സൈമ 2025ലെ മികച്ച നടനുള്ള മത്സരത്തിൽ നോമിനേഷൻ പട്ടികയിൽ മമ്മൂട്ടിയും, ദുൽഖർ സൽമാനും. മലയാളത്തിലെ മികച്ച നടനുള്ള നോമിനേഷൻ പട്ടികയിലാണ് മമ്മൂട്ടി ഉൾപ്പെട്ടിട്ടുള്ളത്. തെലുങ്കിലെ മികച്ച നടനുള്ള പട്ടികയിലാണ് ദുൽഖറിന്റെ പേരുള്ളത്.
മലയാളത്തിൽ ഭ്രമയുഗം എന്ന ബ്ലാക് ആൻഡ് വൈറ്റ് ചിത്രത്തിലെ പ്രകടനത്തിനാണ് മമ്മൂട്ടിയ്ക്ക് നോമിനേഷൻ. ഒപ്പം ആസിഫ് അലി(കിഷ്കിന്ധാ കാണ്ഡം), ഫഹദ് ഫാസിൽ(ആവേശം), പൃഥ്വിരാജ്(ആടുജീവിതം), ടൊവിനോ തോമസ്(എആർഎം), ഉണ്ണി മുകുന്ദൻ(മാർക്കോ) എന്നിവരും മത്സരരംഗത്തുണ്ട്.
ലക്കി ഭാസ്കർ എന്ന തെലുങ്ക് ചിത്രത്തിലെ പ്രകടനത്തിനാണ് ദുൽഖറിന് നോമിനേഷൻ. അല്ലു അർജുൻ(പുഷ്പ 2), ജൂനിയൻ എൻടിആർ(ദേവര), നാനി(സരിപേത സനിവാനം), പ്രഭാസ്(കൽക്കി 2898 AD), തേജ സജ്ജ(ഹനുമാൻ) എന്നിവരാണ് ദുൽഖറിനൊപ്പം മികച്ച തെലുങ്ക് നടൻ കാറ്റഗറിയിൽ മത്സരിക്കുന്നത്.
മികച്ച നടിക്കുള്ള സൈമ അവാർഡിൽ മലയാളത്തിൽ നിന്നും ആറ് പേരാണ് മത്സരിക്കുന്നത്. ജ്യോതിർമയി(ബൊഗെയ്ൻവില്ല), മമിത ബൈജു(പ്രേമലു),നസ്രിയ ഫഹദ്(സൂക്ഷ്മദർശിനി), പാർവതി തിരുവോത്ത്(ഉള്ളൊഴുക്ക്), ഉർവശി(ഉള്ളൊഴുക്ക്), സരിൻ ഷിഹാബ്(ആട്ടം) എന്നിവരാണ് ആ താരങ്ങൾ.
കാന്ത എന്ന ചിത്രമാണ് ദുല്ഖറിന്റേതായി റിലീസിന് ഒരുങ്ങുന്ന ചിത്രം. സെൽവമണി സെൽവരാജ് ആണ് ചിത്രം സംവിധാനം ചെയ്തിരിക്കുന്നത്. കളങ്കാവല് ആണ് മമ്മൂട്ടിയുടെ പുതിയ ചിത്രം. ജിതിന് കെ ജോസ് സംവിധാനം ചെയ്ത ചിത്രത്തില് വിനായകനും പ്രധാന വേഷത്തില് എത്തുന്നുണ്ട്.