പൃഥ്വിരാജിനെ കുറിച്ചുള്ള മേജർ രവിയുടെ പരാമർശത്തിന് മറുപടി നൽകി നടിയും പൃഥ്വിരാജിന്റെ അമ്മയുമായ മല്ലിക സുകുമാരൻ. പൃഥ്വിരാജിനൊപ്പമുള്ളൊരു ഫോട്ടോയും കുറിപ്പും സോഷ്യൽ മീഡിയയിലൂടെ പങ്കുവെച്ച് കൊണ്ടായിരുന്നു മല്ലികയുടെ പ്രതികരണം.
“തിരക്ക് പിടിച്ച ഓട്ടത്തിനിടയിൽ എൻ്റെ പൃഥ്വി മോനേ കാണാൻ ഒരവസരം….രണ്ടു ദിവസം ഒന്നിച്ചു നിൽക്കാം… അങ്ങനെ രണ്ടു ദിവസം “ആമിർ അലി” യുടെ കൂടെ… ഫോട്ടോ എടുത്തതിൻ്റെ കൂലിയാണ് എൻ്റെ സാരഥിക്കുള്ള ഒരു പുതിയ സെൽഫി”. മല്ലിക സുകുമാരൻ കുറിച്ചു.
“രാജുവിനോട് ഒരു കാര്യം പറയാൻ ആഗ്രഹിക്കുകയാണ്. ആ അമ്മയെ ഇടയ്ക്ക് കെട്ടിപിടിക്കാൻ മറക്കണ്ട. ഷൂട്ടിങ്ങിന് ബോംബൈയിൽ മാത്രം പോയിരുന്നത് കൊണ്ട് കാര്യമില്ല. ഇടയ്ക്ക് വന്ന് കെട്ടിപിടിച്ചോ”, എന്നായിരുന്നു മേജർ രവി ഒരഭിമുഖത്തിൽ പറഞ്ഞത്.
ഇത് വലിയ വാർത്തയാകുകയും ചെയ്തിരുന്നു. ഇതിന് പിന്നാലെയാണ് മല്ലിക സുകുമാരന്റെ പോസ്റ്റ് വരുന്നത്. ഇതാണ് മേജർ രവിക്കുള്ള മറുപടിയാണോ മല്ലിക നൽകിയതെന്ന തരത്തിലുള്ള ആരാധകരുടെ കമന്റ് വരാൻ കാരണം.
മല്ലികയുടെ പോസ്റ്റിന് നിരവധി പേരാണ് കമന്റുമായെത്തിയിരിക്കുന്നത്. ഇത് മേജർ രവിയ്ക്കുള്ള മറുപടിയാണോ എന്നാണ് പലരും ചോദിക്കുന്നത്. ‘മകനെ കെട്ടിപിടിച്ചു ഇന്ന് തന്നെ ഈ ഫോട്ടോ ഇട്ടതിൽ ഒരുപാട് സന്തോഷം’, ‘ഈ ഫോട്ടോ എടുപ്പിച്ചതിൽ മറ്റാർക്കേലും പരോക്ഷമായി പങ്കുണ്ടോ’- എന്നൊക്കെ ചോദിക്കുന്നവരും കുറവല്ല.
വൈശാഖ് സംവിധാനം ചെയ്യുന്ന ഖലീഫ എന്ന സിനിമയുടെ സെറ്റിൽ വച്ചാണ് മല്ലിക സുകുമാരനും പൃഥ്വിരാജും കണ്ടുമുട്ടിയത്. ഖലീഫയിൽ ഒരു ഗസ്റ്റ് റോളിൽ അഭിനയിക്കാൻ സ്നേഹപൂർവ്വം ക്ഷണിച്ചപ്പോൾ അതിലേറെ സ്നേഹത്തോടെ സമ്മതിച്ചു.