊണ്ട് റാമോട് സംസാരിക്കുമ്പോൾ അദ്ദേഹം ശബ്ദം ഉയർത്തുന്നതേയില്ല. അത്രയും ശാന്തനായി അദ്ദേഹം അതിന്റെ വില എന്താണെന്ന് വ്യക്തമാക്കുന്നു. ആ മുഖമൊന്നു വാടുന്നില്ല, ആ ശരീരമൊന്നു ഇളകുന്നില്ല.
പുഷ്പകവിമാനത്തെ തടയുന്ന ജടായുവായുള്ള അനുപം ഖേറിന്റെ അഭിനയം കേവലം ഒരു കൂറിന്റെ മാത്രം പ്രകടനമല്ല. പകുതി ഒടിഞ്ഞ ചിറകുകളും ചോരയൊലിക്കുന്ന ശരീരവുമായി അദ്ദേഹം വീണ്ടും വീണ്ടും പോരാടുന്നു, കാരണം ശരീരം പറയുന്നത് കേൾക്കാൻ ആ മനസ്സ് തയ്യാറല്ലായിരുന്നു. താഴേക്ക് വീഴുമ്പോഴും ക്യാമറ ആ മുഖത്ത് തന്നെ നിലനിൽക്കുന്നു. അവിടെയൊരു കരച്ചിലില്ല; ചിറകുകളുടെ ചലനം നിലച്ച ശേഷവും ആ കണ്ണുകൾക്ക് പിന്നിൽ തുടരുന്ന അവസാനത്തെ വാദപ്രതിവാദങ്ങൾ മാത്രം. അതൊരു ആത്മബലിയല്ല. ഇനി ശേഷിക്കുന്ന ഒരേയൊരു നിയമം ‘സാധ്യമല്ലാതെ ആകുന്നത് വരെ മുന്നോട്ട് പോവുക’ എന്നത് മാത്രമാണെന്ന് മനസ്സിലാക്കിയ ഒരു മനുഷ്യനാണ് അത്.
മൊത്തത്തിൽ എനിക്ക് പറയാനുള്ളത്, ഈ മഹത്തായ ചിത്രം നിർമ്മിക്കാൻ ഒന്നിച്ച എല്ലാ പ്രതിഭകളോടുമാണ്, ഈ അത്ഭുതസൃഷ്ടി ഉണ്ടാക്കിയെടുക്കാൻ നിങ്ങളെല്ലാവരും എടുത്ത വലിയ അധ്വാനത്തിന് നേരെ വരുന്ന എല്ലാവിധ നിഷേധാത്മക വിമർശനങ്ങളെയും വഴിയരികിൽ കുരയ്ക്കുന്ന നായ്ക്കളെപ്പോലെ മാത്രം കരുതി തള്ളിക്കളയുക.” സംവിധായകൻ രാം ഗോപാൽ വർമ്മ കുറിച്ചു.
ദീപാവലി റിലീസായി ആഗോളതലത്തിൽ തിയേറ്ററുകളിലെത്തിയ ‘രാമായണം: റൈസ് ഓഫ് എ ലെജൻഡ്’ ബോക്സ് ഓഫീസിൽ പുതിയ ചരിത്രങ്ങൾ തിരുത്തിക്കുറിച്ചാണ് മുന്നേറുന്നത്. വെറും നാല് ദിവസങ്ങൾക്കുള്ളിൽ ലോകമെമ്പാടുമായി 500 കോടി ക്ലബ്ബിലേക്ക് ചിത്രം എത്തുമ്പോൾ, ബോക്സ് ഓഫീസ് കളക്ഷൻ കണക്കുകൾക്ക് അപ്പുറത്തേക്ക് ഇന്ത്യൻ സിനിമയുടെ നിർമ്മാണ നിലവാരത്തിലും ദൃശ്യാവിഷ്കാരത്തിലും ഇതൊരു പുതിയ വഴികാട്ടിയാവുകയാണ്. വലിയ ബജറ്റും അത്യാധുനിക വി.എഫ്.എക്സ് സാങ്കേതികവിദ്യകളും ഒത്തുചേർന്നപ്പോൾ കാവ്യാത്മകമായ ആഖ്യാനശൈലിയും ശക്തമായ കഥാപാത്ര സൃഷ്ടിയും സിനിമയ്ക്ക് കൂടുതൽ ആഴം നൽകി. വിമർശനങ്ങളെയും സംശയങ്ങളെയും കാറ്റിൽപ്പറത്തി തിയറ്ററുകളിൽ വലിയ തരംഗമായി മാറിയ ഈ ചിത്രം, കേവലമൊരു സിനിമാനുഭവം എന്നതിലുപരി പ്രേക്ഷകരെ അതിശയിപ്പിക്കുന്ന ഒരു ദൃശ്യവിരുന്നായി മാറിക്കഴിഞ്ഞിരിക്കുകയാണ്.