തന്റെ പേരിൽ വ്യാജ ഇ-മെയിൽ ഐഡി നിർമിച്ച് തട്ടിപ്പിന് ശ്രമം നടക്കുന്നതായി നടൻ ടൊവിനോ തോമസ്. തനിക്കെതിരെ നടക്കുന്ന ഇത്തരം വ്യാജ പ്രചരണങ്ങൾക്കെതിരെ ജാഗ്രത പാലിക്കണമെന്ന് ആവശ്യപ്പെട്ട് സോഷ്യൽ മീഡിയയിലൂടെയാണ് താരം മുന്നറിയിപ്പ് നൽകിയത്. ഈ ഇ-മെയിൽ ഐഡിയുമായി തനിക്ക് യാതൊരുവിധ ബന്ധവുമില്ലെന്നും തന്റെ പേരിൽ ആശയവിനിമയം നടത്താൻ ആരെയും ചുമതലപ്പെടുത്തിയിട്ടില്ലെന്നും ടൊവിനോ വ്യക്തമാക്കുന്നു.
ഈ വ്യാജ വിലാസത്തിൽ നിന്ന് ലഭിക്കുന്ന സന്ദേശങ്ങൾക്ക് മറുപടി നൽകുകയോ വ്യക്തിഗത വിവരങ്ങളും പണവും കൈമാറുകയോ ചെയ്യരുതെന്ന് താരം അഭ്യർത്ഥിച്ചു. സംശയസ്പദമായ ലിങ്കുകളിൽ ക്ലിക്ക് ചെയ്യാതെ, ഇത്തരം ഇ-മെയിലുകൾ ഉടൻ തന്നെ സ്പാം അല്ലെങ്കിൽ ഫിഷിംഗ് ആയി റിപ്പോർട്ട് ചെയ്ത് ഡിലീറ്റ് ചെയ്യണം. തന്റെ പേരിൽ ലഭിക്കുന്ന ഏതൊരു സന്ദേശത്തിന്റെയും ഉറവിടം വ്യക്തമായി പരിശോധിച്ച ശേഷം മാത്രം പ്രതികരിക്കണമെന്നും, കൂടുതൽ ആളുകൾ തട്ടിപ്പിൽപ്പെടാതിരിക്കാൻ ഈ വിവരം പങ്കുവെക്കണമെന്നും അദ്ദേഹം ആവശ്യപ്പെടുന്നു.
‘പള്ളിച്ചട്ടമ്പി’, ‘ഖലീഫ’ എന്നിവയാണ് ഒടുവിൽ പുറത്തിറങ്ങിയ ടൊവിനോ ചിത്രങ്ങൾ. ‘ഗപ്പി’ക്ക് ശേഷം ജോൺ പോൾ സംവിധാനം ചെയ്യുന്ന പുതിയ ചിത്രം, സൈജു ശ്രീധരന്റെ ‘മുൻപേ’, നസ്രിയ നായികയാകുന്ന മുഹ്സിൻ പരാരി ചിത്രം ‘എൽ ക്ലാസിക്കോ’ തുടങ്ങി നിരവധിയേറെ പ്രതീക്ഷയുള്ള പ്രൊജക്റ്റുകളാണ് താരത്തിന്റേതായി അണിയറയിൽ ഒരുങ്ങുന്നത്.
ടൊവിനോയുടെ കുറിപ്പ് ഇങ്ങനെ:
പ്രധാനപ്പെട്ട അറിയിപ്പ്-വ്യാജ സന്ദേശങ്ങളെക്കുറിച്ച്, എന്റെ പേര് വ്യാജമായി ഉപയോഗിച്ചുകൊണ്ട് ചില വ്യക്തികൾ വിവിധ ആളുകളിലേക്ക് ഇമെയിലുകൾ അയക്കുന്നതായി എന്റെ ശ്രദ്ധയിൽപ്പെട്ടിട്ടുണ്ട്.താഴെ പറയുന്ന വിലാസത്തിൽ നിന്നാണ് ഇമെയിലുകൾ അയക്കുന്നത്: tovinothomas79@gmail.com ദയവായി ശ്രദ്ധിക്കുക, ഈ ഇമെയിൽ വിലാസം എന്റേതല്ല, ഈ വിലാസം ഉപയോഗിച്ച് എന്റെ പേരിൽ ആശയവിനിമയം നടത്താൻ ഞാൻ ആർക്കും അനുവാദം നൽകിയിട്ടില്ല.
ഈ ഇ-മെയിൽ ഐഡിയിൽ നിന്ന് ലഭിക്കുന്ന സന്ദേശങ്ങൾക്ക് മറുപടി നൽകരുതെന്നും, വ്യക്തിവിവരങ്ങൾ പങ്കുവെക്കരുതെന്നും, ലിങ്കുകളിൽ ക്ലിക്ക് ചെയ്യരുതെന്നും, പണം നൽകരുതെന്നും, അത്തരം ആവശ്യങ്ങളോട് പ്രതികരിക്കരുതെന്നും എല്ലാവരോടും ഞാൻ ശക്തമായി അഭ്യർത്ഥിക്കുന്നു. ഈ വിലാസത്തിൽ നിന്ന് നിങ്ങൾക്ക് ഏതെങ്കിലും ഇമെയിൽ ലഭിക്കുകയാണെങ്കിൽ, ദയവായി അത് സ്പാം/ഫിഷിംഗ് ആയി റിപ്പോർട്ട് ചെയ്യുകയും ഉടൻ തന്നെ അത് ഡിലീറ്റ് ചെയ്യുകയും ചെയ്യുക.
ഈ വ്യാജ പ്രചരണത്തിൽ വീഴാതിരിക്കാൻ ഇത്തരം ഇമെയിലുകൾ ലഭിച്ചിട്ടുണ്ടാകാൻ സാധ്യതയുള്ള മറ്റുള്ളവരുമായും ഈ വിവരം പങ്കുവെക്കുക. ജാഗ്രത പാലിക്കുക, എന്റെ പേരിൽ വരുന്ന ഏതെങ്കിലും സന്ദേശങ്ങൾക്ക് മറുപടി നൽകുന്നതിന് മുമ്പ് അതിന്റെ ഉറവിടം പരിശോധിച്ച് ഉറപ്പുവരുത്തണം. നിങ്ങളുടെ സഹകരണത്തിനും പിന്തുണയ്ക്കും നന്ദി.
പള്ളിച്ചട്ടമ്പി, ഖലീഫ എന്നിവയാണ് ടൊവിനോയുടേതായി ഒടുവിൽ പുറത്തിറങ്ങിയ ചിത്രങ്ങൾ. ഗപ്പി എന്ന ചിത്രത്തിനുശേഷം സംവിധായകൻ ജോൺ പോൾ ഒരുക്കുന്ന ചിത്രത്തിൽ ടൊവിനോയാണ് നായകൻ. സൈജു ശ്രീധരൻ സംവിധാനംചെയ്യുന്ന മുൻപേ, നസ്രിയ നായികയാകുന്ന മുഹ്സിൻ പരാരി ചിത്രം എൽ ക്ലാസിക്കോ എന്നിവയും ടൊവിനോയുടേതായി അണിയറയിൽ ഒരുങ്ങുന്നുണ്ട്.