താര സംഘടനായായ അമ്മയുടെ തിരഞ്ഞെടുപ്പിന് മുന്നേ നൽകിയ കേസുകള് പിന്വലിക്കില്ലെന്ന നിലപാടിലുറച്ച് നടിമാരായ കുക്കു പരമേശ്വരനും ഉഷ ഹസീനയും. അമ്മയിലെ വനിതകളുടെ പ്രശ്നങ്ങൾ തുറന്നു പറഞ്ഞ മെമ്മറി കാർഡ് നടി കുക്കു പരമേശ്വരൻ ദുരുപയോഗം ചെയ്യുമെന്നാരോപിച്ച് നടി പൊന്നമ്മ ബാബു രംഗത്തെത്തിയതോടെയാണ് പരാതികൾ മുറുകുന്നത്. ‘അമ്മ’ ഭരണസമിതി തക്കതായ നടപടി സ്വീകരിച്ചാല് മാത്രം പരാതി പിന്വലിക്കാമെന്ന നിലപാടിലാണ് ഇരുവരും.
കുക്കു പരമേശ്വരന് സംഘടനയില് ജനറല് സെക്രട്ടറി സ്ഥാനത്തേക്ക് മത്സരത്തിന് ഇറങ്ങിയതിന് പിന്നാലെ നടി പൊന്നമ്മ ബാബുവാണ് ഗുരുതര ആരോപണവുമായി രംഗത്തെത്തിയത്. ‘അമ്മ’യിലെ സ്ത്രീകള് ദുരനുഭവങ്ങള് പങ്കുവയ്ക്കുന്നതിന്റെ വീഡിയോ മെമ്മറി കാര്ഡ് കുക്കു പരമേശ്വരന് കൈവശപ്പെടുത്തിയെന്നും ഇത് ഹേമാ കമ്മിറ്റിക്ക് കൈമാറിയില്ലെന്നുമാണ് ആരോപണം. മെമ്മറി കാര്ഡ് ദുരുപയോഗം ചെയ്തോ എന്നതില് ആശങ്കയുണ്ടെന്നും പൊന്നമ്മ ബാബു പറഞ്ഞിരുന്നു.
മെമ്മറി കാർഡ് വിവാദത്തിൽ ഇടവേള ബാബുവിനും കുക്കു പരമേശ്വരനും എതിരെ നടി ഉഷ ഹസീന അമ്മ സംഘടനയ്ക്ക് പരാതി നൽകിയിരുന്നു. “കുക്കു പരമേശ്വരനാണ് അത് കൈകാര്യം ചെയ്തത്. ആ കാർഡ് എന്തുകൊണ്ട് ഹേമാ കമ്മിറ്റിക്കുമുന്നിൽ സമർപ്പിച്ചില്ല?. എന്തുകൊണ്ട് തുടർ നടപടികളുണ്ടായില്ല?. ഇടവേള ബാബുവിന്റെ കയ്യിലുൾപ്പെടെ ഈ മെമ്മറി കാർഡ് ഉണ്ട്. അത് കണ്ടെത്തണം. ഉഷ ഷീന പരാതിയിൽ ചൂണ്ടിക്കാട്ടി.
മീ ടൂ ആരോപണങ്ങൾ വന്നതിന് പിന്നാലെ സംഘടനയിലെ വനിതാ അംഗങ്ങൾക്ക് അവരുടെ പ്രശ്നങ്ങൾ തുറന്നുപറയാനായി ഒരു യോഗം വിളിച്ചപ്പോൾ പറഞ്ഞ കാര്യങ്ങൾ റെക്കോർഡ് ചെയ്ത മെമ്മറി കാർഡ് എവിടെയെന്നാണ് ഉഷ ഹസീന ചോദിക്കുന്നത്.
അതേസമയം തനിക്കെതിരെ ഗൂഢാലോചന നടക്കുന്നുവെന്ന് കാട്ടി കുക്കു പരമേശ്വരൻ ഡിജിപിക്ക് പരാതി നൽകിയിരുന്നു. ഇല്ലാത്ത മെമ്മറി കാര്ഡിന്റെ പേരില് തന്നെ വേട്ടയാടുന്നുവെന്നും യൂട്യൂബ് ചാനലുകളിലൂടെ തന്നെ അധിക്ഷേപിക്കുകയും ചെയ്യുന്നുവെന്നാണ് കുക്കു പരമേശ്വരന്റെ പരാതി.
അമ്മയുടെ ജനറൽ സെക്രട്ടറി സ്ഥാനത്തേക്ക് മത്സരിച്ച വ്യക്തിയായിരുന്നു കുക്കു പരമേശ്വരൻ. തനിക്കെതിരെ വലിയ രീതിയിലുള്ള ഗൂഢാലോചന നടക്കുന്നുണ്ടെന്നാണ് ഡിജിപിക്കുനൽകിയ പരാതിയിൽ അവർ പറയുന്നത്. തന്നെ അപമാനിക്കാനുള്ള ശ്രമം നടക്കുന്നുണ്ട്. സമൂഹ മാധ്യങ്ങളി തനിക്കെതിരെ വ്യാപക പ്രചാരണം നടക്കുന്നു. താൻ സംഘടനാ തിരഞ്ഞെടുപ്പിന്റെ മത്സരരംഗത്തുവന്നതിന് പിന്നാലെയാണ് മെമ്മറി കാർഡ് വിവാദം തലപൊക്കിയതെന്നും കുക്കു പറയുന്നു.
അതേസമയം ഇന്നലെ നടന്ന ‘അമ്മ’ തെരഞ്ഞെടുപ്പില് കുക്കു പരമേശ്വരന് ജനറല് സെക്രട്ടറിയായി തെരഞ്ഞെടുക്കപ്പെട്ടു. ശ്വേത മേനോന് സംഘടനയിലെ ആദ്യ വനിതാ പ്രസിഡന്റായി.