വേൾഡ് ബുക്ക് ഓഫ് റെക്കോർഡ്സിൽ (ഡബ്ല്യുബിആർ) ഇടംനേടി തെലുങ്കു സൂപ്പർതാരം നന്ദമൂരി ബാലകൃഷ്ണ. നായകനെന്ന നിലയിൽ 50 വർഷങ്ങൾ നീണ്ടു നിൽക്കുന്ന സിനിമാ യാത്രയ്ക്കുള്ള ആദരവെന്ന നിലയിലാണ് ഈ പ്രത്യേക അംഗീകാരം. ഡബ്ല്യുബിആറിന്റെ ഗോൾഡ് എഡിഷനിൽ ആണ് നന്ദമൂരി ബാലകൃഷ്ണക്ക് ഇടം ലഭിച്ചത്. ഇന്ത്യൻ സിനിമയിലെ നായകനെന്ന നിലയിൽ മികച്ച സംഭാവനകൾ നൽകിയതിന് യുകെയിലെ വേൾഡ് ബുക്ക് ഓഫ് റെക്കോർഡ്സിന്റെ ഗോൾഡ് എഡിഷനിൽ ഉൾപ്പെടുത്തി ബാലകൃഷ്ണയെ ആദരിക്കും. ആഗസ്റ്റ് 30ന് ഹൈദരാബാദിൽ വെച്ചാണ് ചടങ്ങ്.
കഴിഞ്ഞ 15 വർഷമായി, ബസവതാരകം ഇന്തോ അമേരിക്കൻ കാൻസർ ഹോസ്പിറ്റൽ ആൻഡ് റിസർച്ച് ഇൻസ്റ്റിറ്റ്യൂട്ടിന്റെ ചെയർമാൻ എന്ന നിലയിൽ, അദ്ദേഹം പൊതുസേവനത്തെ മഹത്തായ നിലയിലേക്ക് ഉയർത്തി. ജീവിതത്തെ പരിവർത്തനം ചെയ്യുക, പ്രതീക്ഷ നൽകുക, അനുകമ്പയുള്ള ആരോഗ്യ സംരക്ഷണം ഏറ്റവും ആവശ്യമുള്ളവരിലേക്ക് എത്തുന്നുണ്ടെന്ന് ഉറപ്പാക്കുക തുടങ്ങിയവ ചെയ്താണ് അദ്ദേഹം നിലകൊള്ളുന്നത്.
ബോയപതി ശ്രീനു സംവിധാനം ചെയ്യുന്ന ‘അഖണ്ഡ 2: താണ്ഡവം’ ആണ് ബാലകൃഷ്ണയുടേതായി വരാനിരിക്കുന്ന ചിത്രം. 14 റീല്സ് പ്ലസ് ബാനറില് രാംഅചന്തയും ഗോപിചന്ദ് അചന്തയും ചേര്ന്ന് നിര്മിക്കുന്ന ചിത്രം എം. തേജസ്വിനി നന്ദമൂരി അവതരിപ്പിക്കുന്നു. ആദ്യഭാഗത്തേക്കാള് വമ്പന് ആക്ഷനും ഡ്രാമയും ഉള്പ്പെടുത്തിയാണ് രണ്ടാംഭാഗം ഒരുക്കിയിരിക്കുന്നത് എന്നാണ് സൂചന. ചിത്രത്തിന്റെ ടീസർ നേരത്തേ പുറത്തുവന്നിരുന്നു. സെപ്റ്റംബര് 25-ന് ദസറയോടനുബന്ധിച്ച് ചിത്രം ആഗോളറിലീസായെത്തും.