‘രാമായണ’ ചിത്രം ലോകത്തിനു മുന്നിൽ ഇന്ത്യയുടെ ചരിത്രവും സത്യവും വ്യക്തമാക്കുന്ന ആദ്യത്തെ ആഗോള സിനിമയായിരിക്കുമെന്ന് പ്രമുഖ നടി രാകുൽ പ്രീത് സിംഗ്. വാർത്താ ഏജൻസിയായ പി.ടി.ഐക്ക് നൽകിയ അഭിമുഖത്തിലാണ് താരം ഈ പ്രതീക്ഷ പങ്കുവെച്ചത്. ചിത്രത്തിൽ ശൂർപ്പണഖ എന്ന സങ്കീർണ്ണവും ബഹുമുഖ മാനങ്ങളുള്ളതുമായ കഥാപാത്രത്തെ അവതരിപ്പിക്കുന്നതിലെ സന്തോഷവും താരം വ്യക്തമാക്കി.
ഒരു പ്രത്യേക സംഭവത്തിന്റെ പേരിൽ മാത്രം ചിത്രീകരിക്കപ്പെട്ട ശൂർപ്പണഖ വളരെ തെറ്റിദ്ധരിക്കപ്പെട്ട കഥാപാത്രമാണെന്നും, രാമ-രാവണ യുദ്ധത്തിലേക്ക് നയിച്ച പ്രധാന കണ്ണി എന്ന നിലയിൽ ഈ കഥാപാത്രത്തിന് വലിയ പ്രാധാന്യമുണ്ടെന്നും രാകുൽ ചൂണ്ടിക്കാട്ടി. പ്രേക്ഷകരുടെ കാഴ്ചപ്പാടുകളെ വെല്ലുവിളിക്കുന്ന ഇത്തരത്തിലുള്ള വെല്ലുവിളി നിറഞ്ഞ വേഷങ്ങൾ ചെയ്യാനാണ് ഒരു അഭിനേത്രി എന്ന നിലയിൽ താൻ ആഗ്രഹിക്കുന്നതെന്നും, തുറന്ന മനസ്സോടെ ആളുകൾ ഈ കഥാപാത്രത്തെ സ്വീകരിക്കുമെന്ന് കരുതുന്നതായും താരം വ്യക്തമാക്കി.
“എന്നെ ആവേശത്തിലാക്കിയ കാര്യങ്ങൾ പലതാണ്. ഒന്നാമത്, ലോകത്തിന് മുന്നിൽ ഇന്ത്യയുടെ പ്രാതിനിധ്യമാണിത്. നമ്മുടെ ചരിത്രവും നമ്മുടെ സത്യവും ഈ ആഗോള സിനിമയിലൂടെ അവതരിപ്പിക്കപ്പെടുന്നു. രണ്ടാമതായി, ശൂർപ്പണഖ വളരെ തെറ്റിദ്ധരിക്കപ്പെട്ടതും നിരവധി മാനങ്ങളുള്ളതുമായ ഒരു കഥാപാത്രമാണ്. രാമായണ യുദ്ധത്തിന് കാരണക്കാരിതന്നെ അവളാണ്. അതിനാൽ, നിരവധി ഭാവങ്ങളുള്ള ഒരു കഥാപാത്രത്തെ അവതരിപ്പിക്കുന്നത് വളരെ രസകരമായിരുന്നു.” രാകുലിന്റെ വാക്കുകൾ.
രൺബീർ കപൂർ ശ്രീരാമനായും സായി പല്ലവി സീതയായും വേഷമിടുന്ന വാൽമീകി രാമായണത്തെ ആസ്പദമാക്കിയുള്ള ചിത്രം രണ്ട് ഭാഗങ്ങളായാണ് തിയേറ്ററുകളിൽ എത്തുന്നത്. യഷും നമിത് മൽഹോത്രയും ചേർന്ന് ഏകദേശം 4,000 കോടി രൂപ ബജറ്റിൽ നിർമ്മിക്കുന്ന ഈ വൻകിട ചിത്രത്തിൽ രാവണനായി എത്തുന്നത് യഷ് ആണ്. സിനിമയുടെ ആദ്യഭാഗം 2026 നവംബർ 5-നും രണ്ടാംഭാഗം 2027 ദീപാവലിക്കും റിലീസ് ചെയ്യും.