കുഞ്ചാക്കോ ബോബനെ നായകനാക്കി കിരൺ ദാസ് സംവിധാനം ചെയ്യുന്ന ‘ഉന്മാദം’ എന്ന ചിത്രത്തിന്റെ പ്രൊമോഷനിടെ നടൻ സുധീഷ് പങ്കുവെച്ച രസകരമായ അനുഭവം ശ്രദ്ധേയമാകുന്നു. ഒരിക്കൽ കുഞ്ചാക്കോ ബോബന്റെ അച്ഛൻ വേഷത്തിൽ അഭിനയിക്കാൻ തനിക്ക് ക്ഷണം ലഭിച്ച സംഭവമാണ് ജിഞ്ചർ മീഡിയ എന്റർടെയ്ൻമെന്റ്സിന് നൽകിയ അഭിമുഖത്തിൽ സുധീഷ് തുറന്നുപറഞ്ഞത്. സുധീഷും പ്രധാന വേഷത്തിലെത്തുന്ന ചിത്രമാണ് ഉന്മാദം.
‘ഒരു കഥ പറയാന് എന്റെയടുത്ത് ഒരാള് വന്നു. ചാക്കോച്ചനാണ് നായകന്. ഞാന് ത്രൂ ഔട്ട് ഉണ്ട്. നല്ല കഥാപാത്രവുമാണ്. കഥ പറഞ്ഞു പറഞ്ഞു അവസാനം ഫ്ളാഷ് ബാക്കൊക്കെ വന്നപ്പോള് ചാക്കോച്ചന്റെ അച്ഛനായിട്ട് വരും ഞാന്. അതുവരെ ഞാന് ഓക്കെയായിരുന്നു. അത് പറഞ്ഞതും എന്റെ മുഖത്തെ ഭാവം മാറി. അത് കണ്ടതും പുള്ളി, നിങ്ങള് ഇത് ചെയ്യണ്ട ഞങ്ങള് ചെയ്യുന്ന ക്രൂരതയായിപ്പോകും എന്ന് പറഞ്ഞു’, സുധീഷിന്റെ വാക്കുകൾ.
കുഞ്ചാക്കോ ബോബനും ലിജോമോള് ജോസും ആദ്യമായി ഒന്നിക്കുന്ന ചിത്രമാണ് ‘ഉന്മാദം’. ചിത്രം ജൂലൈ 31-ന് തീയേറ്ററുകളിലെത്തും. പനോരമ സ്റ്റുഡിയോസിന്റെ മലയാളത്തിലെ മൂന്നാം നിർമ്മാണ സംരംഭമായ ‘ഉന്മാദം’ മലയാള സിനിമയിലെ ഏറ്റവും ശ്രദ്ധേയരായ എഡിറ്റർമാരിൽ ഒരാളായ കിരൺ ദാസ് ആദ്യമായി സംവിധാനം ചെയ്യുന്ന ചിത്രം കൂടിയാണ്.
ഒരു ഹൊറർ ത്രില്ലർ ആകും സിനിമയെന്ന സൂചനയാണ് ഉന്മാദത്തിന്റെ ട്രെയ്ലർ നൽകുന്നത്. ഒരു ക്രൈമും അതിന് പിന്നാലെ പോകുന്ന കുഞ്ചാക്കോ ബോബന്റെ കഥാപാത്രത്തിന് നേരിടേണ്ടി വരുന്ന പ്രശ്നങ്ങളുമാണ് സിനിമയുടെ ഇതിവൃത്തമെന്ന സൂചനയും ട്രെയ്ലർ നൽകുന്നുണ്ട്. ദേശീയ പുരസ്കാര ജേതാവായ ഷാഹി കബീർ ‘ഓഫീസർ ഓൺ ഡ്യൂട്ടി’ക്ക് ശേഷം കുഞ്ചാക്കോ ബോബനുമായി വീണ്ടും ഒന്നിക്കുന്നു എന്ന പ്രത്യേകതയും ഈ ചിത്രത്തിനുണ്ട്. സിദ്ദിഖ്, സുധീഷ്, വിശാഖ് നായർ, സാബു മോൻ, കോട്ടയം നസീർ, ജിജോയ് രാജഗോപാൽ, ഗോകുലൻ, അരുൺ ചെറുകാവിൽ, ഉണ്ണി ലാലു, ഷാജു ശ്രീധർ, കൃഷ്ണപ്രഭ, കിരൺ പീതാംബരൻ, വിഷ്ണു, റെയ്ന രാധാകൃഷ്ണൻ, സിജോയ് വർഗീസ്, വിഘ്നേശ്വർ സുരേഷ് തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നു. ടി-സീരീസും പനോരമ സ്റ്റുഡിയോസും സംയുക്തമായി അവതരിപ്പിക്കുന്നതാണ് ചിത്രം.