ഡൽഹിയിൽ നടന്ന വിദ്യാർത്ഥി പ്രക്ഷോഭത്തെക്കുറിച്ചുള്ള സോഷ്യൽ മീഡിയ പോസ്റ്റിനെച്ചൊല്ലി പ്രമുഖ ഇൻഫ്ലുവൻസറും അവതാരകയുമായ പേളി മാണിയും സംവിധായകൻ സിബി മലയിലിന്റെ മകൻ ജോ സിബി മലയിലും തമ്മിൽ രൂക്ഷമായ വാക്പോര്. പേളിയുടെ നിലപാടുകളെ വിമർശിച്ച ജോയ്ക്കെതിരെ ‘പരാജയപ്പെട്ട സംവിധായകൻ്റെ മകൻ’ എന്ന് പേളി നടത്തിയ പരാമർശമാണ് തർക്കം കൂടുതൽ രൂക്ഷമാക്കിയത്.
നീറ്റ് പരീക്ഷാ ചോർച്ചയുമായി ബന്ധപ്പെട്ട് ജന്തർ മന്തറിൽ നടന്ന പ്രതിഷേധത്തെ പിന്തുണച്ച് പേളി പങ്കുവെച്ച പോസ്റ്റാണ് സംഭവങ്ങളുടെ തുടക്കം. പ്രക്ഷോഭത്തെ പിന്തുണയ്ക്കുമ്പോഴും വിദ്യാർഥികൾ അക്രമങ്ങളിൽ നിന്ന് പിന്തിരിയണമെന്നും ജീവൻ അപകടത്തിലാക്കുന്ന തരത്തിലുള്ള പ്രതിഷേധങ്ങളിൽ നിന്ന് പിന്മാറി വീട്ടിലേക്ക് മടങ്ങണമെന്നും പേളി ആവശ്യപ്പെട്ടിരുന്നു. എന്നാൽ ഇതിനെതിരെ “ഷെയിം ഓൺ യു” എന്ന് കമന്റ് ചെയ്തുകൊണ്ട് ജോ സിബി മലയിൽ രംഗത്തെത്തി. അടിച്ചമർത്തലുകൾ നേരിടുന്ന വിദ്യാർത്ഥികളുടെ പോരാട്ടത്തെയും ത്യാഗത്തെയും നിസ്സാരവൽക്കരിക്കുന്നതാണ് പേളിയുടെ പോസ്റ്റെന്നും, അക്രമത്തിന്റെ യഥാർത്ഥ കാരണം പോലീസിന്റെ അമിതാധികാര പ്രയോഗമാണെന്നും ജോ ദീർഘമായ കുറിപ്പിലൂടെ ചൂണ്ടിക്കാട്ടി.
ജോയുടെ വിമർശനത്തിന് മറുപടിയായാണ് പേളി ‘പരാജയപ്പെട്ട സംവിധായകൻ’ എന്ന പ്രയോഗം നടത്തിയത്. തന്റെ നാല് പേജ് പോസ്റ്റിന് മറുപടിയായി ഒരു പരാജയപ്പെട്ട സംവിധായകൻ പത്ത് പേജ് തിരക്കഥയെഴുതി വിഷലിപ്തമാക്കാൻ ശ്രമിക്കുകയാണെന്നായിരുന്നു പേളിയുടെ പരിഹാസം.
ഇതോടെ പേളി ലക്ഷ്യമിട്ടത് തന്റെ പിതാവും പ്രശസ്ത സംവിധായകനുമായ സിബി മലയിലിനെയാണെന്ന് വ്യക്തമാക്കി ജോ വീണ്ടും രംഗത്തെത്തി. “ആ പരാജയപ്പെട്ട സംവിധായകൻ എന്റെ അച്ഛനാണ്, പേര് സിബി മലയിൽ. നട്ടെല്ലില്ലാത്ത മകനെയല്ല അദ്ദേഹം വളർത്തിയത്” എന്ന് തിരിച്ചടിച്ച ജോ, ദശലക്ഷക്കണക്കിന് ഫോളോവേഴ്സുള്ള ഒരു വ്യക്തിക്ക് എതിരഭിപ്രായങ്ങൾ വായിച്ചു മനസ്സിലാക്കാൻ മടിയാണോ എന്നും ചോദ്യമുയർത്തി.
തർക്കം വലിയ രീതിയിൽ ചർച്ചയായതോടെ വിഷയത്തിൽ കൂടുതൽ വ്യക്തത വരുത്തി ജോ ഒടുവിൽ മറ്റൊരു കുറിപ്പുകൂടി പങ്കുവെച്ചു. താനൊരു സോഷ്യൽ മീഡിയ ഇൻഫ്ലുവൻസറല്ലെന്നും പേളിക്കെതിരായ വ്യക്തിപരമായ ആക്രമണങ്ങളെ പിന്തുണയ്ക്കുന്നില്ലെന്നും അദ്ദേഹം വ്യക്തമാക്കി. തെറ്റിനെ തെറ്റെന്ന് ചൂണ്ടിക്കാണിക്കുക മാത്രമാണ് ചെയ്തതെന്നും ഇതിന്റെ പേരിൽ ആരെയും ഫോളോ ചെയ്യാനോ അൺഫോളോ ചെയ്യാനോ ആഗ്രഹിക്കുന്നില്ലെന്നും വ്യക്തമാക്കിയാണ് ജോ തർക്കങ്ങൾക്ക് വിരാമമിട്ടത്.