ടോം ക്രൂസ് – അലെക്സാന്ദ്രോ ജി. ഇനാരിറ്റു കൂട്ടുകെട്ടിലിറങ്ങുന്ന ‘ഡിഗ്ഗർ’ എന്ന ചിത്രത്തിലെ ‘ഗണേഷ്’ എന്ന കഥാപാത്രത്തിനായി ഫഹദ് ഫാസിലും വീർ ദാസും ഓഡിഷൻ നൽകിയിരുന്നതായി റിപ്പോർട്ട്. ഈ വേഷത്തിലേക്ക് തിരഞ്ഞെടുക്കപ്പെട്ട ഓസ്കർ ജേതാവ് റിസ് അഹമ്മദ് ഇരുവർക്കും ആശംസകൾ നേർന്നു. അമേരിക്കൻ ഉച്ചാരണം മെച്ചപ്പെടുത്താൻ മൂന്നോ നാലോ മാസം അവിടെ തങ്ങി പരിശീലിക്കാൻ നിർദ്ദേശിച്ചെങ്കിലും സാമ്പത്തിക കാര്യങ്ങളിലെ വിയോജിപ്പുകൾ കാരണം ഫഹദ് ഫാസിൽ ഈ അവസരം വേണ്ടെന്നുവെക്കുകയായിരുന്നു. ചിത്രം രണ്ടുതവണ ഓഡിഷൻ നൽകിയ വീർ ദാസിന് നഷ്ടമായെങ്കിലും തിരക്കഥയുടെ മികവിനെ അദ്ദേഹം പ്രശംസിച്ചിട്ടുണ്ട്. സ്ക്രീനിന് നൽകിയ അഭിമുഖത്തിൽ സംസാരിക്കുകയായിരുന്നു താരം.
ഗണേഷ് എന്ന കഥാപാത്രം ലഭിച്ചതിനുശേഷം ഫഹദ് ഫാസിലിനും വീർ ദാസിനും എന്ത് സന്ദേശമാണ് നൽകാനുള്ളതെന്നായിരുന്നു റിസ് അഹമ്മദിനോടുള്ള ചോദ്യം. ഇതിന് റിസ് അഹമ്മദ് ഹ്രസ്വവും സ്നേഹനിർഭരവുമായ മറുപടിയാണ് നൽകിയത്. “ക്ഷമിക്കണം, നിങ്ങളുടെ അവിശ്വസനീയമായ പ്രവർത്തനങ്ങൾക്ക് നന്ദി, നമുക്ക് ഭാവിയിൽ ഒരുമിച്ച് പ്രവർത്തിക്കാൻ സാധിക്കുമെന്ന് ഞാൻ പ്രതീക്ഷിക്കുന്നു,” എന്നായിരുന്നു റിസിന്റെ മറുപടി.
‘ഡിഗ്ഗർ’ എന്ന ചിത്രത്തിന്റെ ഓഡിഷൻ അനുഭവങ്ങളെക്കുറിച്ച് ഫഹദ് ഫാസിൽ മുമ്പ് വ്യക്തമാക്കിയിരുന്നു. കഥാപാത്രത്തിന്റെ ഇംഗ്ലീഷ് ഉച്ചാരണം കൂടുതൽ മികച്ചതാക്കാൻ തന്നോട് മൂന്നോ നാലോ മാസം അമേരിക്കയിൽ തങ്ങി പരിശീലിക്കാൻ സംവിധായകൻ ആവശ്യപ്പെട്ടിരുന്നതായി ഫഹദ് പറഞ്ഞിരുന്നു. എന്നാൽ ഇതിനുള്ള ചെലവുകൾ വഹിക്കാൻ നിർമ്മാതാക്കൾ തയ്യാറാകാതിരുന്നതിനാലും സാമ്പത്തികപരമായ കാര്യങ്ങൾ യോജിച്ചു പോകാത്തതിനാലും താൻ ഈ അവസരം വേണ്ടെന്നുവെക്കുകയായിരുന്നു എന്ന് അദ്ദേഹം വ്യക്തമാക്കി. കൂടാതെ ഒരു ഉച്ചാരണത്തിന് വേണ്ടി മാത്രം ഇത്രയും വലിയ ശ്രമം നടത്താൻ തനിക്ക് താല്പര്യമുണ്ടായിരുന്നില്ലെന്നും ഫഹദ് പറഞ്ഞിരുന്നു.
മറ്റൊരു ഇന്ത്യൻ താരമായ വീർ ദാസും ഈ ചിത്രത്തിനായി രണ്ടുതവണ ഓഡിഷൻ നൽകിയിരുന്നു. എന്നാൽ റിസ് അഹമ്മദിനെ തിരഞ്ഞെടുത്ത വിവരം അറിഞ്ഞപ്പോൾ തനിക്ക് ഏറെ നിരാശയുണ്ടായെന്ന് അദ്ദേഹം സോഷ്യൽ മീഡിയ പ്ലാറ്റ്ഫോമായ ‘എക്സിൽ’ (X) കുറിച്ചു. സിനിമയുടെ തിരക്കഥ വളരെ മികച്ചതാണെന്നും ഇത്തരം തിരിച്ചടികൾ ജീവിതത്തിന്റെ ഭാഗമാണെന്നും അദ്ദേഹം വ്യക്തമാക്കി. വീർ ദാസ് പിന്നീട് ആ പോസ്റ്റ് ഡിലീറ്റ് ചെയ്തു.
ഇനാരിറ്റുവും ടോം ക്രൂസും ആദ്യമായി ഒന്നിക്കുന്ന ചിത്രമാണ് ‘ഡിഗ്ഗർ’. ജോൺ ഗുഡ്മാൻ, സാൻഡ്ര ഹുള്ളർ, മൈക്കൽ സ്റ്റുൽബർഗ്, ജെസ്സി പ്ലെമൺസ് തുടങ്ങിയ പ്രമുഖ താരങ്ങളും ചിത്രത്തിൽ അണിനിരക്കുന്നു. താൻ തന്നെ ഉണ്ടാക്കിയ ഒരു വൻ ദുരന്തത്തിൽ നിന്ന് മനുഷ്യരാശിയെ രക്ഷിക്കാൻ ശ്രമിക്കുന്ന ഒരു എണ്ണ വ്യവസായിയുടെ കഥയാണ് ചിത്രം പറയുന്നത്. സൗണ്ട് ഓഫ് മെറ്റൽ (Sound of Metal), നൈറ്റ്ക്രോളർ (Nightcrawler), റോഗ് വൺ (Rogue One) തുടങ്ങിയ ചിത്രങ്ങളിലൂടെ ശ്രദ്ധേയനാണ് റിസ് അഹമ്മദ്. 2022-ൽ ‘ദി ലോംഗ് ഗുഡ്ബൈ’ എന്ന ഹ്രസ്വചിത്രത്തിലൂടെയാണ് അദ്ദേഹത്തെ തേടി ഓസ്കർ പുരസ്കാരമെത്തിയത്.