മോഹൻലാൽ നായകനായെത്തുന്ന ബ്രഹ്മാണ്ഡ ചിത്രം “വൃഷഭ”യുടെ അപ്ഡേറ്റ് പുറത്തു വിട്ടു അണിയറപ്രവർത്തകർ. ചിത്രത്തിന്റെ ടീസർ ഈ മാസം 18 ന് പുറത്തുവിടുമെന്നാണ് വൃഷഭ ടീം അറിയിച്ചിരിക്കുന്നത്. കഴിഞ്ഞ ദിവസം സിനിമയുടെ ഡബ്ബിങ് പൂർത്തിയായെന്ന് അണിയറപ്രവർത്തകർ അറിയിച്ചിരുന്നു.
ഒരു യോദ്ധാവിന്റെ വേഷത്തിലാണ് മോഹൻലാൽ സിനിമയിൽ എത്തുക എന്നാണ് സൂചന.വൃഷഭ മോഹൻലാലിന്റെ തകർപ്പൻ പ്രകടനം കാഴ്ചവെക്കുമെന്നാണ് ആരാധകരുടെ പ്രതീക്ഷ. ഒക്ടോബർ 16 ന് ചിത്രം തിയറ്ററുകളിൽ എത്തും. നന്ദകിഷോർ സംവിധാനം ചെയ്യുന്ന വൃഷഭ തെലുങ്ക്- മലയാളം ദ്വിഭാഷാ ചിത്രമായാണ് ഒരുങ്ങുന്നതെങ്കിലും തമിഴ്, കന്നഡ, ഹിന്ദി ഭാഷകളില് മൊഴിമാറ്റി പ്രദർശനത്തിനെത്തും.
200 കോടി മുതല്മുടക്കില് ഒരുങ്ങുന്ന ചിത്രം ഇമോഷണല് ഡ്രാമയായാണ് ചിത്രം പ്രേക്ഷകരിലേക്കെത്തുക. സഞ്ജയ് കപൂറിന്റെ മകള് ഷനായ കപൂര് പാന് ഇന്ത്യന് ലെവലിൽ അരങ്ങേറ്റം കുറിക്കുന്ന ചിത്രം കൂടിയാണ് വൃഷഭ. റോഷൻ മെക, ഷനയ കപൂർ, സഹ്റ ഖാൻ, രാഗിണി ദ്വിവേദി, ശ്രീകാന്ത് മെക തുടങ്ങിയവരാണ് മറ്റ് പ്രധാന കഥാപാത്രങ്ങളെ അവതരിപ്പിക്കുന്നത്. ശോഭ കപൂർ, എക്താ ആർ കപൂർ, സികെ പത്മകുമാർ, വരുൺ മാത്തൂർ, സൗരഭ് മിശ്ര, അഭിഷേക് വ്യാസ്, വിശാൽ ഗുർനാനി, ജൂഹി പരേഖ് മേത്ത എന്നിവർ ചേർന്നാണ് ചിത്രം നിർമിച്ചിരിക്കുന്നത്.
കണ്ണപ്പയാണ് മോഹൻലാലിന്റേതായി ഒടുവിൽ പുറത്തിറങ്ങിയ അന്യഭാഷാ ചിത്രം. മലയാളത്തിൽ ഹൃദയപൂർവം ആണ് ഒടുവിലെത്തിയ മോഹൻലാൽ ചിത്രം. ഓണം റിലീസായെത്തിയ ചിത്രം 50 കോടി ക്ലബ്ബിലും ഇടം പിടിച്ചിരുന്നു.