വീക്കെന്‍ഡ് ബ്ലോക്ക്ബസ്റ്റേഴ്‌സിന്റെ വീക്കെന്‍ഡ് സിനിമാറ്റിക് യൂണിവേഴ്സിലെ രണ്ടാം ചിത്രമായി എത്തുന്ന ധ്യാന്‍ ശ്രീനിവാസന്‍ നായകനായ ‘ഡിറ്റക്റ്റീവ് ഉജ്ജ്വലൻ’ എന്ന ചിത്രത്തിലെ ആദ്യഗാനം പുറത്തിറങ്ങി. ‘നെപ്ട്യൂൺ’ എന്ന പേരിലാണ് ലിറിക് വീഡിയോ പുറത്തുവന്നത്. ആധുനിക രാഗങ്ങളുടെ ചേരുവകളുള്ള ഈ ഗാനത്തിന് സംഗീതം നല്‍കിയിരിക്കുന്നത് റമീസ് ആര്‍സീ ആണ്. മനു മഞ്ജിത് എഴുതിയ വരികള്‍ റാപ്പ് സിംഗര്‍ ഫെജോ ആണ് പാടിയത്.
ചിത്രം മെയ് 16-ന് ആഗോള റിലീസിനൊരുങ്ങുകയാണ്. കോമഡി ഇന്‍വെസ്റ്റിഗേഷന്‍ ത്രില്ലര്‍ വിഭാഗത്തില്‍ പെടുന്ന ചിത്രത്തില്‍ ധ്യാന്‍ ശ്രീനിവാസനും സിജു വില്‍സണുമാണ് പ്രധാന കഥാപാത്രങ്ങളായി എത്തുന്നത്. ധ്യാന്‍ ‘ഡിറ്റക്റ്റീവ് ഉജ്ജ്വലൻ’ എന്ന ടൈറ്റില്‍ റോളില്‍ എത്തുമ്പോള്‍, സിജു ‘സിഐ ശംഭു മഹാദേവ്’ എന്ന കഥാപാത്രത്തെ അവതരിപ്പിക്കുന്നു. ഇന്ദ്രനീല്‍ ഗോപീകൃഷ്ണനും രാഹുല്‍ ജിയും ചേര്‍ന്ന് രചിച്ചു സംവിധാനം ചെയ്ത ചിത്രം സോഫിയ പോളാണ് നിർമ്മിക്കുന്നത്.
ചിത്രത്തില്‍ കോട്ടയം നസീര്‍, സീമ ജി. നായര്‍, റോണി ഡേവിഡ്, അമീന്‍, നിഹാല്‍ നിസാം, നിബ്രാസ് നൗഷാദ്, ഷാഹുബാസ്, കലാഭവന്‍ നവാസ്, നിര്‍മ്മല്‍ പാലാഴി, ജോസി സിജോ എന്നിവരും പ്രധാന വേഷങ്ങളിലെത്തുന്നു. ടെക്‌നിക്കല്‍ ടീമില്‍ പ്രേം അക്കാട്ടു, ശ്രയാന്റി (ഛായാഗ്രഹണം), ചമന്‍ ചാക്കോ (എഡിറ്റിങ്), കോയാസ് എം (കലാസംവിധാനം), സച്ചിന്‍ സുധാകരന്‍ (സൗണ്ട് ഡിസൈന്‍), ഷാജി പുല്‍പള്ളി (മേക്കപ്പ്), നിസാര്‍ റഹ്‌മത് (വസ്ത്രാലങ്കാരം) തുടങ്ങിയവരാണ്. വീഡിയോ, ടീസര്‍ എന്നിവയ്ക്ക് സോഷ്യല്‍ മീഡിയയില്‍ വലിയ പിന്തുണ ലഭിച്ച സാഹചര്യത്തില്‍, ചിത്രത്തില്‍ നിന്ന് പ്രതീക്ഷകള്‍ കൂടിയതായും സൂചനയുണ്ട്. ഹാസ്യവും ത്രില്ലും ഒത്തുചേരുന്ന ഒരു പുതുമയുള്ള സിനിമാനുഭവം നൽകുകയെന്നതാണ് ചിത്രത്തിന്റെ ലക്ഷ്യം.