2003-ൽ സിബി മലയിലിന്റെ സംവിധാനത്തിൽ പുറത്തിറങ്ങി പ്രേക്ഷകമനസ്സുകളിൽ വലിയ സ്വാധീനം ചെലുത്തിയ ‘എന്റെ വീട് അപ്പൂന്റേം’ എന്ന ചിത്രത്തിന്റെ പിന്നാമ്പുറ ഓർമ്മകൾ പങ്കുവെച്ച് പ്രശസ്ത തിരക്കഥാകൃത്ത് സഞ്ജയ്. ചിത്രത്തിലെ പല സന്ദർഭങ്ങൾക്കും പിന്നിൽ സ്വന്തം ജീവിതത്തിലെ അനുഭവങ്ങളുണ്ടെന്ന് അദ്ദേഹം വെളിപ്പെടുത്തി. ‘പോർട്രയൽസ് ബൈ ഗദ്ദാഫി’ എന്ന പോഡ്കാസ്റ്റിലാണ് ബോബി-സഞ്ജയ് കൂട്ടുകെട്ടിലെ സഞ്ജയ് സിനിമയെക്കുറിച്ചും തിരക്കഥാരചനയിലെ നിലപാടുകളെക്കുറിച്ചും മനസ്സ് തുറന്നത്.
സഹോദരങ്ങൾ തമ്മിലുള്ള മത്സരബുദ്ധി ചെറുപ്പത്തിൽ താനും അനുഭവിച്ചിട്ടുണ്ടെന്നും ഇത്തരം അനുഭവങ്ങളാണ് എഴുത്തിന് കൂടുതൽ തീവ്രത നൽകുന്നതെന്നും സഞ്ജയ് പറഞ്ഞു. എന്നാൽ സിനിമയിലെ കഥാപാത്രം പൂർണ്ണമായും താനല്ലെന്നും, ചില സമാന സാഹചര്യങ്ങളിലൂടെ കടന്നുപോയതുകൊണ്ട് കഥയോട് നേരിട്ട് ആത്മബന്ധം സ്ഥാപിക്കാൻ സാധിച്ചതാണെന്നും അദ്ദേഹം വ്യക്തമാക്കി. എഴുതുന്ന സമയത്ത് വൈകാരികത നിറഞ്ഞുനിൽക്കുമെങ്കിലും പിന്നീട് തികച്ചും ഒബ്ജക്റ്റീവായും ക്ലിനിക്കലായും മാത്രമേ തിരക്കഥയെ കാണാനാകൂ എന്നാണ് അദ്ദേഹത്തിന്റെ പക്ഷം.
രണ്ടര മണിക്കൂർ ദൈർഘ്യമുള്ള സിനിമാ രൂപത്തിൽ ലാഗ് ഒഴിവാക്കാൻ പ്രിയപ്പെട്ട ഭാഗങ്ങൾ പോലും വെട്ടിമാറ്റാൻ എഴുത്തുകാരൻ തയ്യാറാകണമെന്ന് സഞ്ജയ് ചൂണ്ടിക്കാട്ടുന്നു. ഏറ്റവും പ്രിയപ്പെട്ട സംഭാഷണങ്ങളാണെങ്കിൽ പോലും സിനിമയുടെ ഒഴുക്കിനെ ബാധിക്കുകയോ സംവിധായകന് അനുയോജ്യമല്ലെന്ന് തോന്നുകയോ ചെയ്താൽ എഡിറ്റിംഗ് ടേബിളിൽ അത് ഒഴിവാക്കപ്പെടും. തിരക്കഥാരചനയിൽ ‘കിൽ യുവർ ഫേവറിറ്റ്’ എന്നൊരു തത്ത്വമുണ്ടെന്നും സ്വന്തം എഴുത്തിനോട് അമിതമായ മമത പാടില്ലെന്നും അദ്ദേഹം കൂട്ടിച്ചേർത്തു.
ചിത്രത്തിൽ ജ്യോതിർമയിയെ നായികയായി തിരഞ്ഞെടുത്തതിനെക്കുറിച്ചും സഞ്ജയ് വ്യക്തത വരുത്തി. ഒരു കഥാപാത്രത്തെ ആഴത്തിൽ ഉൾക്കൊണ്ട് അവതരിപ്പിക്കാൻ കഴിവുള്ള നടിയാണ് ജ്യോതിർമയിയെന്നും, അവരുടെ കൈകളിൽ ആ വേഷം ഭദ്രമായിരിക്കുമെന്ന ഉറപ്പാണ് ആ തീരുമാനത്തിന് പിന്നിലെന്നും അദ്ദേഹം പറഞ്ഞു. മറ്റ് ഓപ്ഷനുകൾ തിരയുന്നതിനേക്കാൾ മികച്ചൊരു നടിയെ ചിത്രത്തിന്റെ ഭാഗമാക്കുക എന്ന ലളിതമായ ചിന്ത മാത്രമാണ് അതിനു പിന്നിലുണ്ടായിരുന്നത്.