തന്റെ പുതിയ ലുക്കിനെ പരിഹസിച്ച ആരാധകന് പ്രകോപിതനാകാതെ മറുപടി നൽകി നടൻ നസ്ലിൻ. ‘ലോക’ സിനിമയുടെ റിലീസിന് ശേഷം തിയറ്ററിൽ പ്രേക്ഷകരോട് സംവദിക്കാനെത്തിയപ്പോഴായിരുന്നു കാണികളിൽ ഒരാൾ നടന്റെ പുതിയ ലുക്കിനെ പരിഹസിച്ച് കമന്റ് പറഞ്ഞത്. ‘ബംഗാളി ലുക്ക് അടിപൊളി ആയിട്ടുണ്ട്’എന്നായിരുന്നു പ്രേക്ഷകന്റെ പ്രതികരണം. എന്നാൽ ഒട്ടും പ്രകോപിതനാകാതെ ആരാധകനോട് നന്ദി പറയുകയാണ് നസ്ലിൻ ചെയ്തത്. നിരവധി ആളുകളാണ് നസ്ലിനെ അഭിനന്ദിച്ച് രംഗത്തു വരുന്നത്.
കഴിഞ്ഞ കുറച്ച് ദിവസങ്ങൾക്കു മുമ്പ് ആകെ മെലിഞ്ഞ് മുടി നീട്ടി വളർത്തിയ ലുക്കിലുള്ള നടനെ കണ്ട് ബംഗാളിയെപ്പോലെ ഉണ്ട് എന്നായിരുന്നു സമൂഹമാധ്യമങ്ങളിലെ ചർച്ച. പുതിയ സിനിമയായ ‘മോളിവുഡ് ടൈംസി’നു വേണ്ടിയാണോ ഈ പുതിയ ലുക്ക് എന്ന് പലരും സംശയം പ്രകടിപ്പിച്ചു.
അതേസമയം ആസിഫ് അലി നായകനാകുന്ന ‘ടിക്കി ടാക്ക’യിലും നസ്ലിൻ പ്രധാന വേഷത്തിലെത്തുന്നുണ്ട്. ഗാറ്റ്സ്ബി എന്ന കഥാപാത്രത്തെയാണ് നസ്ലിൻ ചിത്രത്തിൽ അവതരിപ്പിക്കുക.