തന്റേതെന്ന പേരിൽ സോഷ്യൽ മീഡിയയിൽ വ്യാപകമായി പ്രചരിക്കുന്ന ചിത്രങ്ങളും വീഡിയോകളും കൃത്രിമമായി നിർമ്മിച്ചതാണെന്ന് വെളിപ്പെടുത്തി നടി രുക്മിണി വസന്ത്. കഴിഞ്ഞ വെള്ളിയാഴ്ച ഒരു സ്വിമ്മിംഗ് പൂളിൽ വെച്ചുള്ള പ്രൊഫഷണൽ ഫോട്ടോഷൂട്ടിന്റെ അണിയറ ദൃശ്യങ്ങൾ എന്ന രീതിയിലാണ് സമൂഹമാധ്യമങ്ങളിൽ ചില ചിത്രങ്ങൾ പ്രത്യക്ഷപ്പെട്ടത്. ഇത് യഥാർത്ഥമാണെന്ന് തെറ്റിദ്ധരിച്ച് നിരവധിപ്പേർ ദൃശ്യങ്ങൾ പങ്കുവെച്ചിരുന്നു. എന്നാൽ ഇൻസ്റ്റാഗ്രാം സ്റ്റോറിയിലൂടെ പ്രതികരിച്ച നടി, ഇവ പൂർണ്ണമായും വ്യാജമാണെന്നും തനിക്ക് ഇതിലൂടെ യാതൊരു ബന്ധവുമില്ലെന്നും വ്യക്തമാക്കി.
എഐ (നിർമ്മിത ബുദ്ധി), ഡീപ്ഫേക്ക് സാങ്കേതികവിദ്യകൾ ഉപയോഗിച്ച് ഇത്തരത്തിൽ വ്യാജ ഉള്ളടക്കങ്ങൾ നിർമ്മിക്കുന്നതും പ്രചരിപ്പിക്കുന്നതും അങ്ങേയറ്റം നിരുത്തരവാദപരമാണെന്നും തന്റെ സ്വകാര്യതയിലേക്കുള്ള കടന്നുകയറ്റമാണെന്നും താരം പ്രസ്താവിച്ചു. ഇത്തരം ഉള്ളടക്കങ്ങൾ പങ്കുവെക്കുന്നതിൽ നിന്നും അതിനോട് പ്രതികരിക്കുന്നതിൽ നിന്നും ആരാധകർ വിട്ടുനിൽക്കണമെന്ന് അവർ അഭ്യർത്ഥിച്ചു. സംഭവത്തിൽ കുറ്റക്കാർക്കെതിരെ ശക്തമായ സൈബർ ക്രൈം അന്വേഷണവും നിയമനടപടികളും ആരംഭിക്കുമെന്നും, തന്റെ ലീഗൽ ടീമുമായി ചേർന്ന് ഈ വിഷയം ഗൗരവമായി കൈകാര്യം ചെയ്യുകയാണെന്നും രുക്മിണി വസന്ത് മുന്നറിയിപ്പ് നൽകി.
സിനിമാ രംഗത്തെ പ്രമുഖരെ ലക്ഷ്യമിട്ടുള്ള ഡീപ്ഫേക്ക് സാങ്കേതികവിദ്യകളുടെ വർദ്ധിച്ചുവരുന്ന ദുരുപയോഗത്തെക്കുറിച്ചുള്ള ആശങ്കകൾ വീണ്ടും ചർച്ചയാക്കുന്നതാണ് ഈ സംഭവം.’സപ്ത സാഗരദാച്ചെ എല്ലോ’ എന്ന ചിത്രത്തിലൂടെ തെന്നിന്ത്യയിലാകെ വലിയ ജനപ്രീതി നേടിയ താരം, നിലവിൽ സിനിമാ രംഗത്ത് ഏറ്റവും തിരക്കുള്ള നായികമാരിൽ ഒരാളാണ്. കന്നഡയിൽ ‘ബാണാദരിയല്ലി’, ‘ബഗീര’, ‘ഭൈരതി രണഗൽ’ തുടങ്ങിയ ചിത്രങ്ങളിലൂടെ ശ്രദ്ധേയയായ രുക്മിണി, ഋഷഭ് ഷെട്ടിയുടെ ബിഗ് ബജറ്റ് ചിത്രം ‘കാന്താര: ചാപ്റ്റർ 1’, പ്രശാന്ത് നീലിന്റെ ‘ഡ്രാഗൺ’, യഷിനൊപ്പമുള്ള ‘ടോക്സിക്’ തുടങ്ങിയ വൻകിട പ്രോജക്റ്റുകളുടെ ഭാഗമാണിപ്പോൾ.
ശിവകാർത്തികേയനൊപ്പം ‘മദ്രാസ്ക്കാരൻ’ എന്ന ചിത്രത്തിലൂടെ തമിഴിലും, ‘അപ്പുഡോ ഇപ്പുഡോ എപ്പുഡോ’ എന്ന ചിത്രത്തിലൂടെ തെലുങ്കിലും താരം അരങ്ങേറ്റം കുറിച്ചിട്ടുണ്ട്. 2019-ൽ ‘ബീർബൽ ട്രിലോജി’യിലൂടെ അഭിനയരംഗത്തെത്തിയ രുക്മിണിക്ക്, 2023-ൽ മികച്ച നടിക്കുള്ള ഫിലിംഫെയർ ക്രിട്ടിക്സ് അവാർഡും ലഭിച്ചിട്ടുണ്ട്.